MARKUS 7 - Kenyah New Testament

Katuk adet tepun

¹ Cen lepoʹ Yerusalim nai kudaʹ usa diaʹ kelunan Perisi ngan diaʹ guru Adet Yahudi pempun kata Yesus.

² Dalau ina kun nte taʹan palai diaʹ bayaʹ katuk Yesus dina uman, ngan abeʹ un muheʹ ujoʹ de ading, koʹ baʹan puyan adet kelunan Perisi pekatuk dulu dalau ina.

³ Ban pekina puyan adet kelunan Perisi ngan lepoʹ Yahudi bayaʹ katuk adet tepun nte cen naʹaʹ. Iaʹ ina abeʹ de uman buk de abeʹ un muheʹ ujoʹ de ading bayaʹ ban adet de.

⁴ Pekina pe inu penguman iaʹ ida alaʹ cen pasen, abeʹ de uman ne buk de are ngadet muheʹ e ading. Kadoʹ naʹan adet ngan katuk ukum tepun nte iaʹ ida bayaʹ, koʹ baʹan muheʹ sawan, muheʹ kuden, muheʹ kadai jangin, ngan pekina pe pagen ukoʹ de ken.

⁵ Ina ukoʹ dia Perisi ngan diaʹ guru Adet Yahudi dina lemutu Yesus, un dau re: “Moʹ inu diaʹ bayaʹ katuk koʹ abeʹ un ngadet bayaʹ katuk adet tepun le tupe? Inu re uman buk de abeʹ un muheʹ ujoʹ de ading.?”

⁶ Un dau Yesus mipa ida: “Lan lete dau pegawa Yesaya badaʹ kimet Tuhan Allah neng puyan ncem. Ikem kelunan diaʹ ngaloʹ kuaʹ baʹan dau iaʹ pegawa Yesaya lepa nyurat idai: ‘Un dau Allah, kelunan dini bang man paʹde tuaʹ le ida nyelama akeʹ, un sepuʹo coʹ laleʹ le kimet de neng akeʹ.

⁷ Abeʹ un tuman nte lemameʹ palaʹ akeʹ, ban ida pekatuk bayaʹ dau adet kelunan, ngan uyan ne koʹ baʹan katuk ukum cen Tuhan Allah.’ ”

⁸ Un dau Yesus laʹa: “Ikem iaʹ lepo katuk ukum Tuhan Allah, un sepuʹo katuk adet kelunan iaʹ ikem kanan.”

⁹ Un dau Yesus metuk isiu ue laʹa: “Iaʹ lan ne ikem nyekang katuk adet Tuhan Allah apan ncem sukat nyalet katuk adet cem tengen.

¹⁰ Ban un dau Musa: ‘Nyelama ne amai hem ngan ueʹ kem,’ ngan: ‘Aheʹ iaʹ pisiu jaʹat neng amai ie buk are ueʹ e, ia iaʹ ke sihoʹ ukum patai.’

¹¹ Un sepuʹo dau hem pekatuk: ‘Buk ca kelunan un ca inu iaʹ sukat mepo amai ie ngan ueʹ e, tiga lete buk ke kuma: Ini ca Kurban, (iaʹ sen Kurban ina ca pengencai me Allah), sukat ina uyan ukan,

¹² apan ne are titin mepo amai ie ngan ueʹ e.’

¹³ Pekina puyan ncem muau tiraʹ Tuhan Allah man adet ncem pekatuk kelunan. Kadoʹ naʹan puyan ncem iaʹ pekina.”

Puyan iaʹ ngejameng kelunan

¹⁴ Ceng liwai laʹa Yesus mengin kelunan kadoʹ dina, sulo dau ue neng ida: “Tiga hem mung ngeringa ngan ngetisen dau heʹ.

¹⁵ Abeʹ un penguman iaʹ kelunan uman iaʹ sukat ke ngano berua ha, di lareʹ iaʹ nai cen dalem kimet te ina iaʹ atek ke ngano berua ha. [

¹⁶ Aheʹ diaʹ un telinga iaʹ senteng ke ngeringa, tiga re nawai kidi.]”

¹⁷ Lepa Yesus mecin kelunan kadoʹ dina, tai ie kedalem ca amin, sulo diaʹ bayaʹ katuk ke dina lemutu ia neng puyan kata katuk ina are.

¹⁸ “Moʹ inu penisen ncem tepa kuaʹ baʹan anun dulu ne? Un te ikem tisen pekimet tupe? Abeʹ un penguman iaʹ kelunan ke uman iaʹ senteng ke ngano berua ha.

¹⁹ Ban ne abeʹ e tai kedalem kimet te, di lareʹ bang tai kedalem batek ke, sulo pesau cen usa ha laʹa.” (Man isiu ina Yesus mesau mung palan penguman.)

²⁰ Un dau ue laʹa: “Inu iaʹ nai kawang cen kelunan, ina lete iaʹ atek ke ngano berua ha.

²¹ Ban ne cen dalem, ina cen kimet kelunan, kenai kimet jaʹat iaʹ ngkin ia pemung nyelem, ngelau, lematai kelunan,

²² petaro, pekaseng inu dulu, ngan uyan kadoʹ naʹan puyan jaʹat laʹa, koʹ baʹan palo, adet jameng, miʹet, isiu pejaʹat kelunan, puyan balang tawai, ngan paseʹ.

²³ Mung naʹan jaʹat dina ne iaʹ nai cen dalem kimet kelunan ngan ngano berua ha.”

Pengelan ca leto

²⁴ Tai Yesus mecin cen ina, sulo tai ie masat pa abeʹ kaʹ dale iaʹ nyeng kaʹ lepoʹ Tirus. Penco tai ie kedalem ca amin. Abeʹ e ubaʹ dulu ke tisen ia. Naʹ pe ia pekina, abeʹ nyatan ne tai selem.

²⁵ Kina un ca leto iaʹ un anak leto ho ban bali nelasek. Dalau leto ina tisen ban kenai Yesus, penco tai ie muʹup dudo taket te.

²⁶ Leto ina ca lepoʹ aloʹ, ngan lepoʹ Penisia kaʹ tanaʹ Siria iaʹ kukoʹ kenai ie pempet. Ngan lapen dau ue nyat Yesus ke pekarap bali cen anak ke.

²⁷ Un sepuʹo Yesus mipa ia: “Pawang ne ameʹ lemakan anak meʹ ading. Abeʹ tekep meʹ alaʹ penguman anak meʹ ngan naʹ a me asu.”

²⁸ Un dau leto ina: “Ahaʹ Amai, asu kentaʹ bijaʹ pe senteng uman laʹa penguman anak.”

²⁹ Sulo dau Yesus neng ia: “Moʹ pekina dau ipa hoʹ, tiga ne ikoʹ tai uleʹ, ban ne pesau ne bali cen anak koʹ are.”

³⁰ Tai leto ina uleʹ, sulo ho taʹan anak ke ken neng usun pagen. Lan lete ban bali lepa kelap cen ia.

Yesus paget ca laki iaʹ ameng ngan dengen

³¹ Tai Yesus mecin dale Tirus, sulo tai ie masat ngalang tanaʹ Sidun, ngan ngalang tanaʹ puloʹ lepoʹ idai are, pa abeʹ kaʹ leteng Galilia.

³² Sulo nai dulu ngkin ca kelunan iaʹ dengen ngan pekawaʹ ameng palaʹ Yesus, ngan nyat ia napoʹ ujoʹ o neng ia.

³³ Kun Yesus ngkin ia kukoʹ iaʹ tengen, coʹ kediʹut neng diaʹ kadoʹ dina. Sulo Yesus naʹ buaʹ ujoʹ o kedalem lubang telinga laki ina. Laʹa Yesus nyemulaʹ ujoʹ o, penco ho man jelaʹ laki ina.

³⁴ Lepa ina kun Yesus nekadaʹ kaʹ langit, ngan dau kerahing nge, sulo ho pisiu laki ina: “Ipata.” Iaʹ sen isiu ina: “Mesik ne.”

³⁵ Penco pesik ne telinga ha, ngan jelaʹ a abeʹ e ujen ne laʹa. Ngan teto dau isiu ue.

³⁶ Kun Yesus mulen ida mung ke badaʹ puyan ina me dulu. Naʹ pe ia pekina dau, tai denga kuʹo ke puyan ina.

³⁷ Muʹo ne tekaʹ tawai mung kelunan diaʹ tisen denga ina. Un dau re: “Mele inu inu ia uyan, bang tiga mung le, pabeʹ diaʹ dengen pe kenahan kuʹun ne, ngan pekina pe diaʹ ameng mencam pisiu kuʹun ne.”