MATIUS 15 - Kenyah New Testament

Katuk adet tepun cen naʹaʹ

¹ Dalau ina un palai kelunan Perisi ngan guru Katuk Adet nai palaʹ Yesus cen Yerusalim ngan lemutu ia.

² Un dau re: “Moʹ adeʹ diaʹ bayaʹ katuk koʹ ngesa adet diaʹ lataʹ cen naʹaʹ? Kena re uman abeʹ de muheʹ ujoʹ de bayaʹ ban adet le.”

³ Un dau Yesus mipa ida: “Ngan inu iaʹ adeʹ kem ngesa katuk ukum Tuhan Allah, ngan bayaʹ katuk kem tengen?

⁴ Moʹ un dau Tuhan Allah: ‘Nyelama ne amai ngan ueʹ kem. Ngan aheʹ iaʹ ke pisiu iaʹ jaʹat neng amai ngan ueʹ de, kelunan ina ke sihoʹ ukum patai.’

⁵ Un sepuʹo dau katuk kem kuma ha, buk ke un ca kelunan iaʹ un inu iaʹ tekep ke mepo amai ngan ueʹ, tiga buk ke un dau kelunan ina kuma ha: ‘Ini ca inu iaʹ akeʹ ke mencai palaʹ Allah.’

⁶ Sukat dau ina ke nuyan ca ukan apan ne abeʹ un titin ke nyelama amai ngan ueʹ e, baʹan dau hem. Pekina ne puyan ncem lemasa tiraʹ Allah man katuk adet cem tengen.

⁷ E kelunan ngaloʹ. Atek lan dau pegawa Yesaya badaʹ tebadaʹ Allah neng puyan ncem, pekini dau ue:

⁸ ‘Un dau Allah: Kelunan dini bang man dau paʹ de tuaʹ le ida nyelama akeʹ, un sepuʹo coʹ laleʹ le kimet de neng akeʹ.

⁹ Abeʹ un tuman nte lemameʹ akeʹ, moʹ de pekatuk bayaʹ dau adet kelunan, ngan uyan ne koʹ baʹan katuk ukum cen Tuhan Allah are.’ ”

Puyan inu iaʹ ngano kelunan

¹⁰ Sulo Yesus mengin kelunan kadoʹ dina ngenyeng ia, ngan un dau ue neng ida: “Tiga hem ngeringa ngan ngetisen dau heʹ.

¹¹ Inu iaʹ tai kaʹ dalem paʹ kelunan, abeʹ e ke ngano berua ha. Di lareʹ inu iaʹ ke nai kawang cen paʹ a, ina iaʹ ke ngano ia lan.”

¹² Penco diaʹ bayaʹ katuk ke nai pisiu ngan ne, un dau re: “Un ncoʹ tisen kelunan Perisi dina sakit kimet neng ikoʹ tuman ban isiu hoʹ are?”

¹³ Un dau Yesus mipa ida: “Singket pula diaʹ Amai heʹ kaʹ surga abeʹ un mula, ke pubit ʹo.

¹⁴ Ayen janga neng kelunan dina. Ida diaʹ ajak kelunan butaʹ dina, ida tengen pe butaʹ te. Buk ca usa iaʹ butaʹ ke ajak ca usa iaʹ butaʹ, atek de dua ke tai laboʹ lete kaʹ lubang alo.”

¹⁵ Un dau Peterus: “Badaʹ ne mameʹ sen kata katuk ina are.”

¹⁶ Un dau Yesus mida: “Abeʹ lepe ikem dini mencam neng ʹo kelunan diaʹ ca.

¹⁷ Tisen te ikem kidi tupe? Inu iaʹ tai kaʹ dalem paʹ ca kelunan, penco tai kaʹ dalem batek ke, penco pelapa uʹo ina.

¹⁸ Un sepuʹo inu iaʹ nai kawang cen paʹ kelunan ina, idi lete iaʹ nai cen penawai ie, ngan puyan ini ne iaʹ ke ngano berua kelunan ina.

¹⁹ Ban ne cen penawai ie lete kenai kimet iaʹ jaʹat, iaʹ ina lematai, pemung nyelem, ngan puyan selabu diaʹ ca, ngelau, lemalo, ngan pejaʹat dulu.

²⁰ Puyan diaʹ pekini ne diaʹ ngano berua kelunan. Di lareʹ puyan uman petem abeʹ un muheʹ ujoʹ bayaʹ dau adet de ina, abeʹ e ke ngkin ano me berua ca kelunan.”

Pengelan ca leto

²¹ Tai Yesus mecin cen ina, penco tai kaʹ ca dale nyeng kata lepoʹ Tirus ngan lepoʹ Sidun.

²² Un ca leto lepoʹ Kanaan iaʹ mudip kinaʹ nai palaʹ Yesus mentung nge ngelengap: “Amai heʹ, Anak Daut, kudaʹ koʹ lesau akeʹ ading. Moʹ un bali nelasek anak leto heʹ, ngan ke nyarem laleʹ le seʹe.”

²³ Ca isiu pe Yesus abeʹ un mipa leto ina. Mung diaʹ bayaʹ katuk ke dina nai palaʹ ia, ngan nyat neng ia: “Cuk ne leto ina tai uleʹ. Naʹat ne, lengap lengap ke dau kenai ie bayaʹ ilu.”

²⁴ Sulo dau Yesus mipa leto ina: “Amai heʹ iaʹ cuk akeʹ nai bang palaʹ dumba diaʹ lepa lingu dalem lepoʹ Israil.”

²⁵ Kuʹun isiu ue ini, penco leto ina sutlep neng taket Yesus, un dau ue: “Amai, lesau ne akeʹ ading.”

²⁶ Un dau Yesus mipa ia: “Abeʹ un tekep le alaʹ penguman anak ngan pet te me asu.”

²⁷ “Lan lete ina Amai,” kun dau leto ina, “un sepuʹo asu uman bute kanen, diaʹ nai laboʹ cen bijaʹ laki iaʹ un ia.”

²⁸ Sulo dau Yesus neng ia: “Ikoʹ ca leto iaʹ un bioʹ pengelan. Atek nuyan ne palaʹ ikoʹ kuaʹ puyan pengubaʹ koʹ.” Tegoʹ ina lete nai anak leto ina maget.

Kadoʹ dulu Yesus paget

²⁹ Yesus mecin cen ukoʹ o kina, tai ie masat kaʹ sada bahi leteng Galilia. Tai ie pukat ca mudung, sulo ho madung kidi.

³⁰ Kadoʹ dulu nai ngkin palaʹ ia kelunan diaʹ kejaʹ, ngan diaʹ butaʹ, pekina pe diaʹ apet, ngan diaʹ ameng, ngan kadoʹ pe diaʹ ca diaʹ sakit laʹa. Sulo re mahung kelunan sakit dina kata taket Yesus, ngan penco ho paget ida mung.

³¹ Muʹo tawai ne dulu taʹan diaʹ ameng senteng pisiu, ngan diaʹ apet nai numpak tiga, diaʹ kejaʹ muat masat, ngan pekina pe diaʹ butaʹ nai taʹan. Sulo re pempau Tuhan Allah lepoʹ Israil.

Yesus lemakan pat ibu usa kelunan

³² Kun Yesus mengin diaʹ bayaʹ katuk ke, penco dau ue mida: “Lesau kaʹ keʹ neng kelunan kadoʹ dini, ban ne telu tau ne majan nte ngelineʹ pemung ngan nceʹ, ngan naʹkini muʹo ne penguman nte. Abeʹ keʹ ubaʹ ida ketai uleʹ buk keʹ abeʹ un lemakan ida ading, malap ida ketai lemaʹ kahang janan ʹo.”

³³ Un dau diaʹ bayaʹ katuk ke lemutu ia: “Kempi le ke alaʹ penguman kaʹ tanaʹ lenga ini, iaʹ sukat ke pebeso kelunan kadoʹ dini tupe?”

³⁴ Un dau Yesus neng ida: “Kudaʹ luʹung ruti paun iaʹ un neng ikem tupe?” Un dau re mipa ia: “Bang tujoʹ luʹung le, ngan un kediʹut de atuk dumit.

³⁵ Kun ne cuk kelunan kadoʹ dina madung kaʹ lasan tanaʹ.

³⁶ Sulo ho alaʹ tujoʹ luʹung ruti paun dina, pemung ngan atuk dina. Kun ne nyuaʹ tiga saheʹ e palaʹ Tuhan Allah, sulo ho mepeʹ ruti paun ngan atuk dina, penco naʹ a me diaʹ bayaʹ katuk ke. Kun diaʹ bayaʹ katuk ke patu atuk ngan ruti paun dina are me kelunan kadoʹ dina.

³⁷ Mung kelunan kadoʹ dina uman pa beso tekaʹ de. Lepa ina, sulo tai diaʹ bayaʹ katuk Yesus nemo laʹa ruti paun ngan atuk dina. Un tujoʹ ingen iaʹ sangan kuʹun laʹa ha.

³⁸ Toʹ ban kadoʹ laki diaʹ uman dina, un pat ibu usa, ngan tengen pe cap anak ngan leto.

³⁹ Lepa ina Yesus cuk kelunan kadoʹ dina tai uleʹ. Sulo tai ie ngalut, tai kaʹ dale Magadan.