MARKUS 5 - Kenyah New Testament

Yesus paget ca laki iaʹ bali nelasek

¹ Abeʹ kun nte ne tahaʹ dipa leteng Galilia, tahaʹ tanaʹ lepoʹ Gerasa.

² Tai Yesus pejakaʹ, penco ho taʹan ca laki nai palaʹ ia cen lubang batu kukoʹ liang.

³ Ia ina ca laki iaʹ bali nelasek, iaʹ ngelayen mudip dalau liang kaʹ tanaʹ pulung ina. Abeʹ un aheʹ iaʹ senteng ke ngaput ia, naʹ pia man kaput ampit malat.

⁴ Kudaʹ liwai pe dulu lemeka taket ngan ujoʹ o man ampit malat, muʹo beto ne kuʹun ne. Kaput malat neng taket te ia lemasi tuaʹ ne. Pali aleʹ le ia, ina ukoʹ dulu supeʹ mapo ia.

⁵ Naʹ tau ngan ngahu pe ia masat masat dalau liang diaʹ kaʹ mudung dina. Tahaʹ palai ie un dau lengap pe, tegoʹ o megut usa ha man batu.

⁶ Coʹ kediʹut te tegoʹ o taʹan Yesus, sulo ho ngasa nai sutlep kata ia.

⁷ Kun ne lemikaʹ bioʹ dau ue: “Yesus, Anak Allah iaʹ Atek Mpau, inu iaʹ baʹan ncoʹ neng akeʹ tupe? Neng juma Allah akeʹ nyat, ayen ncoʹ ngukum akeʹ.”

⁸ (Ia pekina dau uban dalau ina Yesus pisiu ia: “E bali jaʹat, tai ne ikoʹ kawang cen laki ini.”)

⁹ Un dau Yesus lemutu laki ina laʹa: “Aheʹ ngadan ncoʹ tupe?” Un dau ue mipa: “Ngadan nceʹ Bawa, moʹ kadoʹ meʹ.”

¹⁰ Un dau pengenyat te neng Yesus: “Ayen cuk ameʹ tai kelap dale tanaʹ ini.”

¹¹ Nyeng kina un ca aba buʹin nulin neng be mudung ina.

¹² Kun bali dina nyat neng Yesus, un dau re: “Cuk ne ameʹ tai neng buʹin dina. Pawang ne ameʹ tai nelasek ida.”

¹³ Kun Yesus pawang ida tai. Tai bali jaʹat dina kawang cen laki ina, penco tai re kedalem buʹin dina. Ketoʹ aba buʹin dina, kihoʹ kihoʹ dua ibu kadoʹ de, penco tai re ngasa puno be ihang mudung ina, ngan petuhun kedalem sungai. Mung nte matai menyet.

¹⁴ Un dulu diaʹ petubo buʹin dina, tai re ngasa kelap. Sulo tai re pedenga puyan ina ngalang lepoʹ ngan ngalang uma. Nai dulu kawang ubaʹ ke naʹat kumpin seʹ puyan ina.

¹⁵ Nai re abeʹ palaʹ Yesus, kun nte taʹan seʹ laki iaʹ bali nelasek idai. Kun nte taʹan ia denaʹ seʹ e madung ne. Ngan ia un ne pe gelam, ngan tiga ne kimet te. Muʹo tai bisau ne seʹ de dina mung.

¹⁶ Un diaʹ ban lepa taʹan puyan ina ading nte, sulo re badaʹ me kelunan diaʹ nai mading, puyan iaʹ lepa nuyan neng laki iaʹ bali nelasek idai, ngan pekina pe iaʹ nuyan neng buʹin didai.

¹⁷ Sulo re ngelapen dau nyat neng Yesus apan ne tai mecin cen dale re.

¹⁸ Dalau tai Yesus kaʹ alut, idi kenai laki iaʹ ban bali nelasek idai. Kun ne lemameʹ neng Yesus, un dau ue: “Awaʹ pe ikoʹ dayo akeʹ nai ngan ncoʹ.”

¹⁹ Abeʹ Yesus dayo. Un dau ue neng ia: “Tai ne ikoʹ uleʹ kaʹ amin ncoʹ te, tai palaʹ diaʹ amin ncoʹ ngan badaʹ mida kumpin bioʹ ban pemuyan Tuhan neng ikoʹ, ngan kumpin seʹ e lesau ikoʹ.”

²⁰ Tai laki ina uleʹ. Tai ie menoʹ puloʹ lepoʹ diaʹ kaʹ tanaʹ ina, mentung nge pedenga puyan iaʹ Yesus lepa uyan neng ia. Salam laleʹ kaʹ mung dulu diaʹ ngeringa dau ue.

Anak Yairus ngan leto iaʹ ngkang sada sapai Yesus

²¹ Tai Yesus uleʹ kaʹ dipa leteng ina laʹa, sulo kenai kelunan kadoʹ pempun pipa ia kaʹ sada sungai ina.

²² Nai Yairus, ca laki iaʹ tuʹa bioʹ kaʹ amin sebayang Yahudi kaʹ lepoʹ ina. Nai ie taʹan Yesus, penco ho muʹup kaʹ tanaʹ dudo taket te.

²³ Sulo ho lemameʹ nyat ngan kelapen dau ue: “Pareng laleʹ le anak keʹ sakit. Ca anak leto iʹut lepe ia. Nai ne ikoʹ naʹat ia ading, ngan napoʹ ujoʹ koʹ neng ia, apan ne nai maget ngan mudip.”

²⁴ Penco ketai Yesus masat ngan Yairus. Kadoʹ nai dulu pemung masat ngan ne. Sulo re ngesen ngesen ia.

²⁵ Un ca leto iaʹ un penyakit dahaʹ. Lepa puloʹ dua uman ne majan dahaʹ a abeʹ un tai nteng lan.

²⁶ Keta laleʹ leto ina ngan sakit te, kenuen pe kadoʹ duktun diaʹ lepa naban ia. Tai muʹo ne ligit te ia naʹ suaʹ taban. Abeʹ pe ia tai tiga, bang tai jaʹat kuʹo ne.

²⁷ Lepa ha tisen denga Yesus, sulo tai ie nelesip dalau kelunan kadoʹ diaʹ bayaʹ Yesus dina.

²⁸ Un dau ue pekimet selem: “Buk keʹ ke ngkang sapai ie, atek keʹ ke maget lete.”

²⁹ Sulo ho ngkang sapai Yesus, penco nteng ne dahaʹ a. Un tekaʹ dalem usa ha tisen ban kenai ca puyan iaʹ paget ia cen penyakit te are.

³⁰ Tegoʹ ina lete Yesus tisen tekaʹ uban nyingan tai pesau cen usa ha. Kun ne pupa tahaʹ mpun kelunan kadoʹ dina, penco dau ue: “Aheʹ iaʹ ngkang sapai heʹ ini are?”

³¹ Un dau diaʹ bayaʹ katuk ke neng ia: “Tisen te ikoʹ dulu nai ngesen pipa ikoʹ. Adeʹ koʹ kuma ha: ‘Aheʹ iaʹ ngkang sapai heʹ ini are?’ ”

³² Kun Yesus naʹat naʹat diaʹ pipa ia, moʹ ubaʹ ke tisen aheʹ iaʹ uyan puyan ina are.

³³ Un leto ina are, tisen ne ia neng puyan iaʹ nuyan neng ia, takut ngan ngerengen ne kaʹ a. Mentung nai ie muʹup dudo taket Yesus, penco ho badaʹ mia mung puyan iaʹ lan lan ban nuyan neng ia.

³⁴ Un dau Yesus neng ia: “Anak keʹ, pengelan ncoʹ iaʹ paget ikoʹ. Tadan ne kimet coʹ, ngan tai ne ikoʹ uleʹ, moʹ pesau ne penyakit coʹ are.”

³⁵ Dalau Yesus pisiu pekina, idi kenai kudaʹ usa lawa amin Yairus. Un dau re neng Yairus: “Amai, matai ne anak koʹ are. Inu baʹin ncoʹ pebubo guru ini laʹa?”

³⁶ Abeʹ Yesus pesingo dau isiu re ina, penco ho pisiu Yairus, un dau ue: “Ayen ncoʹ bisau, bang ngelan ne.”

³⁷ Sulo Yesus mulen dulu tai ngan ne. Bang Peterus, Yakup de dua cenganak ke Yaya.

³⁸ Tai re pejakaʹ kaʹ amin laki tuʹa amin sebayang ina. Kun Yesus naʹat muʹo kasing diseʹ kelunan dina, ngan bioʹ dau re nange ngan nidau.

³⁹ Dalau tai Yesus kedalem, un dau ue neng ida: “Adeʹ muʹo kasing ne diseʹ kem tupe? Moʹ inu hem nange? Mpi anak ini matai, bang seʹ e luntoʹ tuaʹ le ini.”

⁴⁰ Di lareʹ to taro dau re neng ia, sulo ho cuk ida tai kawang mung cen amin ina. Bang ueʹ ngan amai anak ina, peging ngan telu usa diaʹ bayaʹ katuk ke le diaʹ tai ngan Yesus kedalem amin iaʹ ukoʹ anak ina meken.

⁴¹ Sulo Yesus alaʹ ujoʹ anak ina. Un dau ue pisiu ia: “Talita kum,” iaʹ sen isiu ina: “Anak, dau heʹ mikoʹ beteʹ ne.”

⁴² Dalau ina lete nai anak ina beteʹ, ngan penco tai ie masat. (Puloʹ dua uman lepe udip anak ina.) Dalau ina salam laleʹ ne tekaʹ de diaʹ tisen puyan ina.

⁴³ Un dau Yesus mulen ida: “Ayen ncem peletoʹ badaʹ puyan ini me dulu, mele me aheʹ aheʹ pe.” Un dau ue laʹa: “Tiga hem naʹ penguman mia.”