MARKUS 8 - Kenyah New Testament

Yesus lemakan pat ibu kelunan

¹ Abeʹ majan ʹo ina, nai ca mpun kelunan kadoʹ laʹa. Penguman nte abeʹ un. Dalau ina kun Yesus mengin ida telu diaʹ bayaʹ katuk ke, sulo dau ue neng ida:

² Un penyaheʹ tekaʹ keʹ pekimet seʹ kelunan dini, ban tau ini iaʹ ketulu tau re ngan nceʹ. Naʹkini abeʹ un inu iaʹ ida uman.

³ Buk keʹ cuk ida ketai uleʹ ngan abeʹ un lemakan ida ading, masaʹ de ke metan kahang janan, ban palai mida nai cen coʹ.”

⁴ Un dau re telu diaʹ bayaʹ katuk Yesus lemutu ia: “Ini ca tanaʹ iaʹ lenga. Kempi le ke alaʹ penguman me kelunan dini ʹo?”

⁵ Un dau Yesus lemutu ida: “Kudaʹ luʹung ruti paun iaʹ un neng ikem tupe?” Un dau re mipa ia: “Bang tujoʹ de le laʹa.”

⁶ Sulo Yesus cuk kelunan kadoʹ dina madung kaʹ tanaʹ. Uʹo ina kun ne alaʹ tujoʹ luʹung ruti paun dina are, sulo ho nyuaʹ tiga saheʹ e palaʹ Tuhan Allah, sulo ho mepeʹ ruti dina, ngan naʹ a me diaʹ bayaʹ katuk ke, cuk ida tai patu ue me kelunan kadoʹ dina. Sulo re bayaʹ dau ue.

⁷ Un kediʹut de sihai atuk. Sulo Yesus nyuaʹ tiga saheʹ e laʹa, penco ho cuk diaʹ bayaʹ katuk ke tai patu ue mida pelaʹa.

⁸ Mung kelunan dina uman pa beso. Kihoʹ kihoʹ pat ibu kadoʹ kelunan dina.

⁹ Sulo tai diaʹ bayaʹ katuk Yesus ngkin tujoʹ ingen man nte nemo laʹa penguman dina. Mung ingen dina sangan. Lepa ina Yesus cuk ida tai uleʹ mung.

¹⁰ Penco tai ie kaʹ alut, peging ngan diaʹ bayaʹ katuk ke, ngan penco tai re kaʹ tanaʹ Damanuta.

Diaʹ Perisi nyat tedanaʹ nyingan

¹¹ Un kenai kudaʹ usa Perisi ubaʹ ke nading paseʹ tiraʹ ngan Yesus, moʹ de ubaʹ ngelabak isiu ue. Ida nyat ia uyan ca pemuyan nyingan iaʹ ke nugen ban nyingan ne cen Tuhan Allah.

¹² Kun Yesus ngerahing dalem penawai ie, sulo ho pisiu: “Moʹ adeʹ kelunan ngajan ini ke nyat tedanaʹ nyingan taʹin? Nyahut ceʹ ke naʹ puyan iaʹ tugen pekina ne me kelunan dini.”

¹³ Sulo tai Yesus mecin ida, tai ie ngeliwet kaʹ alut, tai kaʹ dipa leteng ina.

Ala lamut Perisi ngan Herudis

¹⁴ Un diaʹ bayaʹ katuk Yesus dina, abeʹ de petawai ngkin ruti laʹa, bang ca le luʹung ruti iaʹ ida ngkin kaʹ alut.

¹⁵ Kun Yesus pejagaʹ dau mida: “Nawai tiga le ikem. Ayen ncem talu neng ala lamut diaʹ Perisi, ngan ala lamut Herudis.”

¹⁶ Sulo re telu pisiu neng ata re tengen. Un dau re: “Uban telu abeʹ un petawai ban ngkin ruti didai are. Ina ukoʹ o pekina dau.”

¹⁷ Tisen Yesus dau isiu re telu, penco ho lemutu ida: “Moʹ inu hem pisiu puyan ruti iaʹ ikem lingo didai? Inu caʹ tepa penisen ncem tupe? Abeʹ lepe ikem mencam ban pekimet. Moʹ inu caʹ mahing kimet cem tupe?

¹⁸ Mata hem un, abeʹ pe ikem taʹan. Telinga hem un, abeʹ pe ikem kenahan.

¹⁹ Abeʹ kem ban petawai kumpin puyan nceʹ mepeʹ lema luʹung ruti paun me lema ibu kelunan kadoʹ didai mo? Ikem diaʹ nemo laʹa ha. Kudaʹ ingen laʹa ha are tupe?” Un dau re mipa ia: “Puloʹ dua ingen.”

²⁰ Un dau Yesus laʹa: “Dalau heʹ mepeʹ tujoʹ de luʹung ruti me pat ibu kelunan didai are, ikem lete iaʹ nemo laʹa ha. Kudaʹ ingen laʹa ha are tupe?” Un dau re mipa ia: “Tujoʹ de.”

²¹ Kun Yesus lemutu ida laʹa: “Kumpin ncem naʹkini. Abeʹ lepe ikem tisen ban pekimet mo?”

Yesus paget ca kelunan butaʹ kaʹ lepoʹ Bit-saida

²² Tai sabeʹ de telu kaʹ lepoʹ Bit-saida. Kina dulu nai ngkin ca laki iaʹ butaʹ palaʹ Yesus. Ngelapen dau re nyat ia napen ujoʹ o neng laki ina.

²³ Sulo Yesus ajak ngkin ia tai tahaʹ awang lepoʹ. Kun ne lemulaʹ mata ha, ngan napoʹ ujoʹ o neng ia. Un dau Yesus neng ia: “Un ncoʹ taʹan mo?”

²⁴ Kun laki ina naʹat, un dau ue: “Ahaʹ, un te akeʹ taʹan kelunan, ia iaʹ koʹ baʹan seʹ kayu re ida, tai masat masat.”

²⁵ Kun Yesus napen ujoʹ o neng mata laki ina ca liwai laʹa. Liwai ini ie nugen naʹat, ngan taʹat te lepa tiga lan. Ketoʹ inu iaʹ ia taʹan, luhaʹ mung.

²⁶ Uʹo ina kun Yesus cuk ia tai uleʹ kaʹ amin ne, man pulen iaʹ pekini dau: “Ayen ncoʹ tai uleʹ ngalang lepoʹ.”

Peterus badaʹ aheʹ Yesus

²⁷ Sulo tai Yesus ngan diaʹ bayaʹ katuk ke puke, tai abeʹ lepoʹ Kaisaria Pilipi. Dalau tei re masat kahang janan, kun Yesus lemutu ida, un dau ue: “Tiga hem badaʹ makeʹ, aheʹ keʹ baʹan dulu tupe?”

²⁸ Un dau re mipa ia: “Un diaʹ kuma ha ikoʹ Yaya Guru Batis. Un palai kuma ha ikoʹ Ilia. Un pe diaʹ ca kuma ha ikoʹ ca usa neng ahang diaʹ pegawa Allah.”

²⁹ Un dau Yesus lemutu ida laʹa: “Kumpin sepe ikem, ikem ke naʹ aheʹ sepe akeʹ ʹo?” Sulo Peterus mipa, un dau ue: “Ikoʹ lete atek Keristus iaʹ ngkang pungu udip.”

³⁰ Sulo Yesus pejagaʹ dau neng ida: “Ayen ncem badaʹ akeʹ me dulu, mele me aheʹ aheʹ pe.”

Yesus nekena badaʹ neng puyan penuyen ne, ngan puyan patai ie

³¹ Dalau ina lete tading Yesus pekatuk diaʹ bayaʹ katuk ke, un dau ue: “Tekep lete Anak Sio ini ke sihoʹ tuyen bioʹ ʹo, ngan diaʹ lataʹ lepoʹ, ngan diaʹ detaʹu lataʹ, ngan diaʹ guru Adet Yahudi ke nyekang ia. Dulu ke lematai heʹ ʹo. Uʹo ina, neng iaʹ ketelu tau ue, kenai heʹ ngeliwet mudip laʹa.”

³² Luhaʹ lan ne isiu iaʹ Yesus badaʹ me ida telu dina. Ina ukoʹ Peterus ngkin Yesus tengen, sulo ho ngenca ia.

³³ Kun Yesus pupa naʹat diaʹ bayaʹ katuk ke, sulo ho ngenca Peterus: “E Sitan, tai ne ikoʹ kelap. Abeʹ kimet coʹ un nai cen Tuhan Allah. Di lareʹ cen kimet kelunan le nai kimet coʹ.”

³⁴ Sulo Yesus mengin kelunan kadoʹ dina, peging ngan diaʹ bayaʹ katuk ke nai ngenyeng ia. Un dau ue neng ida: “Buk aheʹ iaʹ ubaʹ ke nai petugung bayaʹ akeʹ, atek ke ke lepo lete pengubaʹ usa ha tengen, mentung nge nyuʹun tecek ukoʹ o ke matai, ngan tunuk bayaʹ katuk keʹ. Ina le ia senteng ke nai petugung bayaʹ akeʹ.

³⁵ Ban ne aheʹ iaʹ ubaʹ ke pedemun udip usa ha tengen, atek ke pesau udip pe ʹo. Un sepuʹo aheʹ iaʹ ke pesau udip pe neng usa ha ban tuman akeʹ, peging ngan Denga Injil, atek ke ke pedemun udip pe ina lete.

³⁶ Buk ca kelunan iaʹ ke un ketoʹ inu kusun tanaʹ ini, un sepuʹo udip berua ha durat, inu le ne iaʹ bang nge tupe?

³⁷ Buk ca kelunan ubaʹ ke alaʹ udip berua ha uleʹ laʹa, nyahut abeʹ un ca suaʹ iaʹ man ne ke nyuaʹ a.

³⁸ Tuman ina, buk ca kelunan iaʹ nyepati ke ngahaʹ akeʹ ngan katuk keʹ ngajan udip pe taro ngan jaʹat ini, pekina lete Anak Sio ini nyepati ke ngahaʹ ia, tegoʹ ke nai ie luhaʹ dalem serema peniga Amai ie, peging ngan melikat te diaʹ buheʹ.”