MARKUS 1 - Kenyah New Testament

Katuk Yaya Guru Batis

¹ Ini ne Denga Tiga Yesus Keristus, Anak Allah.

² Un tading nge pekuaʹ ukoʹ dau iaʹ pegawa Yesaya lepa nyurat are kuma: “Un dau Allah: ‘Naʹat kenai lawa heʹ. Akeʹ ke cuk ia nai tahaʹ tena ikoʹ. Ia iaʹ ke petenup janan ukoʹ kenai hoʹ ʹo.’

³ Un dau ca lengap kaʹ tanaʹ lenga te: ‘Petenup ne janan Tuhan kena kenai ie. Petelit ne janan ukoʹ kenai ie.’ ”

⁴ Pekina ne tai nuyan kaʹ tanaʹ lenga dalau kenai Yaya luhaʹ. Yaya penco katuk ke ngan ngebatis dulu man sungai. Un dau ue: “Nesen ne, ngan nyepuleʹ kimet cem cen penyalaʹ kem. Lepa ina alaʹ batis, apan Allah ke sau penyalaʹ kem.”

⁵ Mung dulu nai kawang cen tanaʹ Yudia, pekina pe cen lepoʹ Yerusalim, nai re ubaʹ ngeringa dau Yaya. Ida ngahaʹ badaʹ penyalaʹ de, sulo Yaya ngebatis ida dalem sungai Yardin.

⁶ Un gelam Yaya cen bulu pun untaʹ, ngan seketeng nge anit pun. Penguman ne pahu ngan nyioʹ layuk.

⁷ Kun Yaya penco katuk me dulu, un dau ue: “Un ca Laki Bioʹ ke nai bayaʹ akeʹ ʹo, ia iaʹ atek bioʹ neng akeʹ. Di pe ke mubai tali sepatu ue, abeʹ pe akeʹ tekep.

⁸ Lan lete akeʹ ngebatis ikem man sungai, un sepuʹo ia iaʹ ke ngebatis ikem man Berua Tuhan iaʹ Buheʹ.”

Yaya ngebatis Yesus

⁹ Laho ina nai Yesus cen lepoʹ Nasarit kaʹ tanaʹ Galilia, sulo Yaya ngebatis ia kedalem sungai Yardin.

¹⁰ Dalau nai Yesus umau cen sungai ina, kun ne taʹan seʹ langit pesik, sulo nai Berua Allah kentaʹ, koʹ baʹan seʹ puyan ca sui garaʹ are, penco ngedung neng ia.

¹¹ Un dau ca isiu cen langit kuma ha: “Ikoʹ ini lete Anak keʹ iaʹ akeʹ malaʹ, ngan ikoʹ lete iaʹ atek sihoʹ neng pengubaʹ keʹ.”

¹² Dalau ina lete tai Berua Allah ngkin Yesus kaʹ tanaʹ iaʹ lenga.

¹³ Pat puloʹ tau majan Yesus un kina, ngan kina Bali Sitan ten ke pelaboʹ ia neng penyalaʹ. Melikat iaʹ nubo Yesus dalau ue ngelineʹ neng ahang pun diaʹ lajam dina.

Yesus mengin pat usa diaʹ pegayeng pita atuk

¹⁴ Lepa Yaya peput dalem amin sepin, tai Yesus kaʹ tanaʹ Galilia, penco badaʹ katuk Denga Injil cen Allah.

¹⁵ Un dau Yesus: “Lepa abeʹ ne tau ue, ngan nyeng ne puyan pengaren Allah ke ngaren ilu kelunan. Nesen ne ngan nyepuleʹ kimet cem cen penyalaʹ kem, sulo ngelan Denga Injil ini.”

¹⁶ Dalau tai Yesus masat ngalang sada bahi leteng Galilia, kun ne taʹan dua usa diaʹ tai pita atuk, Simun ngan cenganak ke Anderias, dalau dalau seʹ de dua alaʹ atuk kaʹ pukat de neng leteng ina.

¹⁷ Un dau Yesus pisiu ida: “Nai ne serengan akeʹ. Akeʹ ke pekatuk kem tai nejalaʹ kelunan.”

¹⁸ Dalau ina lete ida mecin pukat de, penco tai serengan Yesus.

¹⁹ Tai Yesus masat kediʹut de, sulo ho taʹan dua usa laʹa, Yakup ngan iaʹ cenganak ke Yaya, diaʹ ina anak Sapdi. Dalau seʹ de petenup pukat dalem alut de.

²⁰ Yesus taʹan ida, penco ho mengin ida. Sulo re mecin amai re Sapdi dalem alut, pemung ngan kudaʹ laki diaʹ metau ngan nte. Penco tai re dua serengan Yesus.

Laki iaʹ un bali

²¹ Tai sabeʹ de kaʹ lepoʹ Kapernaum, ngan tegoʹ Tau Kelineʹ iaʹ nai, penco tai re kedalem amin sebayang Yahudi. Kina Yesus penco nading ke pekatuk.

²² Salam tekaʹ dulu ngeringa dau katuk ke, moʹ abeʹ e koʹ baʹan dau katuk diaʹ guru Adet Yahudi are. Ca naʹan seʹ puyan Yesus pekatuk kelunan, ban un pengaren dau ue.

²³ Dalau ina nai ca laki iaʹ un bali. Nai ie kedalem amin sebayang Yahudi ina, penco ho lemikaʹ,

²⁴ kun dau ue: “Ahaʹ Yesus lepoʹ Nasarit, inu baʹan ncoʹ neng ameʹ tupe? Seʹ koʹ ubaʹ kenai nasaʹ ameʹ mo? Tisen te akeʹ ikoʹ. Ikoʹ ne pegawa iaʹ buheʹ nai cen Allah.”

²⁵ Penco dau Yesus mulen bali ina: “Ayen pisiu. Nai ne kawang cen laki ini.”

²⁶ Kun bali sepen ina ngelengap ngan bioʹ dau ue, penco nai kelap cen ia.

²⁷ Salam ne dulu, sulo lemutu ida semaheʹ, kun nte: “Puyan kumpin ini, ca naʹan katuk mading ini taʹin? Un nyingan seʹ puyan isiu laki ini, pabeʹ bali pe dayo bayaʹ dau ue.”

²⁸ Sangkit uban denga puyan Yesus ina tai purat pa libut tanaʹ Galilia.

Kadoʹ dulu diaʹ Yesus paget

²⁹ Tai re telu mecin amin sebayang Yahudi ina, penco tai re kaʹ amin Simun nte dua Anderias. Un pe Yakup de dua Yaya ngan nte.

³⁰ Kina re taʹan ueʹ leto Simun sakit, bang meken ne ia ngan kayung nge. Tegoʹ sabeʹ Yesus, kun nte penco badaʹ puyan ne ina mia.

³¹ Sulo tai Yesus naʹat ia, ngkang ujoʹ o, cuk ia nai beteʹ. Dalau ina lete nai ie maget, sulo tai ie mana mida.

³² Dalau ketai lenca tau, nai kun dulu ngkin mung diaʹ sakit ngan diaʹ bali nelasek, palaʹ Yesus.

³³ Mung kelunan diaʹ dalem lepoʹ ina nai pempun neng juma amin ina.

³⁴ Sulo Yesus paget kelunan kadoʹ dina. Kadoʹ naʹan penyakit de, ngan kadoʹ pe bali iaʹ Yesus pekarap. Abeʹ Yesus buhaʹ bali dina ke pisiu, moʹ de tisen ia.

Yesus badaʹ katuk kaʹ tanaʹ Galilia

³⁵ Neng ke nempam me pelaʹa, laho Yesus beteʹ, penco tai ie mecin amin ina, tai kawang lepoʹ neng ca ukoʹ iaʹ beringa. Kina ha lemameʹ.

³⁶ Nai Simun nte telu kawang cen lepoʹ ina, miat dau re tai pita ia.

³⁷ Kun nte taʹan ia, un dau re: “Ina dulu mita ikoʹ.”

³⁸ Un dau Yesus mipa ida: “Tai ne telu, naʹat lepoʹ dulu diaʹ pipa ilu dini ading. Tekep keʹ ke penco katuk mida, uban tuman gayeng ini lete kenai heʹ ne are.”

³⁹ Sulo tai Yesus masat pa tipo tanaʹ Galilia, ngan penco katuk dalem amin sebayang Yahudi, ngan pekarap bali cen kelunan, cuk ida tai kelap.

Yesus paget kelunan sakit bekayen

⁴⁰ Nai ca laki iaʹ sakit bekayen, nai nyat lesau, ngan sutlep kata Yesus. Kun dau ue: “Buk koʹ ubaʹ, atek senteng lete ikoʹ ke paget akeʹ.”

⁴¹ Uʹo ina bioʹ tekaʹ penyaheʹ Yesus neng ia, penco ho mencai ujoʹ o ngan man ia. Un dau ue: “Ubaʹ te akeʹ. Maget ne ikoʹ.”

⁴² Penco maget ne laki iaʹ bekayen ina re.

^43-44 Un dau Yesus pisiu ia: “Nawai tiga le ikoʹ kidi ʹo. Ayen peletoʹ koʹ ke badaʹ puyan ini me dulu ʹo. Bang tai ne ikoʹ penco palaʹ diaʹ detaʹu ngkang adet, ngan cuk laki bioʹ ina nugen usa hoʹ ne. Uʹo ina naʹ pengencai iaʹ tekep bayaʹ katuk ukum Musa, apan ina nuyan ca tebadaʹ iaʹ ke badaʹ ikoʹ lepa maget me dulu mung ʹo.”

⁴⁵ Penco tai laki ina petipo denga ina kempi kempi pe. Petasak aleʹ dau tai ie pedenga puyan ina, pa Yesus abeʹ un senteng peluhaʹ seʹ tai ie dalem lepoʹ ina. Ina ukoʹ o tai ngelineʹ neng ca tanaʹ lenga. Kina nai dulu palaʹ ia cen mpi mpi pe.