PEMUYAN 6 - Kenyah New Testament

Tujoʹ usa diaʹ nai mepo

¹ Kudaʹ majan uʹo ina, nai un pit un pit ne pengekadoʹ de diaʹ bayaʹ katuk Tuhan dina. Tai paseʹ ne dau lepoʹ Yahudi diaʹ pisiu Gerika neng lepoʹ Yahudi diaʹ puʹun. Un lepoʹ Yahudi diaʹ pisiu Gerika dina badaʹ abeʹ un aheʹ iaʹ pesingo leto balu re dalau re petulat balun singket tau are.

² Tai puloʹ dua usa lawa Injil dina pempun mung diaʹ bayaʹ katuk Tuhan dina. Un dau re: “Abeʹ meʹ dini tekep tekaʹ ke lepo gayeng pedenga tiraʹ Allah apan ketai ngkang gayeng petubo ligit.

³ Moʹ ina cenganak cenganak, tiga hem lemileʹ neng ahang ikem, tujoʹ usa diaʹ ban ilu nugen luhaʹ diseʹ un sangan kuʹun Berua Buheʹ, ngan diaʹ tudi diseʹ penisen pe, iaʹ ilu nebelum ke ngkang gayeng ini.

⁴ Tuman ina ameʹ dini diaʹ ke pekutat ke lemameʹ Tuhan ngan ke menco gayeng pedenga tiraʹ a.”

⁵ Un tiraʹ de sihoʹ neng pengubaʹ de dina mung, penco re lemileʹ Stipanus, ca laki iaʹ sangan kuʹun pengelan ngan Berua Buheʹ. Un pe Pilipus, ngan Pukurus, ngan Nikanur, ngan Timun, ngan Pamenas, ngan Nikulaus iaʹ ina ca laki lepoʹ Antiukia, iaʹ lepa nyaliu adet te tai Yahudi.

⁶ Mung nte dina, ida ngkin palaʹ diaʹ lawa Injil dina. Penco diaʹ lawa dina lemameʹ, ngan napoʹ ujoʹ de neng ida.

⁷ Tai libut kuʹo ne denga tiraʹ Allah, ngan nai un pit un pit ne kadoʹ de diaʹ bayaʹ katuk Tuhan kaʹ lepoʹ Yerusalim. Kadoʹ pe ida diaʹ detaʹu nai ngelan bayaʹ Yesus.

Dulu dakep Stipanus

⁸ Un Stipanus, laki iaʹ sangan kuʹun peniga Allah ngan penyukat. Ia uyan puyan nyingan iaʹ bioʹ ngan tedanaʹ bulen neng ahang lepoʹ ina.

⁹ Naʹ pe ia pekina, un pe diaʹ nai beteʹ pesakat ngan Stipanus. Ida dina cen mpun kelunan Ulaʹ diaʹ Takau. Un pe palai Yahudi lepoʹ Kirini, un pe palai lepoʹ Alik-sandaria, un pe Yahudi diaʹ ca cen tanaʹ Kilikia ngan tanaʹ Asia, nai re ke ti ngan Stipanus.

¹⁰ Un Stipanus ina, Berua Tuhan iaʹ naʹ tudi penisen mia, ina ukoʹ de supeʹ nyakat ia.

¹¹ Penco re peseket naʹ ligit penyeluk me dulu, cuk ida pisiu pekini dau: “Lepa ne ameʹ kenahan dau ue badaʹ tiraʹ iaʹ ngejaʹat dau neng Musa ngan Allah.”

¹² Ngan puyan iaʹ pekini ida pebingaʹ dulu, ngan diaʹ lataʹ, ngan diaʹ guru Katuk Adet Musa, penco re nyudup Stipanus, meseng ia, penco re ngkin ia palaʹ Mpun diaʹ Lataʹ dina.

¹³ Kun nte cuk kudaʹ usa diaʹ lemalo nugen kidi, diaʹ kuma ha: “Laki ini abeʹ e pekenaʹ pisiu tiraʹ iaʹ ngejaʹat dau neng Umaʹ Palan iaʹ buheʹ ini, pekina pe neng Katuk Adet Musa.

¹⁴ Moʹ lepa ne ameʹ kenahan dau Stipanus kuma ban Yesus lepoʹ Nasarit ina, ia ke pemapeʹ Umaʹ Palan ini, ngan ke nyaliu adet iaʹ Musa lepa naʹ palaʹ ilu.”

¹⁵ Ketoʹ de diaʹ madung neng Mpun diaʹ Lataʹ dina nekeneng naʹat Stipanus. Un seʹ silung Stipanus, ida taʹan menyerema koʹ seʹ silung melikat ne seʹ e.