PILIPI 3 - Kenyah New Testament

Peneneng iaʹ teneng lan

¹ Un pe ca laʹa cenganak cenganak keʹ, bangen le ikem dalem Tuhan. Abeʹ keʹ leko tekaʹ ke ngeliwet nyurat iaʹ akeʹ ban lepa nyurat mikem are, moʹ idi iaʹ ke peteneng udip mikem.

² Jagaʹ ne ikem neng dulu diaʹ abeʹ un lelat uyan jaʹat ne, diaʹ koʹ baʹan asu are diaʹ ngkang adet lemide anit usa re.

³ Ilu dini ne diaʹ atek lepa sihoʹ adet sunat lan, moʹ le tunuk neng Allah kuʹun Berua ha, ngan bangen tekaʹ le pebeka tawai le dalem Keristus Yesus, ngan abeʹ le nebelum neng adet adet le kelunan.

⁴ Lan ne, ke senteng pe akeʹ nebelum neng adet kelunan ne. Buk un ca kelunan, mele aheʹ pe, iaʹ naʹ ia un tebelum neng adet kelunan, menco pe akeʹ kidi laʹa.

⁵ Moʹ lepa ne akeʹ sihoʹ adet sunat neng ke aya tau uʹo nai heʹ pempet. Akeʹ ca lepoʹ Israil cen mela Benyamin, petepuʹun cen Iberani, pelaya lepoʹ Iberani. Neng puyan adet Yahudi, akeʹ ne ca kelunan Perisi lete.

⁶ Akeʹ ca iaʹ sanget kidi, pa heʹ tai nyakit Mpun diaʹ ngelan Tuhan. Neng puyan tunuk adet Yahudi, iaʹ ukoʹ dulu kenaʹ ilu tai teneng ngan Allah, abeʹ keʹ un ca salaʹ kidi pe.

⁷ Un sepuʹo mung dina iaʹ akeʹ senteng ke pecap bang nge, akeʹ pekimet ina uyan ca lugi tuk usa heʹ. Akeʹ pet dina mung suaʹ Keristus.

⁸ Abeʹ e bang ina le: mung inu ne akeʹ pekimet atek lugi laleʹ ban ne buk keʹ pata ha ngan peniga iaʹ pasak bioʹ, iaʹ ina penisen Keristus Yesus iaʹ Tuhan nceʹ. Moʹ suaʹ Yesus lete iaʹ ukoʹ keʹ pet mung inu dina, moʹ keʹ kuma ha pekuaʹ ngan nek, apan penalan nceʹ bang Keristus le.

⁹ Penco tai heʹ pebeka pemung ngan ne, ngan un peneneng moʹ keʹ ngelan Keristus, iaʹ Allah naʹ moʹ kuʹun pengelan. Abeʹ keʹ un peneneng tengen iaʹ ban nai cen puyan nceʹ kanan Katuk Adet are.

¹⁰ Bang ca le pengubaʹ keʹ, apan nceʹ tisen lan neng Keristus, ngan tisen penyukat iaʹ pudip ia cen patai ie, ngan pebeka ngan ne dalem penuyen ne, ngan ke nuyan kuaʹ ngan ne dalem puyan patai ie ina.

¹¹ Mele pe inu iaʹ ke sihoʹ neng akeʹ, ahaʹ akeʹ ke mudip dalem udip iaʹ tumpak cen ʹo patai.

Nengayet pita bang

¹² Pa abeʹ naʹkini, abeʹ keʹ kuma ha nalan lepe, ngan abeʹ keʹ kuma ha tai dengkep neng akeʹ. Seʹ keʹ nengayet ke tai palaʹ a ini, moʹ lepa ne akeʹ nalan kuʹun Keristus.

¹³ Ahaʹ cenganak keʹ, abeʹ keʹ naʹ akeʹ iaʹ lepa abeʹ kidi. Un sepuʹo bang ca puyan le akeʹ ke uyan: abeʹ keʹ pesingo neng iaʹ lepa lapa, bang tahaʹ tena le akeʹ nengayet ke peteneng usa heʹ.

¹⁴ Koʹ baʹan le pekata ha, naʹkini ne akeʹ ngasa pekateng palaʹ tedana iaʹ ukoʹ keʹ ke alaʹ bang neng udip, iaʹ ina udip dalem Keristus Yesus. Moʹ tuman ina Allah ban mengin ilu tai mudip neng pengudip iaʹ atek un usun ne.

¹⁵ Mung le diaʹ dengkep tekaʹ dalem berua le, tiga le kuaʹ ayo neng kimet le. Buk ke un tekaʹ tekajaʹ kimet palai milu, Allah lete iaʹ ke badaʹ kempi iaʹ ukoʹ ban tekajaʹ ina ʹo.

¹⁶ Mele pe kumpin ban ne, pa mpi ketai penisen le naʹkini, tiga le bayaʹ a ngan teto le.

¹⁷ Cenganak cenganak keʹ, tiga hem mung lemuto bayaʹ diseʹ keʹ. Ameʹ dini ne ca kata iaʹ teneng mikem. Tiga hem ngetisen mung nte diaʹ bayaʹ kata ina.

¹⁸ Cen naʹaʹ tajen nceʹ badaʹ pekini dau mikem. Naʹkini pelaʹa seʹ keʹ ke numpak badaʹ a ngan tange heʹ: kadoʹ dulu diaʹ luhaʹ neng pengudip de pebunoʹ ngan Keristus, moʹ de miʹi neng puyan patai ie neng kayu tecek.

¹⁹ Ketai kuʹo anun kelunan dina ʹo neng ukum luten, moʹ tekaʹ asam pengubaʹ usa re iaʹ seleket Allah mida. Bangen nte neng iaʹ ukoʹ de tekep ke saʹe, moʹ bang puyan usun tanaʹ tuaʹ ne kimet de.

²⁰ Un sepuʹo ilu dini, tanaʹ usang le un kaʹ surga. Cen ina te ilu pekena kenai Laki iaʹ Keniga Udip le, iaʹ ina Tuhan le Yesus Keristus.

²¹ Ia ke pekaliu usa le iaʹ lemaʹ ini, uyan ne koʹ baʹan seʹ usa ha tengen are, iaʹ menyerema seʹ. Ia ke uyan dina bayaʹ ban penyukat te iaʹ ke petunuk mung inu palaʹ ia.