PEMUYAN 25 - Kenyah New Testament

Paulus nyat betep pe cen Kaisar, laja bioʹ

¹ Telu tau uʹo kenai Pistus abeʹ kaʹ dale ina, tai ie puke cen Kaisaria, penco tai pukat kaʹ Yerusalim.

² Un diaʹ detaʹu lataʹ, ngan diaʹ paren lepoʹ Yahudi dina, kun nte badaʹ mung penyalaʹ Paulus me Pistus.

³ Kun nte nyat lesau neng Pistus apan ne cuk Paulus tai kaʹ Yerusalim, moʹ lepa ne ida peseket ke mabang ia kaʹ janan, ubaʹ ke lematai ia.

⁴ Un dau Pistus mipa ida: “Moʹ caʹ peput lepe Paulus neng sepin kaʹ Kaisaria, ngan abeʹ e majan laʹa ketai heʹ uleʹ kaʹ Kaisaria ʹo.

⁵ Buk pekina, tiga palai mikem diaʹ ngkang penyukat dalem lepoʹ nai kaʹ Kaisaria serengan akeʹ ʹo. Kina hem ke mekem salaʹ neng ia, buk un inu iaʹ jaʹat ban ia ti.”

⁶ Dalau Pistus ngelineʹ pemung ngan nte kina, masaʹ aya tau buk are puloʹ tau majan ne, uʹo ina tai ie puno kaʹ Kaisaria. Uʹo ho abeʹ, neng kenempam me, madung ne ia neng amin kelayan ukoʹ de pebetep tiraʹ, penco ho cuk dulu nai ngkin Paulus kata ia.

⁷ Uʹo kenai Paulus abeʹ, un lepoʹ Yahudi diaʹ ban nai puno cen Yerusalim dina are, muʹo re nekejeng teliling ia ne. Kun nte badaʹ kadoʹ penyalaʹ a diaʹ bioʹ, iaʹ abeʹ de mencam ke nugen badaʹ a lan puʹo.

⁸ Un dau Paulus mipa kuma: “Nyahut un penyalaʹ keʹ neng adet lepoʹ Yahudi, pekina pe neng Umaʹ Palan Allah, pekina pe neng Kaisar laja lepoʹ Rum.”

⁹ Moʹ Pistus ubaʹ ke pebioʹ saheʹ lepoʹ Yahudi, ina ukoʹ o mipa Paulus pekina dau ue: “Ubaʹ koʹ ketai kusun kaʹ Yerusalim tupe? Kina te akeʹ ke pebetep mung puyan tiraʹ koʹ ini ʹo.”

¹⁰ Un dau Paulus: “Akeʹ ne nekejeng neng amin kelayan kukoʹ diaʹ ngkang perinta Kaisar pebetep tiraʹ. Kini hoʹ tekep ke pebetep pe makeʹ. Abeʹ un penyalaʹ keʹ neng lepoʹ Yahudi. Ikem amai, tisen te ikem kidi.

¹¹ Buk keʹ ngesa adet lepoʹ ngan un penyalaʹ iaʹ tekep ukoʹ keʹ ke sihoʹ ukum patai, abeʹ keʹ ke nyat pesau pe. Buk ke nyahut un diaʹ lan ne neng dau re mekem penyalaʹ makeʹ, abeʹ un ca usa ia senteng ke naʹ akeʹ mida. Akeʹ nyat Kaisar ke pebetep pe makeʹ.”

¹² Uʹo ina Pistus nyelem lemutu neng diaʹ ngkang tiraʹ ngan ne kina. Sulo dau Pistus neng Paulus: “Ini hoʹ nyat tai palaʹ Kaisar, palaʹ Kaisar ne ketai hoʹ ʹo.”

Tai Paulus kata Ageripa ngan Berniki

¹³ Abeʹ e majan uʹo ina, nai ne Laja Ageripa ngan sadin ne Berniki, ca leto, nyabeʹ kaʹ Kaisaria ubaʹ nyelama kenai Pistus.

¹⁴ Ngajan ne dua ngelineʹ un kudaʹ kudaʹ tau pe ida kina, kun Pistus peluhaʹ puyan tiraʹ Paulus me laja ina. Un dau ue: “Un ca laki dalem sepin kini iaʹ caʹ peput kuʹun Pilik.

¹⁵ Dalau heʹ kaʹ Yerusalim un diaʹ detaʹu lataʹ pemung ngan diaʹ lataʹ lepoʹ Yahudi nai re badaʹ Paulus kadoʹ penyalaʹ makeʹ, mentung nte nyat akeʹ ke pelaboʹ ukum neng ia.

¹⁶ Un dau heʹ neng ida: ‘Abeʹ un adet lepoʹ Rum ke ngukum ca usa iaʹ dulu naʹ salaʹ, buk abeʹ lepe iaʹ dulu naʹ salaʹ ina tai petugen ne ngan iaʹ pet salaʹ mia, ngan ilu naʹ lete ca pengebiʹen mia ading apan ne mipa dulu diaʹ naʹ ia salaʹ.’

¹⁷ Uʹo kenai diaʹ lataʹ Yahudi dina abeʹ kini, busek ne akeʹ ke peteneng nge ʹo. Neng kenempam me, penco tai heʹ kaʹ amin kelayan kukoʹ ke pebetep tiraʹ. Kun nceʹ mengin Paulus nai kata akeʹ.

¹⁸ Nai nekejeng ne ida diaʹ badaʹ Paulus un salaʹ ina, di lareʹ abeʹ un ca penyalaʹ iaʹ bioʹ koʹ baʹan kaʹ keʹ ke ngihoʹ are.

¹⁹ Bang iaʹ ukoʹ de ban pesakat ngan Paulus neng palai adet de tengen, laʹa neng ca kelunan ngadan ne Yesus, iaʹ ban matai ina, iaʹ numpak nai mudip, baʹan dau Paulus.

²⁰ Moʹ supeʹ ne tekaʹ keʹ pekimet ke nugen puyan ini, kun nceʹ lemutu Paulus buk ke ubaʹ ketai kaʹ Yerusalim, pebetep puyan ini kina.

²¹ Kun Paulus nyat ketai pebetep pe kata Kaisar, petem me peput lepe ia. Kun nceʹ cuk ida meput ia pa heʹ ke cuk dulu tai matet ia palaʹ Kaisar.”

²² Un dau Ageripa neng Pistus: “Akeʹ tengen pe ubaʹ ke ngeringa dau laki ina.” Un dau Pistus: “Nempam ʹo senteng te amai ngeringa dau ue.”

²³ Neng kenempam me, kenai Ageripa re dua Berniki peging ngan gelam paren nte iaʹ maren seʹ, kenai re kaʹ amin gebenur ina, peging ngan diaʹ tuʹa sedadu, ngan diaʹ paren lepoʹ Kaisaria ne. Kun Pistus cuk dulu ngkin Paulus kedalem, tai nyeripa ida.

²⁴ Penco dau Pistus: “Ahaʹ Laja Ageripa, ngan mung diaʹ pempun kini, laki iaʹ ikem taʹan ini, kadoʹ penyalaʹ a baʹan dau lepoʹ Yahudi kaʹ Yerusalim, ngan diaʹ kini pe dau re badaʹ a makeʹ. Kun nte ngelengap badaʹ abeʹ e tekep ke mudip laʹa, baʹan dau re.

²⁵ Un tekaʹ penaʹat ceʹ, abeʹ un ca inu ukoʹ o tekep ke sihoʹ ukum patai. Ia tengen pe nyat ketai pebetep pe kata Laja Kaisar, ina ukoʹ keʹ teto tekaʹ ke cuk ia tai.

²⁶ Di ie abeʹ keʹ tisen inu iaʹ akeʹ ke nyurat palaʹ laki paren bioʹ ina. Ina ukoʹ keʹ ngkin ia palaʹ ikem pat mung, ading nge palaʹ ikoʹ amai Ageripa, apan buk ke tai tugen puyan ini, senteng te akeʹ ke nyurat ca luʹung tiraʹ ʹo.

²⁷ Moʹ tekaʹ kimet ceʹ, abeʹ e teneng buk le tai ngkin ca usa palaʹ Kaisar petem abeʹ le badaʹ penyalaʹ a.”