PEMUYAN 24 - Kenyah New Testament

Lepoʹ Yahudi mekem salaʹ me Paulus

¹ Lema tau uʹo ina, kenai Ananias Pengebioʹ Detaʹu ina, puno kaʹ lepoʹ Kaisaria ne. Un pe palai diaʹ lataʹ, peging ngan ca laki iaʹ tudi petiraʹ, ngadan ne Tertulus. Kenai re palaʹ gebenur ngan badaʹ dau tiraʹ iaʹ pet salaʹ me Paulus.

² Lepa re mengin Tertulus, ina tading dau ue mekem salaʹ me Paulus, un dau ue: “Ahaʹ amai Pilik iaʹ paren meʹ, ban moʹ koʹ mencam peteneng lepoʹ, ina ukoʹ meʹ majan un saheʹ diseʹ pengudip meʹ, pekina pe kadoʹ naʹan pemuyan tiga iaʹ ban nuyan neng tanaʹ ini.

³ Neng pemuyan pekina iaʹ ameʹ ubaʹ lemuto-uto neng singket lepoʹ le ne. Dalem pemuyan dina bang nyuaʹ tiga saheʹ le ameʹ palaʹ ikoʹ.

⁴ Apan meʹ abeʹ un majan pelelat amai, ameʹ nyat lesau neng amai, ngeringa ne kediʹut de dau tiraʹ meʹ.

⁵ Tisen meʹ laki ini jaʹat, ia ca laki iaʹ ngasing udip lepoʹ Yahudi kempi kempi re un neng usun tanaʹ ini. Ia ne ca tuʹa de dalem adet Nasarani, pebutun adet Yahudi.

⁶ Ban ne ten ke ngebareng Umaʹ Palan Allah, ina ukoʹ meʹ dakep ia. [Seʹ meʹ ubaʹ ke ngukum ia bayaʹ puyan adet meʹ,

⁷ sulo kenai Lisias, mayur sedadu ina, man pengali ie lemencut ia neng ameʹ.

⁸ Penco Lisias cuk mung dia peneti ngan ne nai palaʹ ikoʹ.] Buk amai ke nugen lemutu laki, amai tengen ke tisen cen ia mung puyan ne iaʹ ukoʹ meʹ dini naʹ iaʹ salaʹ.”

⁹ Mung lepoʹ Yahudi dina mayo naʹ salaʹ me Paulus, mentung nte badaʹ me gebenur ban lan lan pekina koʹ baʹan dau Tertulus ne.

Dau Paulus mipa Pilik

¹⁰ Uʹo ina, un gebenur ne pekata man ujoʹ o cuk Paulus pisiu. Penco Paulus mipa kuma ha: “Tisen te akeʹ, amai ca diaʹ pebetep tiraʹ neng lepoʹ ini dalem kudaʹ uman pe ban majan ne, ina ukoʹ keʹ ke nyebelang dau ke mipa ikoʹ.

¹¹ Ke tisen te ikoʹ, moʹ abeʹ e tai lapa puloʹ dua tau cen uʹo heʹ tai pukat kaʹ Yerusalim, tai sebayang.

¹² Abeʹ un lepoʹ Yahudi iaʹ taʹan akeʹ pesakat ngan dulu dalem Umaʹ Palan Allah lepe. Nyahut ceʹ pesakat ngan pekana dulu pe, inu pia kedalem amin sebayang Yahudi, ngan kempi kempi kedalem lepoʹ pe.

¹³ Mpi un ca inu iaʹ ida senteng ke peluhaʹ palaʹ ikoʹ sereket ca tedanaʹ keʹ salaʹ, koʹ baʹan dau nai re badaʹ a mikoʹ pekini are.

¹⁴ Un sepuʹo, ini le akeʹ ke ngahaʹ palaʹ amai: Akeʹ lemameʹ palaʹ Allah, iaʹ Allah tepun meʹ, bayaʹ Janan iaʹ ida badaʹ ca adet pebutun iaʹ abeʹ un teneng, baʹan dau re. Akeʹ ngelan lete mung inu iaʹ ban un dalem Kitap Katuk Adet Musa, ngan mung Kitap Pegawa ne.

¹⁵ Akeʹ nebelum neng Allah koʹ baʹan ida are lete nebelum neng ia, idi ie mung kelunan diaʹ teneng puyan, pekina pe diaʹ jaʹat puyan, mung nte ke nai numpak mudip cen patai re.

¹⁶ Dalem mung puyan ina are, ina nengayet tekaʹ keʹ apan lemuto un dema tekaʹ kimet penawai neng juma Allah, pekina pe neng juma kelunan.”

¹⁷ Sulo dau Paulus laʹa: “Uʹo kudaʹ uman ban majan ceʹ abeʹ un kaʹ lepoʹ Yerusalim, uʹo ina le kenai heʹ ngkin pengencai ligit palaʹ diaʹ anun nceʹ kina, ngan pekina pe akeʹ naʹ pengencai heʹ me Allah.

¹⁸ Dalau ketai kuʹo adet ceʹ ngebuheʹ usa heʹ, nai re diaʹ peneti ngan nceʹ tegoʹ akeʹ dalem Umaʹ Palan Allah, jinan nceʹ naʹ pengencai heʹ me Allah. Abeʹ keʹ pemung ngan mpun dulu dalau ina, abeʹ pia un maho dau dulu.

¹⁹ Un dalem Umaʹ Palan Allah ne, kediʹut de le lepoʹ Yahudi cen tanaʹ Asia. Ida diaʹ tekep ke un kini nyeripa amai gebenur, badaʹ penyalaʹ keʹ, buk ke un ukoʹ de ke mekem penyalaʹ makeʹ.

²⁰ Naʹ pe dulu cen Asia dina abeʹ un, tiga pe ida dini tengen badaʹ inu ban salaʹ iaʹ akeʹ ti, iaʹ ida ban tisen dalau Mpun diaʹ Lataʹ didai nesek akeʹ are.

²¹ Bang ca tiraʹ ini le iaʹ akeʹ ngelengap dalau heʹ nekejeng kata ida dalau idai are, iaʹ pekini dau heʹ: ‘Ikem mekem salaʹ makeʹ tau ini moʹ keʹ ngelan ban kelunan matai ke numpak nai mudip.’ ”

²² Un Pilik ne atek tisen lan ne neng Janan Udip Keristin. Ia pelepa tiraʹ ina me dulu kina, pekini dau ue: “Buk Lisias, mayur sedadu ina, nai puno kini ca liwai ʹo, ina le akeʹ ke pebetep puyan tiraʹ keʹ ini ʹo.”

²³ Kun Pilik cuk diaʹ kaptin sedadu ina jagaʹ Paulus kedalem amin sepin neng iaʹ nyiʹan. Abeʹ de mulen diaʹ cenganak ke nai nubo ia.

Dau Paulus mipa Pilik ngan Derusila

²⁴ Abeʹ e majan uʹo ina, kenai Pilik ngkin leto ho Derusila, ca lepoʹ Yahudi, nai naʹat Paulus. Sulo Pilik cuk ida tai mengin Paulus, ubaʹ ke ngeringa dau puyan pengelan neng Keristus Yesus.

²⁵ Dalau Paulus badaʹ neng puyan peneneng, ngan puyan mulen pengubaʹ usa, ngan neng Tau Ukum iaʹ ke nai uʹo, tai takut ne Pilik, un dau ue: “Sukat ne ina Paulus. Naʹkini tai ne ikoʹ uleʹ kaʹ amin sepin te laʹa. Buk un biʹen le laʹa, akeʹ mengin te ikoʹ ʹo.”

²⁶ Moʹ Pilik nebelum Paulus ke naʹ ligit mia, ina ukoʹ o lemuto cuk Paulus nai pisiu ngan ne.

²⁷ Dua uman uʹo ina, sulo Parkius Pistus nyaliu Pilik neng gayeng. Uban Pilik ubaʹ ke alaʹ tawai lepoʹ Yahudi, ina ukoʹ o caʹ meput Paulus dalem amin sepin.