PILIMUN 1 - Kenyah New Testament

¹ Cen Paulus, ca kelunan iaʹ sihoʹ sepin ban tuman Keristus Yesus, ngan pekina pe cen cenganak le Timutius: Palaʹ cenganak meʹ Pilimun iaʹ kuaʹ gayeng ngan meʹ,

² pekina pe palaʹ Mpun diaʹ ngelan Tuhan, iaʹ pempun neng amin ncoʹ, pekina pe palaʹ cenganak leto le Apia, ngan pekina pe palaʹ cenganak le Akipus iaʹ kuaʹ sedadu ngan meʹ dalem pengelan.

³ Awaʹ pe Allah iaʹ Amai le, ngan Tuhan Yesus Keristus ke naʹ pengelesau ue ngan udip iaʹ tadan mikem.

Pengemalaʹ ngan pengelan Pilimun

⁴ Ahaʹ cenganak keʹ Pilimun, singket liwai heʹ lemameʹ, akeʹ pisiu ngadan ncoʹ sulo nyuaʹ tiga saheʹ palaʹ Tuhan Allah heʹ ne.

⁵ Ban ne akeʹ lepa kenahan denga puyan ncoʹ malaʹ neng mung diaʹ anun Allah, ngan pekina pe puyan pengelan ncoʹ palaʹ Tuhan Yesus.

⁶ Akeʹ lemameʹ apan puyan pebeka tawai meʹ ngan ncoʹ dalem Tuhan ngelayen puyan kelunan diaʹ ngelan are, atek ke uyan milu ca penisen iaʹ sukung neng mung naʹan peniga iaʹ ilu pemung un neng udip le dalem Keristus.

⁷ Ahaʹ cenganak keʹ iaʹ penyelum ngkeʹ, puyan pengemalaʹ koʹ lepa uyan ca bangen iaʹ bioʹ neng kimet ceʹ, ngan petangen penawai heʹ. Moʹ puyan ncoʹ lepa pebangen tawai mung kelunan diaʹ anun Allah.

Pengenyat tuman Unisimus

⁸ Tuman ina, buk keʹ pekimet seʹ puyan ilu diaʹ pecenganak dalem Keristus, abeʹ an babak teka ke cuk ikoʹ uyan puyan iaʹ tekep ke uyan.

⁹ Un sepuʹo moʹ keʹ pekimet puyan pengemalaʹ le, ina tuman nceʹ nyat lesau neng ikoʹ. Akeʹ pekina dau inu pia akeʹ Paulus iaʹ tuʹa lawa Keristus Yesus, ngan akeʹ iaʹ un dalem amin sepin ban tuman ia naʹkini.

¹⁰ Moʹ ban pekina, akeʹ nyat lesau palaʹ ikoʹ tuman Unisimus, iaʹ anak keʹ dalem Keristus. Ngajan nceʹ dalem amin sepin, akeʹ lepa tai nuyan amai neng udip berua ha are.

¹¹ Cen kena abeʹ un ca bang ngkoʹ neng ia, un sepuʹo naʹkini. Un ne bang ngkoʹ neng ia, ngan pekina pe akeʹ.

¹² Naʹkini akeʹ cuk ia nai ngeliwet palaʹ ikoʹ, seleket ceʹ katu atai penawai heʹ tengen.

¹³ Iaʹ lan ne, ubaʹ tekaʹ keʹ mapo ia jahi akeʹ ngajan nceʹ dalem amin sepin ban tuman Denga Injil ini, apan ne senteng pepo ngan nceʹ, seleket coʹ nai pepo ngan nceʹ.

¹⁴ Naʹ pe pekina, abeʹ keʹ ubaʹ ke lemejen ikoʹ nai mepo akeʹ, di lareʹ akeʹ ubaʹ ke pele tekaʹ kimet coʹ tuaʹ le. Ina tuman nceʹ abeʹ un mencam ke uyan ca inu inu buk ke abeʹ un marung neng pengubaʹ koʹ.

¹⁵ Masaʹ ina tuman Unisimus ban petat ngan ncoʹ nuat le re, apan ncoʹ senteng ke alaʹ ia uleʹ pa majan lan.

¹⁶ Naʹkini abeʹ ne ia bang ca ulaʹ tuaʹ le, di lareʹ naʹkini lapa tiga ne ia neng ʹo ca ulaʹ. Ia ne iaʹ cenganak le iaʹ ilu malaʹ dalem Keristus. Bioʹ kimet ceʹ malaʹ ia. Nco pe ia neng ikoʹ laʹa. Abeʹ e bang ca ulaʹ iaʹ ikoʹ ke malaʹ, un sepuʹo ca usa iaʹ cenganak dalem Tuhan.

¹⁷ Tuman ina, buk koʹ naʹ akeʹ ca usa diaʹ kuaʹ gayeng ngan ncoʹ, alaʹ ne ia uleʹ ngan selama, koʹ baʹan tekaʹ koʹ ke nyelama akeʹ ne.

¹⁸ Ngan buk ke lepa uyan salaʹ neng ikoʹ, buk ke un utang iaʹ ia abeʹ un nyuaʹ lepe, talan ne mung puyan dina pebaʹ neng akeʹ.

¹⁹ Ujoʹ keʹ tengen iaʹ nyurat jo isiu ini: “Akeʹ Paulus iaʹ ke nyuaʹ mung utang nge palaʹ ikoʹ ʹo.” (Inu baʹin nceʹ petawai ikoʹ, ban ne ikoʹ iaʹ un utang laset coʹ neng akeʹ.)

²⁰ Ahaʹ cenganak keʹ, ban tuman Tuhan le Yesus Keristus, lesau ne akeʹ liwai ini, pebangen ne tawai heʹ moʹ le pecenganak dalem Keristus.

²¹ Mentung ngkeʹ uyan surat ini, bioʹ tekaʹ tebelum ngkeʹ, ikoʹ ke bayaʹ dau pengenyat ceʹ ne. Iaʹ lan ne akeʹ tisen ikoʹ ke uyan lapa neng ʹo dau pengenyat dina are.

²² Dalau ini lete, tiga hoʹ petenup ca tilung makeʹ, ukoʹ kenai heʹ, ban ne tebelum ngkeʹ Allah ke ngeringa dau temameʹ kem mung, ngan ke cuk akeʹ nai ngeliwet palaʹ ikem.

Nyaheʹ ne

²³ Ipapras, iaʹ un pemung ngan ceʹ dalem amin sepin ban tuman Keristus Yesus, pekatu tiga saheʹ e palaʹ ikem.

²⁴ Ngan pekina pe dau cenganak keʹ diaʹ kuaʹ gayeng ngan nceʹ dini, Markus, Aristakus, Dimas ngan Lukas.

²⁵ Awaʹ pe pengelesau Tuhan le Yesus Keristus ke un ngan ncem mung. 1