PEMUYAN 13 - Kenyah New Testament

Tuhan lemileʹ Barnabas ngan Saul tai lawa ha

¹ Neng Mpun diaʹ ngelan Tuhan kaʹ lepoʹ Antiukia, un pe kudaʹ kadoʹ pegawa Tuhan ngan guru, iaʹ ina Barnabas, ngan Simiun (iaʹ dulu naʹ Saleng), ngan Lukius (lepoʹ Kirini), ngan Menahem (cenganak ca ueʹ ngan Laja Herudis iaʹ ngkang ca tulat neng iaʹ kepat dale ina), ngan Saul.

² Dalau re pat lemameʹ Tuhan ngan lemalan abeʹ un uman, un dau Berua Buheʹ neng ida: “Nengen ne Barnabas ngan Saul makeʹ, idi re tai mejo gayeng ngkeʹ neng iaʹ ukoʹ keʹ mengin ida.”

³ Kun nte lemameʹ Tuhan ngan lemalan abeʹ un uman laʹa, sulo re napo ujoʹ de neng ida dua Saul ngan Barnabas, penco re cuk ida dua tai puke?

Kaʹ tanaʹ Siperus

⁴ Ban Berua Buheʹ iaʹ cuk ida dua, ina ukoʹ de dua tai kaʹ bahi kaʹ lepoʹ Selukia. Cen ina tai re ngedung neng kapen ia tai kaʹ tanaʹ Siperus.

⁵ Dalau re abeʹ kaʹ lepoʹ Salamis, kun nte badaʹ tiraʹ Allah dalem amin sebayang Yahudi. Un Yaya Markus, ia mepo ida dua.

⁶ Dalau ketai re nipo tanaʹ ina, abeʹ ne ida kaʹ lepoʹ Papus. Kun nte petegoʹ ngan ca laki iaʹ mencam pucau, ina ca usa pegawa palo, lepoʹ Yahudi. Un ngadan Yahudi ie Bar-yesus.

⁷ Ia malai ngan Sergius Paulus, laki bioʹ gebenur tanaʹ ina. Ca laki iaʹ mencam pekimet gebenur ina. Ia mengin Barnabas ngan Saul nai palaʹ ia, moʹ o ubaʹ ke kenahan dau tiraʹ Allah.

⁸ Un laki iaʹ mencam pucau ina, Bar-yesus ne, (Ilimas ngadan ne neng isiu Gerika,) ia nyakat Barnabas ngan Saul, moʹ o ubaʹ ke nyalaʹ laki bioʹ gebenur ne tai coʹ neng pengelan ne neng Tuhan.

⁹ Un Saul, iaʹ ilu kuma Paulus ina, sangan ne kuʹun Berua Buheʹ. Kun ne nekeneng naʹat laki pucau ina.

¹⁰ Un dau ue: “E anak Bali Jaʹat, ikoʹ iaʹ sangan kuʹun naʹan naʹan aken pelingu ngan palo. Ikoʹ ne iaʹ atek pebunoʹ neng iaʹ teneng. Lemuto-uto hoʹ ngileng janan Tuhan iaʹ telit ini.

¹¹ Ke sihoʹ koʹ kuʹun ujoʹ Tuhan naʹkini ʹo. Ke butaʹ pe ikoʹ puʹo kuʹun ne. Abeʹ koʹ ke taʹan dema mata tau ceng kajan uʹo.” Tegoʹ ina lete Ilimas tai burau ngan mentem mata ha. Sulo ho jagap-jagap ketai mita dulu ke ajak ia.

¹² Kun laki bioʹ gebenur ina taʹan diseʹ puyan ina, ngelan ne gebenur neng Yesus, mentung nge salam laleʹ tekaʹ a neng katuk Tuhan ne.

Kaʹ lepoʹ Antiukia tanaʹ Pisidia

¹³ Un Paulus ngan ida diaʹ ngan ne kina, ketai re ngedung neng ca kapen iaʹ ketai puke cen Papus, tai kaʹ Perga kaʹ tanaʹ Pampilia. Un Yaya Markus, nai ie mecin ida kina, penco tai ie ngeliwet kaʹ Yerusalim.

¹⁴ Ketai Paulus ngan Barnabas penco masat cen Perga pa abeʹ kaʹ Antiukia kaʹ tanaʹ Pisidia. Sulo ketai re madung kedalem amin sebayang Yahudi tegoʹ Tau Kelineʹ.

¹⁵ Uʹo lepa dulu baca Kitap Katuk Adet Musa ngan Kitap Pegawa Tuhan, kun diaʹ tuʹa neng amin sebayang Yahudi ina cuk ca usa tai kata ida dua, kedau re: “Amai, buk un ca katuk ikem dua ke petangen dau neng lepoʹ ini, badaʹ ne mameʹ.”

¹⁶ Kenai Paulus beteʹ, mentung nge pekata man ujoʹ o, un dau ue: “Ahaʹ mung ngkem cenganak keʹ lepoʹ Israil, ngan mung ngkem diaʹ tunuk neng Allah, ngeringa ne.

¹⁷ Ban Allah, Tuhan lepoʹ Israil ini lepa lemileʹ tepun le, ngan cuk lepoʹ ina nai kapan dalau re mudip kena le kaʹ tanaʹ Masir are. Allah iaʹ ngkin ida nai kawang cen Masir ne man puyan nyingan ne.

¹⁸ Toʹ ban majan nte kihoʹ kihoʹ pat puloʹ uman kaʹ tanaʹ lenga, Allah pedenaʹ tawai ie neng ida.

¹⁹ Allah ia pesalai tujoʹ naʹan lepoʹ kaʹ tanaʹ Kanaan, moʹ o ke naʹ tanaʹ ina me tepun le.

²⁰ Kihoʹ kihoʹ pat ato lema puloʹ uman majan ne ida un tanaʹ ina kena ke un diaʹ pebetep tiraʹ. “Uʹo ina le Allah uyan palai laki pebetep tiraʹ, pa abeʹ kenai udip pegawa Samuil.

²¹ Lepa ina laʹa, ketai tepun le nyat ca paren bioʹ. Kun Allah cuk Saul anak Kis tai paren bioʹ de. Saul ne ca usa mela cen Benyamin. Pat puloʹ uman pengajan ne paren bioʹ

²² Uʹo lepa Tuhan Allah sau Saul, penco ho cuk Daut paren bioʹ mida. Ngan pekini dau Allah badaʹ neng ia: ‘Lepa ne akeʹ tisen Daut anak Isai, ca usa iaʹ sihoʹ neng kimet ceʹ; ia ca laki iaʹ ke bayaʹ mung pengubaʹ keʹ.’

²³ Cen mela Daut ne kenai Yesus, ca usa ia atek ban Allah cuk Keniga Udip lepoʹ Israil, bayaʹ ban dau tuket Allah cen naʹaʹ are.

²⁴ Kena kenai Yesus nading gayeng nge, un Yaya badaʹ tiraʹ me mung lepoʹ Israil, cuk Israil nesen ngan nyepuleʹ kimet de, ngan cuk ida sihoʹ ngebatis.

²⁵ Kena Yaya ke pesukung gayeng nge, un dau ue neng dulu: ‘Ikem kenaʹ aheʹ keʹ tupe? Akeʹ ne, abeʹ akeʹ iaʹ ikem ke mengaʹ kenai idi. Lan dau heʹ, un ca usa iaʹ kenai bayaʹ akeʹ ʹo, di pe ke ngelesoʹ sepatu neng taket te, abeʹ pe akeʹ tekep.’ Pekina dau Yaya.”

²⁶ Sulo dau Paulus laʹa: “Ahaʹ amai, ngan cenganak, tepat diaʹ kini mung, ikem diaʹ su mela Ibrahim, ngan mung ngkem diaʹ ca diaʹ tunuk palaʹ Allah, ban palaʹ tepat mung kenai denga katuk neng puyan iaʹ ke pudip kelunan dalem Tuhan ne.

²⁷ Un dulu diaʹ mudip kaʹ Yerusalim peging ngan diaʹ tuʹa re, abeʹ de tisen Yesus iaʹ Keniga Udip Kelunan, ngan abeʹ de tiesn sen tiraʹ dalem surat pegawa Tuhan iaʹ ida malai baca singket Tau Kelineʹ ne. Kenuen pia pekina, ida palup lete tiraʹ pegawa cen ban pemuyan nte ngukum Yesus ne.

²⁸ Naʹ pia abeʹ un ca tuman ukoʹ de ke lematai Yesus, kun nte nyat neng Pilatus ubaʹ ke lematai ia.

²⁹ Palup ne mung puyan isiu iaʹ un dalem Kitap neng Yesus ne, kuʹun dulu lepoʹ Yerusalim dina. Uʹo ina, kun nte muno patai Yesus cen kayu tecek, naʹ ia kentaʹ, penco re mahung ia kedalem liang.

³⁰ Un sepuʹo Allah pudip ia cen patai ie.

³¹ Kenai ie luhaʹ dalem kudaʹ tau majan ne, kata ida diaʹ serengan ban masat ngan ne cen Galilia tai kaʹ Yerusalim are. Naʹkini ida dina diaʹ ban badaʹ tugen neng Yesus kaʹ lepoʹ Israil.

³² Ameʹ dini iaʹ nai ke pedenga Denga Injil mikem. Ina puyan iaʹ Allah ban petuket ngan tepun le cen naʹa are.

³³ Naʹkini ne Allah lepa palup pe neng ilu diaʹ mela cen tepun le, moʹ o lepa pudip Yesus neng ca udip iaʹ tumpak. Koʹ baʹan ina are lete iaʹ un dalem Kitap Kentau Masmur, tulat kedua iaʹ pekini dau: ‘Ikoʹ lete Anak keʹ. Tegoʹ tau ini akeʹ ne nuyan Amai hoʹ.’

³⁴ Ngan pekini pe dau tiraʹ Allah neng puyan ne ke pudip Yesus cen patai ie, apan ne abeʹ un tai madam. Kun dau ue: ‘Akeʹ ke naʹ te sio ngan peniga iaʹ buheʹ mikoʹ, iaʹ akeʹ lepa petuket ke naʹ me Daut are.’

³⁵ Ina ukoʹ Daut pelaʹa pisiu kedalem ca jo Kitap Kentau Masmur diaʹ ca, kun dau ue: ‘Abeʹ koʹ ke dayo ulaʹ penyelum koʹ ketai madam.’

³⁶ Lepa ne Daut pegayeng bayaʹ pengubaʹ Allah ngajan udip pe, uʹo ina tai ie matai. Tai re masek ia, pedudo ia ngan tepun ne, ngan madam pe ia.

³⁷ Un sepuʹo Laki iaʹ Allah pudip cen patai ina, abeʹ e ke tai madam.”

³⁸ Sulo dau Paulus laʹa: “Ahaʹ cenganak keʹ, tepat mung, tekep kem tisen ban kuʹun Yesus ini kenai katuk iaʹ ke sau penyalaʹ. Ameʹ nai pedenga ha palaʹ ikem.

³⁹ Tai tisen ncem laʹa, mele aheʹ iaʹ ngelan Yesus, atek ke takau te ia cen ketoʹ penyalaʹ a. Moʹ abeʹ Katuk Adet Musa senteng nakau ikem cen penyalaʹ kem.

⁴⁰ Ina ukoʹ petawai tiga le ikem, malap ketai nuyan koʹ baʹan iaʹ lepa un dalem Kitap Pegawa are iaʹ pekini dau:

⁴¹ ‘Pekimet cem ading mung ngkem diaʹ ngetepet, tai hem meba kena hem ketai matai. Un gayeng iaʹ akeʹ pegayeng dalau pengudip kem in, abeʹ pe ikem ubaʹ ke ngelan kidi, naʹ pe dulu ke badaʹ a mikem.’ Pekina dau Kitap Pegawa.”

⁴² Dalau Paulus de dua Barnabas mecin amin sebayang Yahudi dina, un dulu kina nyat ida dua nai pelaʹa tegoʹ Tau Kelineʹ iaʹ bayaʹ ʹo, apan nte dua ke badaʹ katuk neng puyan dini pelaʹa ʹo.

⁴³ Lepa ne mpun ina pasi, kenai kadoʹ lepoʹ Yahudi pemung ngan kadoʹ dulu diaʹ lepa alaʹ adet Yahudi dina, nai re bayaʹ Paulus de dua Barnabas. Kun nte dua penco tiraʹ mida, ngan petangen ida ke tudep dalem pengelesau iaʹ Allah lebang naʹ mida.

⁴⁴ Tegoʹ Tau Kelineʹ iaʹ nai bayaʹ ina are nuʹo, nyeng ke muʹo lepoʹ ina nai pempun ngeringa tiraʹ Tuhan.

⁴⁵ Kun palai lepoʹ Yahudi dina taʹan ban kadoʹ kenai dulu, miʹet laleʹ le ida. Seʹ de nyakat tiraʹ Paulus ngan pejaʹat dau neng ia.

⁴⁶ Un Paulus ngan Barnabas makang kuʹo ke dau re dua pisiu. Kun dau re dua: “Tekep ne ameʹ nekena badaʹ tiraʹ Allah ini mikem. Un sepuʹo ikem nyekang tiraʹ Allah. Dalem puyan ina, seʹ kem ubaʹ ngukum usa hem tengen ne ina. Tepa ne ikem neng udip saheʹ keline iaʹ ngeriman. Ina iaʹ ukoʹ meʹ lepo ikem. Tai kun meʹ palaʹ dulu diaʹ tahaʹ awang Yahudi.

⁴⁷ Ina ban tengangan Tuhan cuk ameʹ, pekini dau ue: ‘Akeʹ naʹ ikem ca dema me dulu diaʹ tahaʹ awang Yahudi, apan ncem tai ngkin puyan iaʹ ke pudip kelunan pa tipo tanaʹ.’ Pekina dau Tuhan.”

⁴⁸ Tai bangen diseʹ dulu diaʹ tahaʹ awang Yahudi, moʹde kenahan dau tiraʹ ina, mentung nte pada katuk Tuhan Allah. Un kudaʹ kadoʹ ne ida nai penco ngelan Tuhan, moʹ de lepa tenup tekaʹ ke alaʹ udip saheʹ kelineʹ iaʹ ngeriman cen Tuhan.

⁴⁹ Un tiraʹ Allah tai denga kuʹo ke pa tipo dale ina.

⁵⁰ Un palai lepoʹ Yahudi pekana neng diaʹ lataʹ lepoʹ ina, peging ngan leto diaʹ paren lepoʹ ina diaʹ sebayang palaʹ Allah dina. Pekina seʹ tading nte ubaʹ ke nyakit Paulus ngan Barnabas, penco re muyung ida dua tai kelap cen lepoʹ de.

⁵¹ Kun nte dua lawa Injil dina nekaʹ abu taket de, uyan ca tedanaʹ neng lepoʹ ina, penco tai re kaʹ lepo Ikunium.

⁵² Toʹ de diaʹ bayaʹ katuk Tuhan kaʹ lepoʹ Antiukia ina sangan kuʹun bangen ngan Berua Buheʹ.