RUM 1 - Kenyah New Testament

¹ Cen Paulus, ulaʹ Keristus Yesus, iaʹ Allah ban mengin ke nuyan ca diaʹ lawa ha, tengangan ke tai pedenga Denga Injil Allah.

² Cen naʹaʹ ne Allah ban petuket Denga Injil ini man isiu diaʹ pegawa ha, ngan nyurat te dalem Kitap Buheʹ.

³ Idi iaʹ marung neng Anak ke, Tuhan le Yesus Keristus. Neng puyan udip kelunan ne, Yesus ban nai pempet cen mela Daut.

⁴ Un ʹo neng puyan pengebuheʹ Berua ha, luhaʹ ban Yesus Anak Allah kuʹun penyukat bioʹ iaʹ ban pudip ia cen patai ie.

⁵ Moʹ kuʹun Yesus, bioʹ ban pengelesau Allah naʹ gayeng makeʹ ketai ca diaʹ lawa Injil ban tuman Keristus ne. Ina ukoʹ keʹ ke payo kelunan singket lepoʹ ne, ke ngelan Tuhan ngan tudep bayaʹ a.

⁶ Ikem diaʹ kaʹ lepoʹ Rum ne kahum pe ikem kidi, moʹ Allah ban mengin ikem ke tai nuyan diaʹ anun Yesus Keristus.

⁷ Pekina dau heʹ nyurat me mung ngkem diaʹ kaʹ lepoʹ Rum, diaʹ Allah malaʹ ngan mengin ke nuyan kelunan diaʹ anun ne tengen. Awaʹ pe Allah iaʹ Amai le, ngan Tuhan Yesus Keristus, ke naʹ pengelesau ue ngan udip iaʹ tadan mikem.

Paulus nyuaʹ tiga saheʹ dalem temameʹ e

⁸ Ading ading akeʹ nyuaʹ tiga saheʹ dalem Yesus Keristus palaʹ Tuhan Allah heʹ dalau heʹ petawai ikem mung, moʹ denga pengelan ncem tai pa tipo usun tanaʹ ini.

⁹ Allah iaʹ senteng nugen isiu heʹ. Palaʹ ia le akeʹ pegayeng ngan keluʹung kimet ceʹ, iaʹ ina puyan pedenga Denga Injil neng puyan Anak ke. Allah iaʹ tisen, abeʹ keʹ beto petawai ikem.

¹⁰ Lemuto heʹ pisiu ikem tegoʹ keʹ lemameʹ. Kun nceʹ nyat neng Tuhan Allah buk un janan bayaʹ pengubaʹ a, mele pe kumpin, ke nai te akeʹ menoʹ ikem lahoʹ ʹo.

¹¹ Moʹ keʹ bampa tekaʹ ubaʹ ke taʹan ikem, apan nceʹ senteng naʹ pengencai udip berua mikem, idi hem tai salet.

¹² Sen dau heʹ ne pekini, akeʹ pebulung ngan ncem apan ne nai un pit puyan le mepo ilu selepeʹ. Ina le ikem ketai pali ban kuʹun pengelan nceʹ, pekina lete akeʹ ban kuʹun pengelan ncem pe.

¹³ Awaʹ pe ikem tisen cenganak keʹ, tajen ne akeʹ petenup ngan pekimet kenai menoʹ ikem. Pekutat un le diaʹ nyapet akeʹ. Moʹ un tekaʹ kimet ceʹ ubaʹ ke payo dulu ke ngelan Tuhan cen lepoʹ kem, koʹ baʹan lepoʹ diaʹ ca are.

¹⁴ Ubaʹ tekaʹ keʹ ke nai pedenga Denga Tiga, moʹ janga tekaʹ kimet ceʹ neng kelunan mung, diaʹ kaʹ lepoʹ bioʹ, pekina pe neng lepoʹ iʹut, ngan neng diaʹ mencam sekula, pekina pe neng diaʹ turan kidi.

¹⁵ Ina ukoʹ keʹ jaya dau kenai pedenga Denga Tiga mikem kaʹ lepoʹ Rum ne.

Kuasa Denga Injil

¹⁶ Abeʹ keʹ babak tekaʹ neng Denga Injil ini, uban ina atek penyukat Allah iaʹ ke pudip mung kelunan diaʹ ke ngelan ne. Iaʹ ading kidi lepoʹ Yahudi, un pe lepoʹ diaʹ ca puʹo ngebayaʹ.

¹⁷ Moʹ kedalem tiraʹ Injil ina, luhaʹ diseʹ ban Allah ke peteneng ilu kelunan ngan ne kuʹun pengelan le tuaʹ le. Cen penading nge, pa ketai kuʹo ho, ban pengelan le tuaʹ le iaʹ uyan ilu tai teneng. Koʹ baʹan dau iaʹ ban un dalem Kitap: “Kelunan diaʹ ban tai teneng ngan Allah ban kuʹun pengelan nte neng ia, ida iaʹ ke un udip.”

Luhaʹ ban penyalaʹ kelunan

¹⁸ Luhaʹ ban kenai kenca Allah cen surga iaʹ ke nantaʹ mung puyan kelunan diaʹ muau neng Allah, peging ngan mung penyalaʹ kelunan. Man puyan jaʹat de, kelunan dina mempeng katuk telit ketai pigai.

¹⁹ Allah ke ngukum ida dina moʹ de nyekang penisen iaʹ Allah ban mencai milu mung, moʹ lepa ne Allah peluhaʹ a mida.

²⁰ Naʹ pe ilu abeʹ un senteng ke taʹan Allah man mata le, luhaʹ ne diseʹ ban puyan ne cen tading nge uyan usun tanaʹ ini. Luhaʹ pe ban bioʹ penyukat te iaʹ ngeriman, ngan ban baloʹ penyaheʹ e iaʹ peluhaʹ ia atek ban Allah lan. Mencam le ngetisen mung dina are kuʹun pemuyan iaʹ Allah ban uyan kusun tanaʹ ini. Abeʹ un ukan le ke mipau dau Allah laʹa.

²¹ Kelunan diaʹ muau dina, tisen te ida neng Allah, un ʹo abeʹ de nyelama ia koʹ baʹan iaʹ tekep pe are. Abeʹ de nyuaʹ tiga saheʹ de palaʹ Allah. Tai pebareng-areng ne dalem kimet de, ngan tai mentem ne penawai re iaʹ abeʹ un semantet diseʹ ina.

²² Ida badaʹ de mencam, iaʹ lan ne seʹ de mabi.

²³ Abeʹ de tunuk palaʹ Allah iaʹ un pengaren iaʹ abeʹ un senteng ketai salai ina, un sepuʹo ida tunuk uyat tepatung kelunan iaʹ laho ketai salai, pekina pe tepatung sui, pun, ngan ncung ulai pe.

²⁴ Moʹ puyan kelunan tai mabi pekina, Allah pedayo re tai bayaʹ tekaʹ pengubaʹ kimet de, tai palaʹ iaʹ jameng, iaʹ petabo ngebareng ida selepeʹ.

²⁵ Katuk iaʹ telit iaʹ badaʹ puyan Allah ina, ida nyaliu ngan tai nuyan tiraʹ iaʹ palo. Un pelaʹa ida tunuk mentung nte ngadet inu iaʹ Allah ban uyan, un sepuʹo abeʹ de nyingo Allah iaʹ atek uyan mung inu ne. Allah iaʹ tekep ilu ke pempau lemuto-uto pa majan. Amin.

²⁶ Moʹ kuʹun puyan kelunan dina, Allah pedayo re tai bayaʹ pengubaʹ de iaʹ taten tekaʹ neng pemuyan iaʹ deram ina. Un pe leto diaʹ nyaliu adet iaʹ kelayen nte neng puyan iaʹ salaʹ.

²⁷ Pekina te laki mahung adet iaʹ kelayen nte ngan leto, tai re lemana lemana ngan ca usa laki palaʹ ca usa laki, iaʹ ina laki ngan laki uyan puyan iaʹ deram. Moʹ pekina puyan nte, seʹ de alaʹ ukum neng usa re tengen suaʹ puyan penyalaʹ ina.

²⁸ Moʹ de abeʹ un ubaʹ kanan tiraʹ iaʹ lan, iaʹ badaʹ ban puyan Allah, kun Allah pedayo ida tai bayaʹ kimet de iaʹ pejugau ngan iaʹ jaʹat, ina ukoʹ de uyan puyan iaʹ abeʹ un tekep.

²⁹ Sangan nte kuʹun kadoʹ naʹan jaʹat saheʹ, ngan puyan jaʹat, mekum, ngan sakit saheʹ. Sangan nte kuʹun iʹet, ngan lematai, pekenca, puyan pelingu, ngan puyan panyi. Kun nte patu tiraʹ bareng,

³⁰ pejaʹat dulu, miʹi re neng Allah, nyepuhoʹ, balang tawai, jum dau, pekimet lemesai puyan jaʹat, muau neng tuʹa re.

³¹ Abeʹ de mencam pekimet, abeʹ de kanan dau re petuket, abeʹ de un tekaʹ lemaʹ saheʹ, ngan abeʹ de tisen lesau dulu.

³² Tisen te ida dau katuk adet Allah iaʹ badaʹ kelunan diaʹ mudip pekina puyan atek tekep de ke sihoʹ ukum patai. Naʹ pe pekina, abeʹ e bang pekina tuaʹ le puyan nte, pincaʹ kun nte pada diaʹ pekina pemuyan nte puʹo.