PILIPI 4 - Kenyah New Testament

Katuk neng pemuyan

¹ Cen diaʹ pekina cenganak cenganak keʹ, ikem diaʹ pengemalaʹ keʹ ngan pengebampa heʹ. Ikem iaʹ pebangen tawai heʹ, ngan selum tekaʹ keʹ neng ikem pe. Neng puyan diaʹ pekina cenganak diaʹ pengemalaʹ keʹ, salet ngan temek le mudip dalem Tuhan.

² Iodia ngan Sintiki, akeʹ nyat ikem dua alaʹ ca le tekaʹ tawai hem dua, koʹ baʹan pecenganak are ikem mudip dalem Tuhan.

³ Ca dau heʹ me cenganak keʹ iaʹ tudep jahi akeʹ are, akeʹ cuk koʹ mepo leto dua dina, moʹ ida dua diaʹ sanget seʹ pedenga Denga Injil ngan nceʹ are. Pekina pe ngan Kelimin are, ngan mung diaʹ ca diaʹ pejahi ngan nceʹ dalem gayeng ini, diaʹ un ngadan nte senurat dalem buku Allah iaʹ ukoʹ ia peremun ngadan kelunan diaʹ un udip.

⁴ Awaʹ pe ikem lemuto bangen tekaʹ neng pengudip kem dalem Tuhan. Ca liwai dau heʹ laʹa: Bangen ne ikem!

⁵ Tekep lemaʹ saheʹ kem tai luhaʹ kata dulu mung, moʹ nyeng le Tuhan laʹa.

⁶ Ayen ncem iʹut tawai neng ca inu inu pe, di lareʹ neng singket singket temameʹ kem te, nyat ne neng Allah inu inu iaʹ tepa neng ikem, mentung ngkem nyuaʹ tiga saheʹ.

⁷ Ina le ikem ke tisen udip tadan Allah iaʹ ke ngelidung penawai hem ngan kimet cem dalem Keristus Yesus. Moʹ udip iaʹ tadan ina lapa neng mung penisen kelunan ne.

⁸ Ca laʹa cenganak keʹ, nyalet ne kimet cem neng inu iaʹ tiga, iaʹ tekep ukoʹ le ke pempau Tuhan, iaʹ ina mung inu iaʹ telit, iaʹ sebelang, iaʹ teneng, iaʹ buheʹ, iaʹ selawan, ngan iaʹ tekep ilu ke nyelumuk.

⁹ Bayaʹ ne mung dau katuk iaʹ ikem lepa pekalai neng akeʹ, iaʹ ikem ban alaʹ cen tiraʹ keʹ, ngan cen puyan nceʹ are. Ngan Allah iaʹ puʹun udip iaʹ tadan ina ke petugung ngan ncem.

Nyuaʹ tiga saheʹ ban neng pencai katu

¹⁰ Bioʹ tekaʹ saheʹ keʹ neng pengudip keʹ dalem Tuhan, moʹ un ban kimet cem numpak ubaʹ ban ke nubo akeʹ pelaʹa. Abeʹ keʹ un kuma ha ikem beto petawai akeʹ, un sepuʹo abeʹ un pengebiʹen ncem.

¹¹ Abeʹ dau heʹ pisiu pekina moʹ seʹ ban nceʹ tepa, moʹ lepa malai ngan teto ne tekaʹ keʹ neng inu iaʹ un neng akeʹ.

¹² Lepa ne akeʹ tisen neng pengudip iaʹ pinut, tisen pe akeʹ neng pengudip iaʹ lento. Dalem mung naʹan puyan, naʹ pe dalau midan midan pe, lepa ngalai ne akeʹ, ngan teto ne tekaʹ tawai heʹ kidi, neng beso pe, ngan neng laʹu pe, pekina pe dalau lento, ngan dalau kasip.

¹³ Senteng ngkeʹ neng mung puyan inu, ban kuʹun penyukat iaʹ Keristus naʹ makeʹ.

¹⁴ Tiga laleʹ ban saheʹ kem, moʹ un pebeka tawai hem ngan nceʹ dalem penaru heʹ.

¹⁵ Ikem lete lepoʹ Pilipi iaʹ tisen dalau ketai heʹ mecin tanaʹ Makedunia, dalau tading tai heʹ ngkin Denga Injil are, abeʹ un ca Mpun diaʹ ngelan Tuhan iaʹ pebeka tawai ngan nceʹ pit bang ikem le, iaʹ sihoʹ cap naʹ ligit ngan nceʹ.

¹⁶ Moʹ dalau heʹ kaʹ Tesalunika, lepa kudaʹ liwai pe ikem naʹ pencai katu makeʹ tegoʹ keʹ tepa neng inu.

¹⁷ Abeʹ keʹ mita seʹ kem bang ke mencai makeʹ tuaʹ le. Iaʹ lan ne un tekaʹ kimet ceʹ ubaʹ ke taʹan diseʹ kem ke un pit un pit dalem puyan ncem kata Allah.

¹⁸ Pekina dau heʹ badaʹ ban nceʹ alaʹ mung pencai katu hem. Abeʹ un inu iaʹ akeʹ tepa naʹkini, di pareʹ suheʹ pe, cen ʹo heʹ alaʹ mung pengencai hem cen Ipap-ruditus are. Un pengencai dina mung nuyan ca pengencai iaʹ me baʹoʹ palaʹ juma Allah, koʹ baʹan ca ncai liwa iaʹ sihoʹ neng pengubaʹ a.

¹⁹ Moʹ Tuhan Allah heʹ, ia ke naʹ mikem mung penepa hem bayaʹ ban pengekayaʹ a neng peniga ha dalem Keristus Yesus.

²⁰ Palaʹ Allah iaʹ Amai le ketai nuyan serema peniga pabeʹ bayaʹ. Amin.

Nyaheʹ ne

²¹ Pabeʹ tiga saheʹ keʹ me mung diaʹ anun Allah, diaʹ pebeka tawai dalem Keristus Yesus. Mung cenganak le diaʹ pejahi ngan nceʹ kini badaʹ tiga saheʹ mikem.

²² Mung dulu kini diaʹ anun Allah, menco pelaʹa dau diaʹ pegayeng dalem amin Laja Kaisar, badaʹ tiga saheʹ de mikem.

²³ Awaʹ pe pengelesau cen Tuhan Yesus Keristus un pampin ngan ncem. 2