PEMUYAN 10 - Kenyah New Testament

Peterus ngan Kurnilius

¹ Kaʹ lepoʹ Kaisaria un ca laki ngadan ne Kurnilius, ca kaptin sedadu Rum, iaʹ cen mpun sedadu iaʹ dulu naʹ “Mpun Sedadu Italia.”

² Ia ca laki iaʹ temek dalem Katuk Adet Musa, iaʹ tunuk neng Allah, peging ngan mung nte panak dalem amin nte. Lemuto ho lesau lepoʹ Yahudi diaʹ taru murip, ngan lemuto ho lemameʹ palaʹ Allah.

³ Un ca tau ue, kihoʹ kihoʹ jam telu tai tahup, kun ne taʹan dalem penaʹat te ca usa melikat Allah nai palaʹ ia, mentung dau ue neng ia: “Kurnilius.”

⁴ Kun ne nekeneng naʹat melikat ina, mentung takut tekaʹ a. Un dau Kurnilius: “Inu ne tupe?” Un dau melikat ina neng ia: “Mung temameʹ koʹ, lepa ne Allah kenahan dau ue. Ngan pekina pe pengencai hoʹ neng diaʹ taru mudip, Allah iaʹ petawai ikoʹ kidi ʹo.

⁵ Ikoʹ cuk ne dulu tai pelawa naʹkini kaʹ lepoʹ Yupe, cuk ida mengin ca laki ngadan ne Simun, iaʹ ipa ngadan ne Peterus.

⁶ Un te ia pemung ngan amin Simun, iaʹ tukeng ngadeng anit, iaʹ un amin ne nyeng kaʹ sada bahi banget.”

⁷ Lepa melikat ina pisiu, nyahin tai ie abeʹ un ne. Penco Kurnilius mengin dua usa diaʹ ulaʹ amin ne, ngan pit ida dua laʹa, ca sedadu iaʹ temek ngkang Katuk Adet Musa, iaʹ lemuto pubo ia dalem amin ne.

⁸ Kun Kurnilius badaʹ mung puyan melikat ina mida, penco ho cuk ida tai kaʹ Yupe.

⁹ Neng kenempam me, dalau ketai re telu nyeng kaʹ lepoʹ Yupe, tai Peterus kaʹ usun data sapau amin ke lemameʹ Tuhan, kihoʹ kihoʹ dalau beluaʹ tau.

¹⁰ Tai laʹu ne tekaʹ a nuʹo. Ngajan dulu petenup penguman mia, tai pekaliu ne taʹat te.

¹¹ Dalau ina ha taʹan langit tai pesik, penco kenai ca inu kaʹ ntaʹ, koʹ baʹan ca kelihuk keluma iaʹ bioʹ are, nai muno pabeʹ kaʹ tanaʹ, pat de tikung kukoʹ telu ue.

¹² Kedalem kelihuk ina un mung naʹan pun ne, un pe diaʹ nganap, ngan un pe sui, (diaʹ lepoʹ Yahudi lemalan uman).

¹³ Nai ca isiu neng ia, kun dau ue: “Peterus, beteʹ ne ikoʹ, nebek ne, pesak ne, uman nuʹo.”

¹⁴ Un dau Peterus: “Naʹun, abeʹ e pekina Tuhan, moʹ abeʹ keʹ uman inu bareng le buk ke abeʹ un buheʹ.”

¹⁵ Kun dau isiu ina pelaʹa iaʹ kuma ha: “Buk inu iaʹ Allah abeʹ un lemalan, ayen ncoʹ lemalan ne.”

¹⁶ Telu liwai puyan ina koʹ baʹan ina are. Uʹo ina penco ketai inu dina pejung kaʹ langit nuʹo.

¹⁷ Jinan Peterus miat kaʹ ngimet sen inu diaʹ ia taʹan dina are, belekaʹ kenai dulu diaʹ Kurnilius cuk nai didai. Ban lepa ne ida lemutu kempi amin Simun. Kenai re nekejeng kaʹ lung pamen.

¹⁸ Kun nte ngelengap lemutu Simun neng dulu. Un dau re: “Kempi Simun Peterus tupe? Un nai ie nyabeʹ kini mo?”

¹⁹ Dalau Peterus caʹ miat tekaʹ pekimet inu sen penaʹat te are, un dau Berua Tuhan neng ia: “Ina kenai telu usa mita ikoʹ.

²⁰ Beteʹ ne, tai ne ikoʹ kentaʹ. Ayen babak ketai tugung ida, moʹ akeʹ iaʹ uban cuk ida nai.”

²¹ Kenai Peterus kentaʹ, sulo ho pisiu ida dina. Un dau ue: “Akeʹ lete iaʹ ikem mita ini. Inu iaʹ ukeʹ kem ban nai kini ne tupe?”

²² Un dau re: “Un Kurnilius, kaptin sedadu, ia iaʹ cuk ameʹ nai. Kurnilius ne, ia ca laki iaʹ telit lan, iaʹ tunuk palaʹ Tuhan Allah, ngan mung lepoʹ Yahudi pada ia. Ban ca melikat Allah iaʹ cuk ia mengin ikoʹ tai kaʹ amin ne, moʹ o ubaʹ ke ngeringa dau tiraʹ koʹ.”

²³ Kun Peterus mengin ida telu dina nai kedalem, ngan tudo ne ida telu kina. Neng kenempam me, seʹ Peterus pedepa inu ue, tai ie pejahi serengan ida. Un pe kudaʹ usa diaʹ cenganak dalem Tuhan diaʹ cen Yupe tai pejahi ngan nte kina.

²⁴ Neng kenempam me nuʹo, abeʹ ne ida pat kaʹ lepoʹ Kaisaria. Un Kurnilius mengaʹ kenai sabeʹ Peterus te. Lepa ne ia pempun ida panak, ngan diaʹ malai ngan ne.

²⁵ Kena ketai Peterus kedalem amin, nai Kurnilius nyelalang ia, penco pelenyun kata taket te, ngan muʹup palaʹ ia.

²⁶ Kun Peterus cuk ia beteʹ. Un dau ue: “Nekejeng ne ikoʹ. Akeʹ ini ca kelunan lete.”

²⁷ Penco tai re dua kedalem amin, mentung Peterus pisiu ngan ne, ngan taʹan kadoʹ dulu pempun kina.

²⁸ Un dau Peterus neng ida: “Un te ikem tisen Adet Yahudi, abeʹ senteng diaʹ lepoʹ Yahudi tai pekelet ngan dulu diaʹ ca, pekina pe tai menoʹ ida. Lepa ne Tuhan Allah badaʹ makeʹ, ayen lemileʹ kelunan, ngan ayen naʹ dulu jaʹat.

²⁹ Ina iaʹ ukoʹ keʹ abeʹ un babak nai moʹ kem ban mengin akeʹ. Dau heʹ ke lemutu ikem ini: inu iaʹ ukoʹ kem ban mengin akeʹ tupe?”

³⁰ Un dau Kurnilius: “Ini ne kepat tau ue uʹo heʹ lemameʹ Tuhan kaʹ amin nceʹ ne, dalau jam telu tai tahup. Belekaʹ nai ca usa kelunan nekejeng nyeripa akeʹ, ngan to serema seʹ gelam me.

³¹ Un dau ue neng akeʹ: ‘Kurnilius, lepa ne Tuhan Allah kenahan dau temameʹ koʹ, ngan ia petawai ban pengencai hoʹ me diaʹ taru mudip.

³² Ikoʹ cuk ne dulu tai pelawa kaʹ Yupe, mengin Simun iaʹ dulu naʹ Peterus. Un te ia pemung ngan Simun neng amin, iaʹ tukeng ngadeng anit, iaʹ un amin ne nyeng kaʹ sada bahi banget.’ Pekina dau melikat ina.

³³ Dalau ina heʹ cuk dulu nai mengin ikoʹ. Tiga ha puʹo moʹ koʹ ban nai. Ina ukoʹ meʹ mung un pempun naʹkini ngejuma Tuhan Allah, moʹ meʹ ke ngeringa mung tiraʹ iaʹ Tuhan lepa cuk ikoʹ nai badaʹ mameʹ.”

Dau Peterus pisiu

³⁴ Pekini dau Peterus nading tiraʹ a: “Iaʹ lan ne, naʹkini akeʹ tisen abeʹ Allah selepeʹ neng kelunan.

³⁵ Abeʹ pe Allah nyelepeʹ lemileʹ diseʹ neng mung lepoʹ, moʹ ketoʹ dulu diaʹ takut neng Allah, mentung mejo gayeng iaʹ teneng, ubaʹ Allah un kelunan dina.

³⁶ Tisen te ikem, un tiraʹ iaʹ Allah lepa naʹ palaʹ lepoʹ Israil, iaʹ ina Denga Injil, iaʹ pedenga neng puyan udip iaʹ tadan me kelunan kuʹun Yesus Keristus, iaʹ atek Tuʹa kelunan mung.

³⁷ Tisen ne ikem neng puyan iaʹ bioʹ, iaʹ libut ne neng tanaʹ Yudia, tading nge cen Galilia uʹo Yaya badaʹ batis are.

³⁸ Tisen te ikem ban puyan Yesus lepoʹ Nasarit ina, seʹ ban Allah mubeʹ Berua Buheʹ ngan penyukat bioʹ neng ia. Ngan pekina pe tai ie masat kempi kempi uyan tiga, ngan puhat mung dulu diaʹ taru kuʹun Bali Sitan, moʹ Allah un ngan ne.

³⁹ Ameʹ ne diaʹ ban badaʹ tugen neng mung puyan iaʹ Yesus ban uyan kaʹ tanaʹ Yahudi, pekina pe kaʹ Yerusalim. Ia lete iaʹ dulu lematai ngan napek ngediding ia neng kayu tecek.

⁴⁰ Ia lete iaʹ Allah pudip neng ca udip iaʹ tumpak neng ketelu tau ue, ngan cuk ia nai luhaʹ neng taʹat kelunan.

⁴¹ Abeʹ e mung dulu diaʹ taʹan ia, bang ameʹ le diaʹ taʹan ia, moʹ Allah ban lemileʹ ameʹ ketai diaʹ badaʹ tugen neng ia. Ameʹ diaʹ pemung uman ngan nisep ngan ne uʹo Allah pudip ia cen patai are.

⁴² Kun Yesus cuk ameʹ nai badaʹ Denga Injil ina me dulu mung, ngan tugen uban ia iaʹ Allah ban peteneng Pebetep Ukum neng mung kelunan diaʹ mudip, pekina pe diaʹ matai.

⁴³ Un dau isiu mung pegawa cen naʹaʹ diaʹ nugen dau neng Yesus: Aheʹ iaʹ ngelan neng Yesus uʹo, atek ke tisen te ia Yesus sau penyalaʹ a, moʹ kuʹun penyukat ngadan ne.”

Lepoʹ diaʹ tahaʹ awang Yahudi alaʹ Berua Buheʹ

⁴⁴ Dalau dalau Peterus badaʹ tiraʹ ina, nai mesun Berua Buheʹ neng mung nte diaʹ kenahan dau tiraʹ a.

⁴⁵ Un lepoʹ Yahudi diaʹ ngelan Tuhan, diaʹ ban nai tugung Peterus cen Yupe are, tai paʹan ne ida, moʹ Allah mubeʹ Berua Buheʹ ina, ca pengencai ie me diaʹ tahaʹ awang Yahudi.

⁴⁶ Moʹ lepoʹ Yupe dina kenahan dau isiu re iaʹ bulen neng naʹan naʹan isiu, mentung nte pempau Allah neng bioʹ ban puyan ne. Un dau Peterus:

⁴⁷ “Ini ne ida dini alaʹ Berua Buheʹ, koʹ baʹan ameʹ are. Abeʹ un aheʹ senteng ke mulen ida tai sihoʹ ngebatis man sungai laʹa.”

⁴⁸ Kun ne cuk ida tai sihoʹ ngebatis man ngadan Yesus Kristus. Uʹo ina, kun nte mapo Peterus ngelineʹ un kudaʹ tau pe majan ne kina.