PILIPI 1 - Kenyah New Testament

¹ Cen Paulus ngan Timutius diaʹ ulaʹ Keristus Yesus: Palaʹ mung kelunan diaʹ anun Allah kaʹ lepoʹ Pilipi diaʹ pebeka tawai ngan Keristus Yesus, pemung ngan mung diaʹ tuʹa ngan diaʹ mepo dalem Mpun diaʹ ngelan Tuhan kina.

² Awaʹ pe Allah iaʹ Amai le, ngan Tuhan Yesus Keristus, ke naʹ mikem pengelesau ue ngan udip iaʹ tadan.

Temameʹ Paulus me diaʹ baca surat ini

³ Singket ceʹ pekimet ikem, lemuto heʹ nyuaʹ tiga saheʹ palaʹ Allah heʹ.

⁴ Singket ceʹ lemameʹ mikem, akeʹ ti ngan bangen tekaʹ tawai heʹ,

⁵ moʹ un pebeka tawai hem dalem gayeng Denga Injil ini cen penading nai ie palaʹ ikem, pa abeʹ naʹkini.

⁶ Cen diaʹ pekina akeʹ ngelan neng puyan ini: moʹ Allah iaʹ lepa nading uyan gayeng iaʹ tiga ini kedalem ikem, ia lete ke pedaʹam me pa ha tai sukung lan, tegoʹ Tau Bioʹ Keristus Yesus ʹo.

⁷ Tekep lete pekina kimet ceʹ neng ikem mung, moʹ kem lemuto un dalem penawai heʹ. Moʹ kem mung un pemung pebeka ngan nceʹ dalem pengelesau Allah iaʹ naʹ gayeng ini makeʹ, tiga ha dalau heʹ sepin naʹkini pe.

⁸ Allah iaʹ tisen ban lan dau heʹ tegoʹ keʹ kuma pengebampa heʹ neng ikem mung nai cen penawai Keristus Yesus tengen.

⁹ Pekini dau heʹ lemameʹ mikem, apan puyan malaʹ kem kenai un pit un pit, peging ngan penisen iaʹ telit ngan puyan iaʹ pebetep dau neng iaʹ teneng.

¹⁰ Idi hem senteng lemileʹ inu iaʹ atek tiga ʹo, apan ncem ke un buheʹ, ngan abeʹ penyalaʹ dapit neng ikem pa tegoʹ Tau Bioʹ Keristus Yesus ʹo.

¹¹ Ngan un toʹ pengudip kem sangan kuʹun buat iaʹ tiga, iaʹ nai kuʹun Yesus Keristus, apan ne luhaʹ serema peniga Allah, mentung le pempau ia.

Keristus iaʹ udip Paulus

¹² Cenganak cenganak keʹ dalem Tuhan, ubaʹ kaʹ keʹ ikem ke tisen, neng mung penaru iaʹ ban sihoʹ akeʹ ini, penaru ini ne iaʹ petutui nelicuk gayeng Denga Injil tai bioʹ.

¹³ Pa ketai mung sedadu diaʹ ngalang amin Laja Kaisar, ngan mung nte diaʹ ca, tai tisen puyan nceʹ ban sepin moʹ tuman beka dalem Keristus.

¹⁴ Kadoʹ cenganak le dalem Tuhan tai bioʹ tebelum nte palaʹ Tuhan moʹ kuʹun ban sepin nceʹ ini. Ina ukoʹ tai makang kuʹo diseʹ de badaʹ katuk Tuhan, abeʹ un tekaʹ de takut.

¹⁵ Lan lete, un te palai mida pedenga Keristus moʹ de petiʹet ngan paseʹ pesakat. Un te palai pelaʹa pedenga ha ngan telit penawai re.

¹⁶ Ida diaʹ uyan pekina cen kimet malaʹ de, moʹ de tisen ban Allah iaʹ cuk akeʹ pegayeng petubo katuk Injil ini.

¹⁷ Un sepuʹo diaʹ ca dina pedenga Keristus, abeʹ e ngan lan tekaʹ sebelang kimet de, di lareʹ kimet de iaʹ ubaʹ ke ngempau ngadan nte tengen. Moʹ un tekaʹ kimet de ubaʹ ke ngepincaʹ petaru akeʹ dalem ngkeʹ sihoʹ sepin ini.

¹⁸ Mele pe kumpin diseʹ de, talan pia cen kimet jaʹat de, talan pia cen kimet de iaʹ telit pe, ahaʹ Keristus lete iaʹ ilu ke pedenga, bangen nceʹ kidi. Abeʹ tai beto tekaʹ bangen nceʹ,

¹⁹ moʹ keʹ tisen, akeʹ ketai kawang cen sepin ini ʹo, ban kuʹun temameʹ kem, ngan ban kuʹun Berua Yesus Keristus iaʹ mepo ilu.

²⁰ Kaʹ pengubaʹ ngan tebelum kimet ceʹ, peletoʹ keʹ abeʹ un ke uyan inu iaʹ ke pesaʹe akeʹ. Moʹ tangen tekaʹ keʹ ke penco tiraʹ Tuhan, mele pe midan midan, naʹ pe dalem ngkeʹ sepin naʹkini, ina tempa kimet ceʹ lete. Matai, mudip keʹ, bang Keristus iaʹ akeʹ pempau ngan pebioʹ dalem udip usa heʹ.

²¹ Moʹ tuk akeʹ, mudip ina Keristus. Ngan buk keʹ matai, tiga kuʹo ke makeʹ.

²² Buk un lete dadoʹ udip keʹ iaʹ ukoʹ ke pegayeng madut kelunan palaʹ Tuhan, pekawaʹ tekaʹ keʹ iaʹ mpi taʹin? Abeʹ keʹ tisen, matai taʹin, mudip taʹin?

²³ Miat laleʹ ne tekaʹ keʹ neng ahang nte dua. Keloʹ laleʹ pe tekaʹ keʹ ke mecin udip ini ketai pemung ngan Keristus, moʹ ina ne iaʹ atek tiga laleʹ.

²⁴ Un sepuʹo udip keʹ neng usa heʹ ini ke un bang nge mikem.

²⁵ Pekina tekaʹ kimet ceʹ, ngan tisen te akeʹ, akeʹ ke ngelineʹ mudip ngan ncem mung ʹo, idi hem tai telicuk ngan bangen dalem pengelan ncem ʹo.

²⁶ Neng diaʹ pekina, buk keʹ nai ceng liwai laʹa palaʹ ikem, un pit ne bangen neng pengudip kem dalem Keristus Yesus, moʹ keʹ un ngan ncem.

²⁷ Iaʹ tekep laleʹ neng pengudip kem, bayaʹ ne kuaʹ ngan katuk Denga Injil Keristus are. Buk pekina, abe kudaʹ keʹ tepahoʹ nai naʹat ikem, naʹ pe ilu pecoʹ, senteng te akeʹ kenahan denga puyan salet tekejeng ngkem, moʹ ban tengangan ca le ilu dalem Berua Tuhan. Kuaʹ kuaʹ le pepatai ngan bali, nbang ca pengubaʹ le ke pekateng pengelan le neng katuk Injil ini.

²⁸ Ayen ncem takut bunoʹ kem, mele inu puyan nte. Tangen le ikem lemuto, ina iaʹ ke peluhaʹ mida ca tedanaʹ de ketai tasaʹ ʹo. Ngan cen puyan tangen ncem, luhaʹ ban ncem ke un usun ne neng pengudip kem kuʹun Allah.

²⁹ Bioʹ lesau Allah iaʹ ban pebeka ikem dalem Keristus. Abeʹ e bang ngelan tuaʹ le, un sepuʹo ke sihoʹ tuyen pe ikem moʹ kuʹun Keristus ina.

³⁰ Naʹkini kuaʹ le payoʹ ti ngan bali, koʹ baʹan iaʹ ikem lepa taʹan seʹ keʹ ti ngan nte cen naʹaʹ are. Pa abeʹ naʹkini un lepe neng akeʹ koʹ baʹan dau denga iaʹ nai palaʹ ikem.