PEMUYAN 9 - Kenyah New Testament

Pekaliu kimet Saul

¹ Dalau ina caʹ buseʹ lepe Saul. Kun ne ngeretaʹ dau mida ubaʹ ke lematai diaʹ bayaʹ katuk Tuhan dina. Ketai Saul nyat surat neng Pengebioʹ Detaʹu.

² Saul ke ngkin surat ina kaʹ lepoʹ Damsik, me mpun sebayang Yahudi kina, idi buk ke taʹan aheʹ dulu diaʹ bayaʹ Janan Tuhan Yesus kina, inu pia laki ngan leto, ia ke dakep de ngan magang ida kaʹ Yerusalim.

³ Dalau ketai pengasat Saul nyeng kaʹ lepoʹ Damsik, belekaʹ kenai ca dema nyerutang cen langit sihoʹ ngan teliling ia.

⁴ Sulo ho pengkup kaʹ tanaʹ, penco ho kenahan dau ca isiu iaʹ kuma ha neng ia: “Saul, Saul, moʹ inu hoʹ nyakit akeʹ tupe?”

⁵ Un dau Saul mipa: “Aheʹ koʹ tupe, Tuhan?” Un dau isiu laʹa: “Akeʹ Yesus iaʹ ikoʹ nyakit ini.

⁶ Beteʹ ne. Tai hoʹ kedalem lepoʹ. Kaʹ ina re ke badaʹ mikoʹ inu iaʹ tekep ikoʹ ke bayaʹ ʹo.”

⁷ Un dulu diaʹ serengan ngan ne masat dina, pekenaʹ ne ida ngan tai paʹan, moʹ de kenahan dau isiu ina, un ʹo abeʹ de taʹan ca kelunan puʹo.

⁸ Sulo nai Saul beteʹ cen ukoʹ o pengkup kina. Kun ne mesik mata ha, abeʹ e taʹan, moʹ ban butaʹ ne ia. Penco re ajak ia, ngkin ia kaʹ lepoʹ Damsik.

⁹ Telu tau majan ne butaʹ, abeʹ e uman, abeʹ e nisep pe.

¹⁰ Un kaʹ lepoʹ Damsik, un ca laki iaʹ bayaʹ katuk Tuhan, ngadan ne Ananias, Tegoʹ ca tau ue, kenai Tuhan luhaʹ neng penaʹat te. Kun dau Tuhan neng ia: “Ananias.” Kun Ananias mipa ia: “Akeʹ te ini Tuhan.”

¹¹ Un dau Tuhan neng ia: “Petenup ne ikoʹ. Tai hoʹ masat kaʹ janan iaʹ ngadan ne Janan Telit. Ikoʹ ke taʹan ca laki ngadan ne Saul lepoʹ Tarsus kaʹ amin Yudas de. Un te Saul lemameʹ kina te.

¹² Uban lepa ne Saul taʹan ikoʹ neng penaʹat te, taʹan tai hoʹ napoʹ ujoʹ koʹ neng ia kaʹ amin ina te. Ina le ia ke taʹan ʹo.”

¹³ Un dau Ananias mipa pelaʹa: “Ahaʹ Tuhan, lepa ne akeʹ kenahan dau dulu badaʹ puyan laki ina, pasak jaʹat te neng dulu diaʹ ngelan ikoʹ kaʹ Yerusalim.

¹⁴ Kenai ie kaʹ lepoʹ Damsik ini pelaʹa, nai ie ngkin penyukat cen diaʹ detaʹu lataʹ ke magang mung diaʹ ngelan ikoʹ.”

¹⁵ Kun dau Tuhan neng Ananias: “Tai ne ikoʹ sedeʹ. Lepa ne akeʹ lemileʹ Saul ina, ke uyan ia ca senganan man ke pedenga ngadan nceʹ palaʹ dulu diaʹ tahaʹ awang Israil, palaʹ diaʹ paren pe, ngan pekina pe palaʹ lepoʹ Israil.

¹⁶ Akeʹ tengen ke badaʹ mia neng mung tuyen iaʹ tekep ke sihoʹ ia moʹ kuʹun ngadan nceʹ.”

¹⁷ Penco ketai Ananias masat, tai kedalem amin kukoʹ Saul ne. Kun ne napoʹ ujoʹ o neng Saul, un dau ue: “Ahaʹ cenganak keʹ Saul, akeʹ iaʹ ban Tuhan cuk, ia lete Yesus iaʹ ban nai luhaʹ kata ikoʹ ngalang janan, dalau nai hoʹ are. Ina ukoʹ o cuk akeʹ nai, moʹ o ke cuk ikoʹ ke taʹan pelaʹa, ngan cuk ikoʹ tai sangan kuʹun Berua Buheʹ.”

¹⁸ Dalau ina koʹ baʹan un are tekaʹ ca king atuk laboʹ cen mata ha, penco ho taʹan. Nai kun ne beteʹ, sulo tai ie sihoʹ ngebatis nuʹo.

¹⁹ Lepa ha uman, kenai ie pali pelaʹa. Dalem kudaʹ tau pe majan Saul ngelineʹ pemung ngan diaʹ bayaʹ katuk Tuhan kaʹ lepoʹ Damsik.

Saul iaʹ penco badaʹ katuk Denga Injil kaʹ lepoʹ Damsik

²⁰ Tegoʹ ina pe, ketai ie kedalem amin sebayang Yahudi. Kina Saul badaʹ denga Yesus iaʹ atek Anak Allah.

²¹ Tai salam ne tekaʹ mung dulu diaʹ kenahan dau ue. Un dau re: “Moʹ abeʹ e laki ini lete iaʹ lematai dulu diaʹ ngelan Yesus kaʹ Yerusalim are tupe? Masaʹ nai ie kini ke magang kelunan dini, ngan ngkin ida palaʹ diaʹ detaʹu lataʹ taʹin?”

²² Un Saul pali kuʹo ke diseʹ e badaʹ katuk kina. Un dau ue: “Atek ban Yesus ina, ia lete iaʹ ngkang pungu udip.” Un lepoʹ Yahudi diaʹ mudip kaʹ lepoʹ Damsik dina tai benaʹa ne ida, supeʹ de mipa ia.”

²³ Majan ne uʹo ina, un lepoʹ Yahudi, kun nte peseket ubaʹ ke lematai Saul.

²⁴ Un Saul, tisen ne neng puyan peket de. Sulo re mabang ia neng pamen kerahan batu lepoʹ ina, utung tau utung alem ne, ubaʹ ke lematai ia.

²⁵ Ketai re diaʹ bayaʹ katuk Saul dina alaʹ Saul neng ca alem me. Kun nte muno ia dalem ca gai, cen ca awang neng kerahan lepoʹ ina.

Saul tai kaʹ Yerusalim

²⁶ Ketai Saul abeʹ kaʹ Yerusalim. Kun ne ten ketai pejahi ngan nte diaʹ bayaʹ katuk Tuhan kina. Un mung nte dina, takut de neng ia, moʹ abeʹ de ngelan ia ca diaʹ bayaʹ katuk Tuhan.

²⁷ Sulo Barnabas mepo ia, ngan tai ngkin ia palaʹ diaʹ lawa Injil dina. Barnabas badaʹ diseʹ Saul lepa taʹan Tuhan kaʹ janan Damsik, ngan badaʹ diseʹ puyan Tuhan pisiu ia. Kun Barnabas badaʹ diseʹ Saul pedenga ngadan Yesus kaʹ lepoʹ Damsik ngan tempa lan pe dau ue.

²⁸ Ngan ina ukoʹ Saul tai ngelineʹ ngan nte kina. Ketai ie masat neng lepoʹ Yerusalim pa libut, mentung nge badaʹ tiraʹ dalem ngadan Tuhan ngan tempa dau ue.

²⁹ Saul iaʹ tai petiraʹ ngan paseʹ neng lepoʹ Yahudi diaʹ kanan isiu Gerika. Kun nte mita janan ubaʹ ke lematai ia.

³⁰ Un diaʹ cenganak ke dalem Tuhan dina, tai re tisen neng puyan ina, penco re ngkin Saul kaʹ Kaisaria, kun nte cuk ia tai kaʹ lepoʹ Tarsus.

³¹ Ina ukoʹ o un tadan neng Mpun diaʹ ngelan Tuhan pa tipo tanaʹ Yudia, ngan Galilia, ngan Samaria. Un Mpun diaʹ ngelan Tuhan kina tai tangen kuʹun katuk ngan tai un pit kadoʹ de, mentung mudip ngan tunuk seʹ puyan nte palaʹ Tuhan, uban kuʹun Berua Tuhan iaʹ mepo ida.

Tai Peterus kaʹ lepoʹ Lida ngan lepoʹ Yupe

³² Tai Peterus masat pa tipo dale ina, tai ie ca liwai naʹat diaʹ anun Tuhan diaʹ mudip kaʹ lepoʹ Lida.

³³ Kina ha petegoʹ ngan ca laki ngadan ne Inias, iaʹ sakit lemaʹ uhat te. Lepa aya uman ne majan ne, abeʹ e senteng puke cen ukoʹ o meken.

³⁴ Un dau Peterus neng ia: “Ahaʹ Inias, ban Yesus Keristus iaʹ paget ikoʹ. Beteʹ ne, lemelen ne pat coʹ ne.” Dalau ina to kenai ie beteʹ tuaʹ ne.

³⁵ Mung dulu diaʹ kaʹ lepoʹ Lida ngan kaʹ tanaʹ Sarun ina taʹan seʹ aget Inias, penco re mayo bayaʹ Tuhan.

³⁶ Un kaʹ lepoʹ Yupe, un ca leto iaʹ ngelan Tuhan, ngadan ne Tabita. (Un ngadan ne isiu Gerika, Durkas, iaʹ sen ne telaʹo.) Leto ina lemuto un saheʹ neng dulu, ngan naʹ tuaʹ inu ue moʹ o lesau diaʹ taru mudip.

³⁷ Dalau ina ha sihoʹ sakit, penco ho matai. Lepa re ntoʹ patai ie, kun nte ngkin patai ina neng ca jun amin nte kempau.

³⁸ Moʹ lepoʹ Lida ina nyeng kata lepoʹ Yupe, ina ukoʹ de diaʹ bayaʹ katuk Tuhan kaʹ Yupe kenahan dau denga Peterus un kaʹ Lida. Penco re cuk dua usa tai mengin ia, pekini dau re: “Kudaʹ pe ikoʹ nyelarai nai naʹat ameʹ ading.”

³⁹ Penco Peterus pedepa inu ue, tai serengan ida. Lepa ha abeʹ, kun dulu ngkin ia kaʹ jun amin kukoʹ patai idai. Mung leto balu diaʹ nekejeng nusau Peterus nange, mentung nte badaʹ sapai ngan gelam iaʹ ban Durkas uyan dalau ue un ngan nte are.

⁴⁰ Kun Peterus cuk ida mung tai ka use. Uʹo ina kun ne sutlep lemameʹ Tuhan. Uʹo ina pelaʹa, penco ho pupa sileʹ tahaʹ patai ina. Un dau ue: “Tabita, beteʹ ne ikoʹ.” Kun Tabita mesik mata ha taʹan Peterus, sulo nai ie madung.

⁴¹ Kun Peterus mencai ujoʹ o mepo beteʹ ia. Uʹo ina ha mengin ida diaʹ anun Tuhan, peging ngan diaʹ balu dina, kun ne badaʹ ban ne nai mudip mida.

⁴² Tai denga ne puyan ina pa tipo Yupe, ina ukoʹ kadoʹ dulu nai ngelan Tuhan.

⁴³ Ngelineʹ ne Peterus kudaʹ tau pe majan ne kaʹ Yupe, pemung ngan ca laki ngadan ne Simun, iaʹ tukeng ngadeng anit pun.