RUM 14 - Kenyah New Testament

Ayen pebetep dau neng cenganak kem

¹ Un kelunan iaʹ mengut pengelan ne, alaʹ a neng ahang ikem. Ayen paseʹ buk ke babak tekaʹ neng kimet te.

² Un kelunan iaʹ pali pengelan ne, senteng nge uman mung naʹan penguman. Un palai puʹo diaʹ mengut pengelan nte, bang lekai re kujau tuaʹ le.

³ Aheʹ iaʹ uman mung naʹan ina, abeʹ e tekep ke ngetepet kelunan iaʹ abeʹ un uman ne. Aheʹ iaʹ bang uman lekai kujau ina, abeʹ e tekep ke pebetep dau neng kelunan iaʹ uman mung naʹan inu ne, moʹ lepa ne Allah naʹ ia teneng ngan ne.

⁴ Aheʹ koʹ ini, inu sukat coʹ pebetep dau neng ulaʹ dulu tupe? Tuʹa ha neng amin ne iaʹ mencam pekimet buk puyan ne teneng, ngan buk ke salaʹ. Ina ukoʹ o salet tekejeng nge, moʹ Tuhan iaʹ Tuʹa ha un penyukat te pejeng ia.

⁵ Un palai dulu diaʹ nekajaʹ tau, diaʹ badaʹ un ta bioʹ. Un pe palai diaʹ badaʹ tau ne pekuaʹ lete mung. Singket usa hem kanan iaʹ mpi iaʹ teneng baʹan tekaʹ kimet cem tengen.

⁶ Aheʹ iaʹ pekimet un tau bioʹ ina, seʹ e pekimet ke nyelama Tuhan lete. Pekina pe aheʹ iaʹ uman inu inu penguman dina, seʹ e uman ne moʹ o nyelama Tuhan lete, mentung nge nyuaʹ tiga saheʹ palaʹ Allah neng penguman ina. Aheʹ iaʹ abeʹ un ubaʹ ke uman naʹan penguman dina mung, seʹ e abeʹ un uman ne moʹ o nyelama Tuhan lete, mentung nge nyuaʹ tiga saheʹ e palaʹ Allah.

⁷ Moʹ abeʹ un aheʹ neng ahang ilu dini iaʹ mudip mia tengen, pekina pe abeʹ un aheʹ iaʹ matai mia tengen.

⁸ Buk le mudip, seʹ le mudip me Tuhan. Buk le matai, seʹ le matai me Tuhan. Inu pe ilu mudip, inu pe ilu matai, Tuhan iaʹ un ilu.

⁹ Moʹ ini tuman Keristus matai ngan nai numpak mudip pelaʹa, apan ne tai Tuʹa me mung diaʹ mudip, ngan me mung diaʹ matai.

¹⁰ Buk pekina, adeʹ koʹ pebetep dau neng cenganak koʹ tupe? Ngan moʹ inu hoʹ ngetepet cenganak koʹ de? Moʹ mung le ʹo ke tai nekejeng nyeripa Allah apan ne ke pebetep tiraʹ iaʹ teneng milu.

¹¹ Moʹ un dau Kitap Tuhan: “Akeʹ iaʹ mudip, kun dau Tuhan, ina ukoʹ kelunan mung ke sutlep kata akeʹ ʹo, ngan kelunan mung ke teto ngahaʹ akeʹ iaʹ atek Allah.”

¹² Moʹ ban pekina, singket usa le abeʹ le senteng are ke mipa neng puyan le tengen kata Allah uʹo.

Ayen pelaboʹ cenganak kem

¹³ Moʹ ban pekina, ayen pebetep dau neng ilu selepeʹ laʹa. Di lareʹ tekep kem pebetep tekaʹ kimet cem pekini: abeʹ meʹ ke uyan ca inu iaʹ ukoʹ cenganak meʹ ketai petatek ngan ketai laboʹ neng penyalaʹ.

¹⁴ Akeʹ mudip pebulung ngan Tuhan Yesus, ina ukoʹ keʹ tisen lan, abeʹ un ca inu iaʹ palan laʹa. Buk aheʹ ngelan ca inu un palan, nuyan lan ca palan me kelunan ina.

¹⁵ Buk koʹ ngejaʹat udip cenganak koʹ kuʹun penguman ncoʹ, diseʹ koʹ abeʹ un malaʹ ia. Ayen buhaʹ ca inu iaʹ ikem uman ngejaʹat udip mele aheʹ pe, moʹ Keristus ban matai tuman ia.

¹⁶ Ayen buhaʹ pemuyan ncoʹ iaʹ ikoʹ kuma ha tiga ketai nuyan ca pemuyan iaʹ dulu ke kuma jaʹat.

¹⁷ Moʹ puyan pengaren Allah ke ngaren ilu, abeʹ e puyan uman ngan nisep, di lareʹ puyan peneneng, ngan udip iaʹ tadan, ngan bangen iaʹ cen Berua Buheʹ.

¹⁸ Aheʹ iaʹ tudep bayaʹ Keristus neng puyan iaʹ pekina, Allah iaʹ ke badaʹ seʹ e ubaʹ ia, ngan pekina pe dulu ke badaʹ seʹ puyan ne tiga.

¹⁹ Ina ukoʹ tiga le petuman mita inu inu puyan iaʹ ke ngkin udip iaʹ tadan, ngan puyan iaʹ ke mepo ngepali pengelan le semaheʹ apan.

²⁰ Kuʹun penguman, ayen ke ngasing inu iaʹ Allah uyan. Mung naʹan penguman, senteng le uman ne, di lareʹ salaʹ buk le uman ca inu iaʹ ngkin dulu laboʹ neng penyalaʹ.

²¹ Iaʹ teneng puyan, ayen uman sin pun, pekina pe ayen nisep jakan, pekina pe inu diaʹ ca iaʹ ke pelaboʹ cenganak kem neng penyalaʹ.

²² Kimet coʹ iaʹ ikoʹ pebetep tekaʹ bayaʹ pengelan ncoʹ neng Allah, kanan ne ina. Bangen ne tawai kelunan iaʹ Allah abeʹ un pebabak kuʹun pemuyan ne iaʹ ia lepa kuma ke tiga.

²³ Buk kelunan ina un pekawaʹ tekaʹ kimet te dalau ue uman penguman ina, ina diseʹ Allah nyalet penyalaʹ neng ia tegoʹ o uman, moʹ abeʹ puyan ne ina nai cen pengelan. Mung puyan iaʹ abeʹ un nai cen pengelan, penyalaʹ ina.