PEMUYAN 8 - Kenyah New Testament

¹ Saul ca iaʹ mayo neng puyang lematai Stipanus ne. Tegoʹ tau ina, ina ne tading kenai taru iaʹ bioʹ neng Mpun diaʹ ngelan Tuhan kaʹ Yerusalim. Mung diaʹ ngelan Tuhan petat purat de pa tipo tanaʹ Yudia, ngan kaʹ Samaria. Bang diaʹ lawa Injil tuaʹ le diaʹ ngelineʹ.

Saul nyakit Mpun diaʹ ngelan Tuhan

² Un pe palai diaʹ temek lemameʹ, ida iaʹ tai masek patai Stipanus, mentung bioʹ dau tange re.

³ Un Saul ne ubaʹ ke ngasing Mpun diaʹ ngelan Tuhan. Tai ie kaʹ dalem singket amin, mentung nge mihit dulu kawang, toʹ de diaʹ ngelan, inu pia laki, pekina pe leto, penco naʹ ida dalem amin sepin.

Denga Injil abeʹ kaʹ lepoʹ Samaria

⁴ Mung nte diaʹ petat purat dina, kempi kempi ketai re masat, kina re pedenga Injil ina.

⁵ Un Pilipus, tai ie puno kaʹ dale Samaria, penco ho badaʹ neng puyan Keristus iaʹ ngkang pungu udip me dulu kina.

⁶ Toʹ dulu dina kuʹa ayo re pekimet dau iaʹ Pilipus nai badaʹ ina. Mung nte ngeringa dau ue, ngan taʹan mung puyan nyingan iaʹ ia uyan ina.

⁷ Un pe ia sau bali neng kadoʹ kadoʹ dulu, mentung bali dina ngelengap dau nai kawang cen dalem ida. Un pelaʹa kadoʹ dulu diaʹ apet ngan diaʹ ajun tai maget.

⁸ Bioʹ laleʹ le seʹ bangen dalem dale Samaria ne.

⁹ Un ca laki dalem lepoʹ ina, ngadan ne Simun. Majan ne ia pelingu mata neng lepoʹ Samaria ne, pa tai dulu salam neng ia. Mentung nge badaʹ ia ca kelunan bioʹ.

¹⁰ Mung dulu dalem lepoʹ ina, peging ngan diaʹ dumit ngan diaʹ lataʹ, tai payo ngan ne. Kun dau re: “Laki ini iaʹ un penyukat Allah iaʹ un dau le kidi Penyukat Bioʹ.”

¹¹ Mung dulu tai payo ngan ne, moʹ majan laleʹ ne Simun ne pesalam ida man puyan pelingu mata re.

¹² Dalau re kenahan dau kenai Pilipus iaʹ badaʹ Denga Injil neng puyan pengaren Allah ngaren kelunan, ngan neng puyan ngadan Yesus Keristus ina, mung nte ngelan, peging ngan laki ngan leto. Sulo toʹ de sihoʹ ngebatis.

¹³ Un Simun, nai pe ia ngelan. Lepa ha sihoʹ ngebatis, temek seʹ e pemung ngan Pilipus. Tai salam ne ia taʹan seʹ Pilipus uyan tedanaʹ bulen ngan puyan nyingan iaʹ bioʹ ina.

¹⁴ Un diaʹ lawa Injil kaʹ Yerusalim kenahan dau denga puyan lepoʹ Samaria lepa ngelan tiraʹ Tuhan Allah. Kun nte cuk Peterus ngan Yaya tai naʹat ida.

¹⁵ Uʹo re dua abeʹ, kun nte dua lemameʹ Tuhan me ketoʹ de diaʹ ngelan dina, apan nte ke un Berua Buheʹ,

¹⁶ uban ne abeʹ lepe Berua Buheʹ nai nesun neng ida dina. Ida ban lepa sihoʹ ngebatis tuaʹ le dalem ngadan Tuhan Yesus.

¹⁷ Sulo Peterus ngan Yaya napoʹ ujoʹ de neng ida, penco re un Berua Buheʹ.

¹⁸ Kun Simun naʹat diseʹ kenai Berua Buheʹ kuʹun lawa Injil tegoʹ re napoʹ ujoʹ de neng ida dina, ina ukoʹ o mencai ligit mida dua.

¹⁹ Un dau ue: “Naʹ pe makeʹ baʹan le penyukat ina, apan mele neng aheʹ keʹ ke napoʹ ujoʹ keʹ ʹo, idi re ke un Berua Buheʹ ʹo.”

²⁰ Kun dau Peterus mipa ia: “Pebareng ne ligit coʹ pemung ngan usa hoʹ, moʹ un tekaʹ koʹ pekimet senteng ke lemeli pengencai sio Allah man ligit coʹ.

²¹ Abeʹ anun ncoʹ ne sihoʹ dalem gayeng ini, moʹ kimet coʹ abeʹ e telit dalem penaʹat Tuhan Allah.

²² Bang nesen ne ikoʹ ngan nyepuleʹ ne kimet coʹ cen puyan jaʹat coʹ ne. Ngan lemameʹ palaʹ Tuhan, apan Tuhan sau kimet coʹ iaʹ jaʹat ina ʹo.

²³ MOʹ akeʹ tisen, un ncoʹ ne caʹ pampin ketiʹet dalem penawai hoʹ, koʹ baʹan paʹit petu are. Petem lepe ikoʹ dalem beka penyalaʹ.”

²⁴ Kun dau Simun mipa Peterus ngan Yaya: “Ikem lesau ne akeʹ, ngan lemameʹ Tuhan makeʹ, malap puyan iaʹ ikem badaʹ ina kenai sihoʹ akeʹ ʹo.”

²⁵ Lepa Peterus de dua Yaya ne badaʹ neng ban tugen nte, ngan pedenga tiraʹ Tuhan ne, nai re dua ngeliwet kaʹ Yerusalim. Ngalang janan nte badaʹ Denga Injil kedalem palai lepoʹ kaʹ dale Samaria.

Pilipus pejahi ngan laki bioʹ lepoʹ Itiupia

²⁶ Kenai ca usa melikat Tuhan pisiu Pilipus, kun dau ue: “Beteʹ ne ikoʹ Pilipus, tai ne ikoʹ masat tahaʹ kabing asat tau, bayaʹ janan iaʹ tai puno cen lepoʹ Yerusalim ne, tai kaʹ lepoʹ Gasa.” (Janan ina lenga. Abeʹ dulu kanan ne laʹa.)

²⁷ Penco Pilipus pedepa inu ue, tai ie puke. Un ca laki lepoʹ Itiupia iaʹ puntan, ca pegawai bioʹ, tai uleʹ bayaʹ janan ina. Laki bioʹ lepoʹ Itiupia ina iaʹ un penyukat ngkang mung bahan ligit Kandake, laja leto lepoʹ Itiupia ne. Laki ina nai ie uleʹ uʹo ho lemameʹ palaʹ Allah kaʹ Yerusalim.

²⁸ Un dalau ina, dalau kenai ie uleʹ, ina ha madung neng usun kerita ha, mentung nge baca Kitap Pegawa Yesaya.

²⁹ Kun Berua Buheʹ pisiu Pilipus: “Tai ne ikoʹ ngenyeng laki bioʹ lepoʹ Itiupia ina, tai pemung ngan ne neng kerita haʹ.”

³⁰ Ngasa tai Pilipus palaʹ ia, penco ho kenahan dau laki bioʹ lepoʹ Itiupia ne baca cen Kitap Pegawa Yesaya. Kun dau Pilipus: “Tisen te ikoʹ kidi amai, inu iaʹ ikoʹ baca ina tupe?”

³¹ Un dau laki bioʹ ina neng ia: “Kumpin nceʹ ketisen ne buk abeʹ un aheʹ iaʹ badaʹ a makeʹ?” Penco ho mengin Pilipus nai kempau neng usun kerita ha, pata madung ngan ne.

³² Un jo isiu dalem Kitap iaʹ ia baca ina, pekini dau ue: “Ia koʹ diseʹ baʹan ca dumba iaʹ dulu ketai nebek, ngan koʹ baʹan ca anak dumba iaʹ are nuyau buk dulu lemetip bulu ue. Pekina pe abeʹ e mesik paʹ a.

³³ Pekina pe dalem puyan dulu panyi ia, abeʹ un ca betep tiraʹ dulu iaʹ teneng neng ia. Abeʹ un aheʹ iaʹ senteng badaʹ ban mela usa ha moʹ udip pe neng usun tanaʹ ini lepa pesau.”

³⁴ Penco dau laki bioʹ ina neng Pilipus: “Tiga ne ikoʹ badaʹ a makeʹ sedeʹ, moʹ neng aheʹ iaʹ pegawa Yesaya pisiu pekina dau tupe? Dau ue neng usa ha tengen taʹin, buk are neng dulu diaʹ ca pe?”

³⁵ Sulo Pilipus badaʹ mia cen tading jo isiu dalem Kitap ina are, kun ne badaʹ Denga Injil neng puyan Yesus.

³⁶ Ngajan ketai re dua masat ngalang janan kina, abeʹ ne ida dua neng ca alo sungai. Un dau laki bioʹ ina neng Pilipus: “Un sungai kina. Inu iaʹ ukoʹ keʹ abeʹ un senteng ke siho ngebatis tupe?” [

³⁷ Kun dau Pilipus mipa ia: “Buk koʹ ngelan lan tekaʹ neng kimet coʹ, senteng te.” Un dau laki bioʹ lepoʹ Itiupia mipa ia: “Akeʹ ngelan Yesus Keristus ne atek Anak Allah.”]

³⁸ Penco ho cuk iaʹ ngkang kerita ina ngelineʹ. Sulo ketai re dua puno kedalem sungai, iaʹ ina Pilipus ngan laki bioʹ ina are. Penco Pilipus ngebatis ia.

³⁹ Dalau kenai re dua pejakaʹ cen dalem sungai ina, sulo Berua Tuhan ngkin Pilipus mecin cen ina nuʹo. Un laki bioʹ ina, abeʹ e taʹan ia laʹa. Penco ketai ie uleʹ ngan bangen tawai ie bayaʹ toʹ dadoʹ janan ina.

⁴⁰ Un Pilipus, nai pe ia luhaʹ laʹa kaʹ lepoʹ Asdut. Tai ie masat uban ke pedenga Denga Injil pa tipo singket lepoʹ, pa ha abeʹ kaʹ lepoʹ Kaisaria.