PEMUYAN 28 - Kenyah New Testament

Kaʹ Malta

¹ Uʹo meʹ pejakaʹ ngan tiga, ina le ameʹ tisen ban ngadan tanaʹ ina are, tanaʹ Malta.

² Un nte lepoʹ ina lesau laleʹ seʹ de neng ameʹ. Kun nte put luten katan le, ngan mengin ameʹ mung mentu, moʹ meʹ jiwen ngan sihoʹ ujan pe.

³ Tai kun Paulus pabung alaʹ ca mpun angau. Dalau ue ke mahung nge neng mpau luten ina, belekaʹ kenai ca ncung ulai kelap cen idi moʹ o pana, penco ho nekuleng ngan nuduk ujoʹ Paulus.

⁴ Dalau lepoʹ ina taʹan ncung ulai ina ngediding neng ujoʹ o, un dau re pisiu neng ida selepeʹ: “Atek laki ini ban lematai kelunan. Naʹ pe ia ban pesau cen taru kaʹ banget, un Bali Teneng abeʹ e pedayo ia ke mudip laʹa.”

⁵ Di ie un Paulus, abeʹ un seʹ sakit te neng ia. Kun ne nekiwet ncung ulai ina, pet ia kaʹ luten.

⁶ Un tekaʹ dulu ngihoʹ atek kenai bahaʹ ʹo. Buk ke abeʹ un pekina, abeʹ e majan laʹa masaʹ a tai pengkup ngan matai. Majan ne ida pekena diseʹ e, abeʹ pe ida taʹan ca inu jaʹat diseʹ neng ia. Tai pekaliu pe tekaʹ kimet de laʹa. Un dau re: “Atek ca bali ne ini.”

⁷ Nyeng kina kadoʹ uma anun Pubelius, tuʹa bioʹ de kaʹ tanaʹ ina. Kun ne alaʹ ameʹ ngan selama, penco lemakan ameʹ ngan lebang seʹ e dalem telu tau majan ne petubo ameʹ.

⁸ Un amai ie meken moʹ o dadem, ngan sakit batek pekaliu. Tai kun Paulus kaʹ amin amai Pubelius ne, penco lemameʹ ngan napo ujoʹ o neng ia, paget ia.

⁹ Lepa puyan ina, mung diaʹ ca diaʹ sakit kaʹ tanaʹ ina, nai re pelaʹa, kun Paulus paget ida.

¹⁰ Kun nte nyelama ameʹ, kadoʹ pencai re. Dalau ke ketai meʹ ubaʹ ke mecin, kun nte naʹ mameʹ inu inu iaʹ ke tenup meʹ neng asat meʹ.

Cen Malta pa abeʹ kaʹ Rum

¹¹ Uʹo telu bulan majan meʹ kina, tai meʹ puke neng ca kapen iaʹ cen lepoʹ Alik-sandaria, iaʹ un uyat ngadan ne “Bali Pepit”, iaʹ bang peleting ne ia ngajan ne sengim kaʹ tanaʹ ina.

¹² Tai kun meʹ abeʹ kaʹ Sirakusa, ngelineʹ meʹ kina telu tau majan ne.

¹³ Cen ina, lakung ketai asat meʹ kaʹ lepoʹ Regium. Neng kenempam me, tai meʹ tugung ca bahiu cen tahaʹ kabing asat tau. Neng kedua tau ue, abeʹ ne ameʹ kaʹ lepoʹ Putiuli.

¹⁴ Kaʹ ina meʹ petegoʹ ngan palai diaʹ ngelan Tuhan. Ida iaʹ cuk ameʹ ngelineʹ tujoʹ tau majan meʹ pemung ngan nte. Uʹo ina le tai meʹ kaʹ lepoʹ Rum.

¹⁵ Moʹ diaʹ cenganak meʹ dalem Tuhan dina kenahan dau denga meʹ nai, kenai re kaʹ pasen Apius, ngan nai pe palai laʹa kaʹ lepoʹ iaʹ ngadan ne Telu re Kedai. Kun nte petegoʹ ngan meʹ kaʹ ina. Dalau Paulus taʹan ida, penco ho nyuaʹ tiga saheʹ palaʹ Allah, mentung nge ngepali tekaʹ penawai ie laʹa.

Kaʹ lepoʹ Rum

¹⁶ Uʹo meʹ abeʹ kaʹ lepoʹ Rum, kun nte mahung Paulus, pemung ngan ca usa sedadu iaʹ jagaʹ ia, ngelineʹ neng ca amin tengen le.

¹⁷ Lepa ketelu tau ue, kun Paulus mengin mung diaʹ lataʹ Yahudi iaʹ un neng lepoʹ ina, nai pempun. Uʹo kenai re pempun, un dau ue neng ida: “Ahaʹ cenganak keʹ mung, naʹ pe akeʹ abeʹ un uyan ca inu iaʹ jaʹat neng lepoʹ le, pekina pe neng adet tepun le, un sepuʹo dulu nyepin nceʹ kaʹ Yerusalim, sulo re mahung akeʹ me lepoʹ Rum.

¹⁸ Kun lepoʹ Rum dina lemutu akeʹ, penco re ubaʹ ke nakau akeʹ, moʹ abeʹ un iaʹ ukoʹ keʹ tekep ke sihoʹ ukum patai, baʹan nte.

¹⁹ Un ʹo, moʹ lepoʹ Yahudi pali nyekang dau isiu ini, ina ukoʹ keʹ naten nyat ke pebetep pe kata Kaisar pelaʹa. Abeʹ e seʹ ban nceʹ pekabi lepoʹ keʹ ne.

²⁰ Puʹun nceʹ mengin ikem kini, moʹ keʹ ubaʹ ke taʹan ikem, ngan ke pisiu ngan ncem. Tuman nceʹ sihoʹ beka ampit malat ini ban kuʹun tebelum lepoʹ le Israil neng Laki iaʹ Keniga ilu.”

²¹ Un dau re neng Paulus: “Abeʹ meʹ alaʹ surat pe cen tanaʹ Yudia neng puyan ncoʹ. Pekina pe neng ahang mung cenganak le diaʹ ban nai cen ina, abeʹ un denga iaʹ jaʹat neng puyan ncoʹ.

²² Inu pia, ubaʹ meʹ ke ngeringa dau hoʹ, kumpin tekaʹ penisen ncoʹ. Bang tisen meʹ dau dulu kempi kempi badaʹ dau uban salaʹ puyan utun adet iaʹ ikoʹ kanan ini.”

²³ Ina ukoʹ de nengangan uyan tebuku ngan Paulus, tau re kenai pempun kata ia. Kadoʹ kenai lepoʹ Yahudi neng tau idi. Cen mempam pa ketai ie tahup, Paulus nyituk badaʹ dau katuk ke mida neng puyan pengaren Allah ngaren ilu kelunan. Kun ne badaʹ cen Kitap Katuk Adet Musa, pekina pelaʹa cen Kitap diaʹ Pegawa. Man dina ha ten ke payo ida ke ngelan neng Yesus.

²⁴ Un te palai mida kina diaʹ ngelan dau tiraʹ a. Un pe palai diaʹ abeʹ un ubaʹ ke ngelan.

²⁵ Pekina ne diseʹ ketai re ke uleʹ nuʹo. Un selepeʹ dau neng ahang ida ban kuʹun ca jo tiraʹ Paulus iaʹ pekini dau: “Ban atek lan koʹ baʹan dau tiraʹ Berua Buheʹ man isiu pegawa Yesaya palaʹ diaʹ tepun le are, iaʹ kuma ha:

²⁶ ‘Tai ne ikoʹ palaʹ lepoʹ ini ngan pisiu ida, kun ncoʹ: Ikem ke ngeringa ngan ke kenahan, di le ʹo abeʹ kem ke tisen. Man mata hem ikem ke naʹat, un ʹo abeʹ kem ke taʹan.

²⁷ Moʹ lepoʹ ini lemalo uran diseʹ penawai re, moʹ de ngepuʹung meseng telinga re, ngan nengangan mekep mata re. Buk ke abeʹ un pekina, masaʹ mata re taʹan, ngan masaʹ telinga re ke kenahan puʹo, ngan masaʹ penawai re ke tisen pe, ngan masaʹ de ke nesen ngan nyepuleʹ kimet de nai palaʹ akeʹ, kun dau Allah, kun nceʹ ke paget ida nuʹo.’ ”

²⁸ Un dau Paulus pelaʹa: “Ina ukoʹ awaʹ pe ikem tisen dau Allah cuk ilu ketai ngkin tiraʹ a, iaʹ badaʹ puyan ne iaʹ ke pudip kelunan, ngkin ne palaʹ dulu diaʹ tahaʹ awang Yahudi. Ida ne iaʹ ke ngeringa ha nuʹo.” [

²⁹ Lepa ha badaʹ pekina dau, tai uleʹ ne lepoʹ Yahudi dina mung, mentung nte paseʹ ngan pekenca neng ahang ida loʹ te.]

³⁰ Un Pualus ngelineʹ neng ca amin pa sukung dua uman. Ia tengen le naʹ bang nge mia iaʹ un amin ina. Ngan selama ha pejakaʹ mung dulu diaʹ nai menoʹ ia.

³¹ Kun ne badaʹ denga neng puyan pengaren Allah ngaren ilu kelunan, ngan badaʹ katuk neng Tuhan Yesus Keristus. Kun ne pisiu ngan tempa dau ue, ngan abeʹ un aheʹ iaʹ penceng ia. 109