PEMUYAN 15 - Kenyah New Testament

Diaʹ lataʹ petiraʹ kaʹ Yerusalim

¹ Nai palai dulu cen tanaʹ Yudia nyabeʹ kaʹ lepoʹ Antiukia. Pekini dau katuk de neng cenganak dalem Tuhan dina, kun dau re: “Buk kem are sihoʹ sunat bayaʹ Katuk Adet Musa, abeʹ kem senteng ke alaʹ udip iaʹ ke pudip ikem dalem Tuhan ʹo.”

² Nai luhaʹ ne tekajaʹ tiraʹ neng puyan ini. Tai paseʹ ngan pesakat dau re ngan Paulus de dua Barnabas dalau ina. Ina ukoʹ dulu mung tai payo cuk Paulus de dua Barnabas, pemung ngan palai dulu diaʹ cen lepoʹ Antiukia ne, tai kaʹ Yerusalim, tai palaʹ diaʹ lawa Injil ngan diaʹ tuʹa Mpun kina, lemutu neng puyan ina.

³ Pekina Mpun diaʹ ngelan Tuhan cuk ida telu tai puke. Ketai re masat ngalang dale Penisia ngan dale Samaria, mentung nte badaʹ ban dulu diaʹ tahaʹ awang Yahudi lepa pupa kimet de palaʹ Allah. Denga ini iaʹ ngkin bioʹ bangen tawai me mung diaʹ cenganak dalem Tuhan dina.

⁴ Abeʹ ne ida kaʹ Yerusalim, kenai Mpun diaʹ ngelan Tuhan kina, peging diaʹ tuʹa Mpun, ngan diaʹ lawa Injil dina, nyelalang ngan nyelama ida pat. Kun nte badaʹ mung ban pemuyan Allah kanan ida.

⁵ Un palai diaʹ Perisi diaʹ lepa ngelan, nai beteʹ. Un dau re: “Abeʹ senteng are ke nyunat ida dina, ngan cuk ida bayaʹ Katuk Adet Musa.”

⁶ Un diaʹ lawa Injil dina, ngan diaʹ tuʹa Mpun, tai re pempun ke pekimet puyan ina.

⁷ Majan nte pata dau isiu re. Uʹo ina kenai Peterus beteʹ. Un dau ue: “Ahaʹ cenganak keʹ mung, tisen te ikem, cen kena ne Allah lemileʹ akeʹ neng ahang ikem apan nceʹ ke pedenga katuk Injil me dulu diaʹ tahaʹ awang Yahudi, idi re kenahan ngan ngelan ne pe.

⁸ Ban Allah iaʹ tisen kimet kelunan mung. Tugen lan ban Tuhan Allah alaʹ dulu diaʹ tahaʹ awang Yahudi, moʹ o naʹ Berua Buheʹ mida koʹ baʹan ne naʹ milu are.

⁹ Abeʹ Allah nekajaʹ ilu ngan nte. Lepa ne ia muheʹ kimet de moʹ kuʹun pengelan nte.

¹⁰ Buk ke pekina, inu hem ke ten Allah? Seʹ kem ke pebaʹ ca mpin neng likut de diaʹ ngelan Tuhan ne ina. Un tepun le, supeʹ de ke ngempin ne, pekina pe ilu dini.

¹¹ Abeʹ nyatan ne ke pekina. Moʹ le ngelan Tuhan Yesus, penco ho pudip ilu ban kuʹun pengelesau ue iaʹ ia lebang naʹ milu, pekina pe mida.”

¹² Mung nte dina beringa tuaʹ ne ida, sulo re ngeringa dau Barnabas ngan Paulus badaʹ neng mung tedanaʹ bulen ngan puyan nyingan iaʹ ban Allah uyan neng ahang dulu diaʹ tahaʹ awang Yahudi kuʹun nte dua.

¹³ Lepa ne ida dua pisiu ʹo, kun Yakup pisiu pelaʹa. Un dau ue: “Ahaʹ cenganak keʹ mung, ngeringa hem dau heʹ.

¹⁴ Lepa ne Simun Peterus badaʹ kumpin ban tading Allah petubo dulu diaʹ tahaʹ awang neng ilu Yahudi, cen puyan Tuhan Allah ban alaʹ palai mida, nuyan ida diaʹ anun ne tengen.

¹⁵ Un puyan ina pekuaʹ dau ngan tiraʹ diaʹ pegawa Tuhan, koʹ baʹan dau Kitap iaʹ kuma ha:

¹⁶ ‘Uʹo ina, kun dau Tuhan, akeʹ ke nai ngeliwet, ngan numpak uyan amin Daut iaʹ lepa mapeʹ ina, ngan ke peteneng apeʹ e, ngan akeʹ ke medeng nge pelaʹa.

¹⁷ Pekina pe mung kelunan diaʹ ca kenai mita Tuhan. Ina ne mung lepoʹ tahaʹ awang Yahudi diaʹ akeʹ mengin, ketai nuyan diaʹ anun nceʹ tengen.

¹⁸ Pekina dau Tuhan ban badaʹ puyan ina cen naʹaʹ are.’ ”

¹⁹ Sulo dau Yakup pelaʹa: “Pekini tekaʹ kimet ceʹ, ayen pemiat dulu tahaʹ awang Yahudi diaʹ ban nyileʹ palaʹ Tuhan Allah.

²⁰ Bang iaʹ tiga, uyan surat mida iaʹ pekini dau: ‘Ayen tai uman liwa iaʹ dulu mencai me bali, moʹ puyan ina ke ngejameng pengudip le. Ngan ngecoʹ usa hem cen puyan pemung nyelem. Ngan ayen uman pun iaʹ matai ban kalen dahaʹ, pekina pe neng dahaʹ.’

²¹ Moʹ un cen naʹaʹ laleʹ tare, un dulu diaʹ ngalai baca Katuk Adet Musa kedalem amin sebayang Yahudi singket Tau Kelineʹ, ngan un pe diaʹ ban tai badaʹ tiraʹ Musa singket lepoʹ.”

Surat katu me dulu diaʹ tahaʹ awang Yahudi diaʹ ngelan Tuhan

²² Uʹo ina, mung diaʹ lawa Injil ngan diaʹ tuʹa neng Mpun, peging ngan mung Mpun diaʹ ngelan Tuhan ina, pebetep kimet ke lemileʹ palai neng ahang ida dina ngan cuk ida tai kaʹ Antiukia serengan ngan Paulus de dua Barnabas. Kun nte lemileʹ Yudas, iaʹ dulu naʹ Barsabas ina, ngan Silas. Mung diaʹ cenganak dalem Tuhan dina selum nte neng ida dua.

²³ Kun nte naʹ ca surat katu tugung ida, pekini dau ue: “Ameʹ diaʹ lawa Injil, peging ngan diaʹ tuʹa Mpun diaʹ ngelan Tuhan, ameʹ diaʹ cenganak kem ke badaʹ selama tawai meʹ palaʹ diaʹ cenganak meʹ dalem Tuhan neng ahang ikem diaʹ tahaʹ awang lepoʹ Yahudi kaʹ lepoʹ Antiukia, ngan dale Siria, ngan Kilikia.

²⁴ Ameʹ kenahan ban un palai kelunan diaʹ nai cen Mpun meʹ, diaʹ nai ngkin tiraʹ bareng iaʹ ngasing kimet cem. Iaʹ lan ne, abeʹ meʹ cuk ida nai pekina.

²⁵ Ina ukoʹ meʹ pebetep dau, kuaʹ ayo meʹ lemileʹ kudaʹ usa iaʹ ameʹ cuk nai palaʹ ikem, serengan ngan Barnabas de dua Paulus diaʹ ameʹ selum ini.

²⁶ Ida dini diaʹ pueng tekaʹ pelek pengudip de palaʹ Yesus Keristus Tuhan le.

²⁷ Ina ukoʹ meʹ cuk Yudas ngan Silas nai naʹat ikem, apan ida dua ke badaʹ sen surat meʹ ini.

²⁸ Moʹ kuaʹ ayo Berua Buheʹ ngan meʹ, ayen pebaʹ ca mpin neng likut cem iaʹ pelapa bahat, pit bang ini le iaʹ ke tekep,

²⁹ iaʹ pekini dau: Ayen uman penguman iaʹ liwa dulu mencai me bali, ngan ayen uman dahaʹ, pekina pe ayen uman pun iaʹ matai kalen dahaʹ. Ngan pekina pe ngecoʹ usa hem cen pemung nyelem. Buk kem jagaʹ usa hem neng mung naʹan puyan ini, ina le puyan ncem tai teneng ʹo. Nyaheʹ ne ikem.”

³⁰ Sulo re pawang ida diaʹ ngkin surat idai tai puke. Tai re puno kaʹ Antiukia. Kaʹ ina re pempun ketoʹ kadoʹ de diaʹ ngelan Tuhan, kun nte badaʹ surat ina mida.

³¹ Lepa ne ida baca surat ina ʹo, tai bangen ne diseʹ de mung, moʹ kuʹun denga iaʹ petangen kimet de ne.

³² Un Yudas ngan Silas, pegawa Tuhan nte dua. Majan nte pekatuk diaʹ cenganak dalem Tuhan kina, mentung nte dua petangen ngan ngepali pengelan nte.

³³ Kudaʹ majan pe ida ngelineʹ kina, uʹo ina diaʹ cenganak de dalem Tuhan dina pawang ida dua tai uleʹ ngan tiga saheʹ de nuʹo, palaʹ diaʹ ban cuk ida dina. [

³⁴ Un sepuʹo Silas, ubaʹ a ke ngelineʹ kaʹ lepoʹ Antiukia, sulo ho ngelineʹ kina nuʹo.]

³⁵ Paulus ngan Barnabas ngelineʹ pelaʹa kaʹ Antiukia pemung ngan kadoʹ dulu diaʹ ca pe, mentung nte dua pekatuk ngan badaʹ tiraʹ Tuhan.

Petat ne Paulus ngan Barnabas

³⁶ Kudaʹ tau cen uʹo ina laʹa, un dau Paulus neng Barnabas: “Baka, tiga tua tai menoʹ diaʹ cenganak le dalem Tuhan kaʹ singket singket lepoʹ iaʹ kukoʹ ban tua badaʹ tiraʹ Tuhan are. Tai naʹat ida, kumpin seʹ ban puyan nte.”

³⁷ Barnabas pekimet ubaʹ ke ngkin Yaya Markus pemung ngan nte.

³⁸ Di lareʹ abeʹ tekep tekaʹ kimet Paulus ke ngkin ia, moʹ ban lepa ne ia mecin ida dua kaʹ Pampilia ading nte are, ngan abeʹ e petuk ngan nte pa kuʹo gayeng nte are.

³⁹ Pali laleʹ dau re paseʹ, ina ukoʹ de dua tai petat. Barnabas iaʹ ngkin Markus tugung ia, sulo re dua ngedung neng ca kapen iaʹ tai kaʹ Siperus.

⁴⁰ Kun Paulus mengin Silas. Kena re ke puke, un diaʹ cenganak dalem Tuhan dina lemameʹ pelek ida dua palaʹ pengelesau Allah iaʹ ke petubo ida dua.

⁴¹ Sulo tai re dua pa tipo dale Siria ngan kilikia, mentung nte dua petangen singket Mpun diaʹ ngelan Tuhan kina.