PEMUYAN 22 - Kenyah New Testament

¹ “Ahaʹ pui, amai, ngan cenganak, ngan tepat mung, ngeringa hem dau heʹ ke mipa ikem ading.”

² Dalau re kenahan dau Paulus pisiu neng isiu Iberani, belinga kuʹo ke ida. Un dau ue:

³ “Akeʹ ne ca lepoʹ Yahudi iaʹ ban pempet kaʹ lepoʹ Tarsus kaʹ tanaʹ Kelikia. Nai heʹ kaʹ lepoʹ Yerusalim ini pekalai neng Gamalil iaʹ guru heʹ. Lepa ne akeʹ alaʹ katuk iaʹ telit bayaʹ adet tepun le. Sanget ngan temek pe akeʹ lemameʹ palaʹ Allah, koʹ baʹan seʹ kem mung tau ini are.

⁴ Akeʹ nyakit pe dulu diaʹ bayaʹ Janan Yesus ne pa palai matai. Ngan tai pe akeʹ dakep laki, pekina pe leto, penco meput ida kedalem amin sepin.

⁵ Un Pengebioʹ Detaʹu, ia iaʹ atek tugen neng puyan nceʹ, peging ngan mung Mpun diaʹ Lataʹ. Cen ida pe akeʹ alaʹ surat iaʹ ida ke naʹ katu me diaʹ cenganak Yahudi kaʹ lepoʹ Damsik te. Penco tai heʹ kaʹ lepoʹ ina, ubaʹ ketai dakep ngan lemeka ida diaʹ kina, sulo ke ngkin ida kaʹ Yerusalim, moʹ ke ngukum ida.”

Paulus badaʹ ban pekaliu penawai ie

⁶ “Un iaʹ nuyan dalau ketai pengaset ceʹ nyeng ka lepoʹ Damsik, masaʹ dalau beluaʹ tau, belekaʹ kenai ca dema bioʹ nyerutang cen langit, sihoʹ ngan teliling akeʹ.

⁷ Penco heʹ pengkup kaʹ tanaʹ, mentung ngkeʹ kenahan dau ca isiu iaʹ kuma ha neng akeʹ: ‘Saul, Saul, moʹ inu hoʹ nyakti akeʹ tupe?’

⁸ Un dau heʹ mipa: ‘Aheʹ koʹ tupe, Tuhan?’ Un dau ue neng akeʹ: ‘Akeʹ Yesus lepoʹ Nasarit iaʹ ikoʹ nyakit ini.’

⁹ Lan ne mung dulu diaʹ pemung ngan nceʹ dina, ida taʹan dema ina, un sepuʹo abeʹ de kenahan dau tiraʹ iaʹ pisiu ngan nceʹ idi.

¹⁰ Un dau heʹ: ‘Ahaʹ Tuhan, inu iaʹ tekep ke puyan nceʹ tupe?’ Un dau Tuhan neng akeʹ: ‘Beteʹ ne ikoʹ. Tai ne kaʹ lepoʹ Damsik. Kina heʹ ke badaʹ mikoʹ mung naʹan puyan iaʹ Allah ban peteneng utung ikoʹ.’

¹¹ Dalau ina, butaʹ ne akeʹ kuʹun pengekatan seʹ serema ina are. Un nte diaʹ tugung akeʹ, ida iaʹ ajak akeʹ, sulo ketai meʹ kaʹ lepoʹ Damsik.

¹² “Un ca laki ngadan ne Ananias, iaʹ sanget lemameʹ palaʹ Allah, ngan tudep bayaʹ Katuk Adet le. Mung lepoʹ Yahudi diaʹ mudip kaʹ lepoʹ Damsik pada Ananias ne.

¹³ Kenai ie palaʹ akeʹ, kun dau ue: ‘Cenganak keʹ Saul, naʹat coʹ ading.’ Belekaʹ dalau ina te akeʹ taʹan. Kun nceʹ naʹat ia.

¹⁴ Un dau Ananias pelaʹa: ‘Un Allah le ne, ia lete Allah tepun le, ia ban lemileʹ ikoʹ, ke cuk ikoʹ ke ngetisen ban pengubaʹ kimet te, ngan ke taʹan Yesus ulaʹ a iaʹ atek teneng, ngan ikoʹ ke ngeringa dau isiu ue.

¹⁵ Moʹ ikoʹ iaʹ ke badaʹ tugen neng Allah. Ikoʹ lete ke badaʹ mung puyan iaʹ ikoʹ ban taʹan ngan kenahan me dulu mung ʹo.

¹⁶ Naʹkini, inu ikoʹ pekena laʹa? Beteʹ ne, tai ne sihoʹ ngebatis te, ngan lemameʹ palaʹ Yesus apan ne sau penyalaʹ koʹ.’ Pekina dau Ananias neng akeʹ.”

Paulus ia sihoʹ pengin ke tai badaʹ Denga Injil

¹⁷ Sulo dau Paulus laʹa: “Tai kun nceʹ uleʹ cen lepoʹ Damsik kaʹ Yerusalim nuʹo. Un puyan nceʹ dalau heʹ lemameʹ dalem Umaʹ Palan Allah, tai pekaliu taʹat ceʹ.

¹⁸ Kun nceʹ taʹan Tuhan nai pisiu ngan nceʹ: ‘Sangkit coʹ, tai ne ikoʹ nyelarai mecin lepoʹ Yerusalim ne, moʹ abeʹ dulu kina ke ngelan dau tugen katuk koʹ iaʹ penco dau heʹ puʹo,’ kun dau Tuhan makeʹ.

¹⁹ Un dau heʹ: ‘Ahaʹ Tuhan, ida tengen iaʹ tisen akeʹ ban tai kaʹ amin sebayang Yahudi, ke meput ngan lemeta ida diaʹ ngelan ikoʹ.

²⁰ Un pelaʹa dalau dulu lematai Stipanus iaʹ badaʹ tugen neng ikoʹ are, un pe akeʹ kaʹ ina. Akeʹ ngahaʹ dulu lematai ia, ngan akeʹ ia mengau sapai kelunan diaʹ lematai ia.’

²¹ Un dau Tuhan neng akeʹ: ‘Tai ne, moʹ akeʹ iaʹ cuk ikoʹ tai kaʹ coʹ palaʹ kelunan diaʹ tahaʹ awang Yahudi.’ ”

²² Bang pa dau isiu ina le dulu dina ngeringa dau Paulus. Penco re ngelengap-lengap, kun dau re: “Pet ne laki ini. Lematai ne ia. Abeʹ e tekep ke mudip laʹa.”

²³ Mentung nte lemikaʹ ida ngedirep inu re, ngan ukau abu kempau.

²⁴ Penco mayur ina cuk sedadu ue tai ngkin Paulus kaʹ amin sedadu dina. Kun ne cuk sedadu ue ke lemeta Paulus, apan nte tisen inu tuman dulu ngelengap pekina dau neng ia.

²⁵ Dalau re ke ngaput ia man tali anit kena re ke lemeta ia, un dau Paulus neng kaptin sedadu iaʹ nekejeng dudo ia, kuma ha: “Un ne bayaʹ dau adet buk ke lemeta lepoʹ Rum kena hem ke pebetep tiraʹ iaʹ badaʹ salaʹ a tupe?”

²⁶ Dalau kaptin ina kenahan dau ue pekina, penco tai ie badaʹ a me mayur, kun dau ue: “Kumpin tekaʹ koʹ neng puyan ini amai, moʹ un laki ini ban ca lepoʹ Rum?”

²⁷ Nai kun mayur ina, mentung dau ue neng Paulus: “Badaʹ ne makeʹ, lan ncoʹ ca lepoʹ Rum tupe?” Un dau Paulus: “Lan.”

²⁸ Un dau mayur pelaʹa: “Akeʹ ini lepa lemeli ngadan anak lepoʹ Rum man beli iaʹ bioʹ.” Un dau Paulus laʹa: “Un nceʹ ne, mateng ca anak Rum.”

²⁹ Sulo pera le diseʹ de diaʹ ubaʹ ke nesek Paulus ne tai ngerada ia. Un mayur ina takut pe ia, moʹ o tisen ban Paulus ne ca lepoʹ Rum, moʹ ia iaʹ ban cuk sedadu lemeka Paulus man beka ampit malat ina.

Paulus ngejuma Mpun diaʹ Lataʹ

³⁰ Neng kenempam me, mayur ina ubaʹ ke ngetisen puyan ina ngan lan lan, selu inu ban tuman lepoʹ Yahudi mekem salaʹ me Paulus. Idi ukoʹ o cuk dulu mubai ngan sau beka ampit malat te. Kun ne cuk diaʹ detaʹu lataʹ nai pempun, peging ngan ketoʹ Mpun diaʹ Lataʹ dina. Sulo nai ie ngkin Paulus, cuk ia nekejeng nyeripa ida.