LUKAS 8 - Kenyah New Testament

Leto diaʹ ban bayaʹ Yesus

¹ Abeʹ majan uʹo ina, tai kun Yesus masat singket singket lepoʹ pa tipo dale ina, tai badaʹ Denga Injil neng puyan pengaren Allah. Un petugung ngan ne, puloʹ dua usa diaʹ bayaʹ katuk ke.

² Un pe kudaʹ usa leto diaʹ Yesus ban sau bali jaʹat neng ida, ngan paget ida cen naʹan naʹan penyakit de. Pekina pe Mariam, iaʹ ipa ngadan ne Madalina, iaʹ ban tujoʹ de bali iaʹ Yesus pekarap cen ia.

³ Un pe laʹa Yuana, leto Kusa iaʹ mamung kusi amin Laja Herudis. Un pe Susana. Kadoʹ pe leto diaʹ ca iaʹ ngkin inu re man nte ke petubo Yesus peging diaʹ bayaʹ katuk ke.

Kata katuk neng puyan ca laki iaʹ mula beneʹ

⁴ Kadoʹ kenai dulu palaʹ Yesus, nai re cen singket singket lepoʹ. Kadoʹ ne diseʹ de pempun kina, sulo ho ti ca kata katuk mida.

⁵ Kun dau ue: “Un ca usa iaʹ tai mula beneʹ kaʹ uma ha. Dalau ue miwet beneʹ dina, un palai diaʹ laboʹ kaʹ janan. Dulu cut te, ngan kadoʹ pe sui diaʹ nai uman ne pa muʹo.

⁶ Un palai diaʹ ban laboʹ neng usun tanaʹ bere. Uʹo nai ie mudip, laho ina tai ie maʹang, moʹ abeʹ un tanaʹ a basaʹ.

⁷ Un pe palai laʹa diaʹ ban laboʹ neng ahang suhaʹ. Nai suhaʹ ina mudip serengan luang beneʹ dina, sulo ho nekuleng nampun inan beneʹ dina.

⁸ Un ban palai laboʹ kaʹ tanaʹ iaʹ tiga. Nai ie mudip ngan penco un buʹan ca ato liwai liwet neng ʹo beneʹ e.” Sulo dau Yesus mida: “Aheʹ iaʹ un telinga, tiga ne ia ngeringa.”

Iaʹ tuman ban kata katuk

⁹ Un diaʹ bayaʹ katuk Yesus lemutu ia neng sen kata katuk idai.

¹⁰ Dau Yesus mipa ida: “Penisen neng sen iaʹ linget neng puyan pengaren Allah, lepa ne ia naʹ a mikem. Un sepuʹo kenai penisen ina kata dulu man kata katuk, apan nte sukat naʹat, abeʹ pe ida taʹan; ngeringa te ida, abeʹ de tai tisen sen ne.”

Sen kata katuk neng puyan laki iaʹ mula beneʹ

¹¹ Un dau Yesus: “Pekini dau sen kata katuk idai: Un luang beneʹ ina tiraʹ Allah.

¹² Beneʹ diaʹ laboʹ kaʹ janan, ia te dulu diaʹ ngeringa katuk ina, penco kenai Bali magang katuk ina cen kimet de, malap ida ngelan penco alaʹ udip dalem Tuhan.

¹³ Un beneʹ diaʹ laboʹ neng usun tanaʹ bere dina, koʹ baʹan dulu diaʹ ngeringa katuk idai, mentung nte alaʹ a ngan bangen tawai. Un sepuʹo abeʹ katuk didai tai detem dalem kimet de. Seʹ de ngelan ne dalau laho ina tuaʹ. Ngan tegoʹ kenai pengeten palaʹ ida, penco luʹap ne kimet de.

¹⁴ Un beneʹ diaʹ laboʹ neng ahang suhaʹ dina, koʹ baʹan dulu diaʹ lepa ngeringa, un sepuʹo moʹ de pekutat iʹut tawai ngan kadoʹ galen nte, ngan pengawaʹ udip de kusun tanaʹ ini, dina ne iaʹ ke nebeseng ida, pa re supeʹ kuʹun ne, ngan abeʹ un buaʹ pengudip de iaʹ ketai sukung sak ke.

¹⁵ Un beneʹ diaʹ laboʹ neng tanaʹ diaʹ tiga didai, ida te koʹ baʹan dulu diaʹ ngeringa katuk. Kun nte nyalet te dalem kimet iaʹ tiga ngan iaʹ tunuk, ngan tudep pa re un buʹan neng pengudip de.”

Kata katuk neng pelitaʹ kentaʹ ca tukaʹ

¹⁶ Un dau Yesus laʹa: “Abeʹ un aheʹ iaʹ jiget pelitaʹ penco ho mekep pe man ca tukaʹ buk are mahung nge kentaʹ tilung nge pe. Atek de ke mejung nge kukoʹ padung pelitaʹ lete, apan nte diaʹ nai kaʹ amin taʹan diseʹ dema ha.

¹⁷ Moʹ abeʹ un ca inu iaʹ suhuk iaʹ are ke luhaʹ bayaʹ. Inu iaʹ pekep, atek ke kenai luhaʹ ngan ke tugen kata iaʹ dema ʹo.

¹⁸ “Cen ina, pekimet ne tiga le kumpin iaʹ ikem kenahan. Moʹ buk aheʹ iaʹ un penisen, palaʹ ia te Tuhan ke naʹ pit te laʹa. Ngan aheʹ iaʹ abeʹ un penisen, cen ia te Tuhan ke sau penisen iaʹ ia ke kuma ha un neng ia.”

Ueʹ Yesus ngan diaʹ sadin Yesus

¹⁹ Nai kun ueʹ e ngan diaʹ sadin laki neng Yesus kata ia. Abeʹ de senteng ketai ngenyeng ia, moʹ o peseʹ laleʹ kuʹun dulu kina.

²⁰ Kun dulu badaʹ mia: “Ina kenai ueʹ koʹ ngan diaʹ sadin ncoʹ, ina re nekejeng kaʹ sada mpun nte. Kenai re ke mengin ikoʹ, moʹ de ubaʹ ke pisiu ngan ncoʹ.”

²¹ To dau Yesus neng diaʹ kadoʹ dina: “Un diaʹ ke ueʹ keʹ ngan diaʹ ke sadin nceʹ, ida diaʹ ngeringa tiraʹ Allah ngan tudep bayaʹ a.”

Yesus penteng bahiu kasa

²² Un tegoʹ ca tau ue, tai kun Yesus tugung diaʹ bayaʹ katuk ke, ngedung neng ca alut. Un dau Yesus neng ida: “Tiga le tai pelawat kaʹ dipa leteng ini te.” Sulo ketai re puke.

²³ Dalau ketai re ngalut neng alut iaʹ un apeʹ bahiu, sulo Yesus luntoʹ. Kenai bahiu kasa neng leteng ina, seʹ ke sangan alut de kuʹun luyak. Pekece le ida ke kaham.

²⁴ Tai re naga Yesus, kun nte: “Guru, Guru, seʹ le ke matai ne ini.” Nai Yesus taga, penco ho pisiu, mulen bahiu ngan luyak ina. Belekaʹ pekenaʹ ne bahiu ngan luyak dina, pa ha pelenteng laleʹ.

²⁵ Sulo dau Yesus neng dia dan bayaʹ katuk ke dina: “Mpi pengelan ncem?” Tai salam ngan takut tekaʹ de. Un dau re neng ida selepeʹ: “Aheʹ ini taʹin? Adeʹ pabeʹ bahiu ngan sungai pe bayaʹ dau pengecuk ke.”

Yesus paget diaʹ bali nelasek

²⁶ Tai re ngalut neng alut iaʹ un apeʹ bahiu, pa abeʹ kaʹ tanaʹ lepoʹ Gerasa iaʹ tahaʹ dipa neng Galilia.

²⁷ Dalau tai Yesus pejakaʹ, kun ne petegoʹ ngan ca usa lepoʹ ina iaʹ ban bali nelasek. Majan laleʹ ne ban laki ina ugai, ngan abeʹ e tisen nai kaʹ umaʹ. Bang kaʹ lubang batu kaʹ pulung liang ne ia.

²⁸ Dalau ue taʹan nai Yesus, kun ne lemikaʹ, mentung tai ie muʹup tahaʹ juma Yesus. Kun ne ngelengap, un dau ue: “Yesus, Anak Allah iaʹ Atek Mpau, inu iaʹ pengubaʹ koʹ neng akeʹ tupe? Pengenyat ceʹ neng ikoʹ, ayen ncoʹ ngukum akeʹ.”

²⁹ Ia pekina dau ue moʹ Yesus lepa cuk bali ina tai kawang cen usa ha. Moʹ lemuto laleʹ le bali ina paleʹ neng ia. Naʹ pe dulu meput ia dalem tepap peging beka taket ngan ujoʹ o man ampit, ketoʹ ampit dina muʹo beto. Sulo bali ina pekarap ia tai kaʹ tanaʹ pulung.

³⁰ Kun Yesus lemutu ia: “Aheʹ ngadan ncoʹ tupe?” Kun dau ue mipa Yesus: “Bawa, ngadan nceʹ.” Ina ukoʹ pekina dau moʹ kadoʹ bali diaʹ nelasek ia.

³¹ Ketoʹ bali dina lemameʹ, malap Yesus cuk ida ketai dalem lubang asep.

³² Abeʹ kumpin coʹ kaʹ ina, un ca aba buʹin diaʹ nulin neng be mudung. Toʹ bali dina lemameʹ apan Yesus dayo ida tai kedalem aba buʹin dina. Kun ne pedayo ida tai.

³³ Sulo kenai bali dina kawang cen laki ina, penco tai re kedalem aba buʹin dina. Mung buʹin dina ngasa kelap, penco tai re petuhun cen ca bila kaʹ sada bahi leteng ina, sulo re matai menyet.

³⁴ Un dulu diaʹ manan buʹin dina, ida taʹan seʹ puyan ina. Kelap kun nte, penco re badaʹ puyan ina ngalang uma dulu, ngan kaʹ lepoʹ de te.

³⁵ Nai kun dulu naʹat seʹ ban puyan ina. Kenai re kata Yesus, penco re taʹan laki iaʹ ban ukoʹ kenai bali dina kelap. Seʹ e madung kata taket Yesus ngan ban un gelam ne ia, ngan tiga ne ban kimet te. Takut ne tekaʹ de mung.

³⁶ Un diaʹ ban lepa taʹan puyan ina, penco re badaʹ a me dulu kumpin diseʹ ban puyan laki ina lepa nai maget.

³⁷ Uʹo ina, ketoʹ dulu lepoʹ Gerasa nyat Yesus apan ne tai kelap cen ina, moʹ bioʹ laleʹ kaʹ takut de neng ia. Sulo tai Yesus kaʹ alut, mecin ida tai uleʹ.

³⁸ Un laki iaʹ ban bali nelasek idai, ia nyat neng Yesus, kun dau ue: “Kudaʹ pe ikoʹ ngkin akeʹ tugung ikoʹ.” Abeʹ Yesus dayo. Kun ne cuk ia tai uleʹ.

³⁹ Dau ue neng ia: “Tai ne ikoʹ uleʹ kaʹ amin ncoʹ, ngan badaʹ kumpin seʹ ban puyan Allah neng ikoʹ.” Sulo ketai laki ina badaʹ pa tipo lepoʹ, pedenga mung puyan iaʹ ban Yesus ti neng ia.

Anak Yairus ngan leto iaʹ ngkang sada sapai Yesus

⁴⁰ Tegoʹ kenai Yesus nantaʹ cen dipa leteng ina, kadoʹ dulu nyelalang kenai ie, moʹ un ne ban nte pekena ia kina.

⁴¹ Nai kun ca usa ngadan ne Yairus, ca diaʹ ngkang gayeng dalem amin sebayang Yahudi. Nai kun ne, sulo ho muʹup palaʹ taket Yesus, lemameʹ nyat ia nai kaʹ amin ne,

⁴² moʹ un anak leto ho pekece ke matai, bang ca le ia, kihoʹ kihoʹ puloʹ dua uman udip pe. Dalau kenai Yesus masat, un dulu diaʹ kadoʹ kina nai ngesen ia.

⁴³ Un ca leto iaʹ un sakit dahaʹ, lepa puloʹ dua uman majan ne. Ketoʹ inu ue muʹo ho naʹ a me duktun. Pabeʹ ca usa duktun abeʹ un sukat ke paget ia.

⁴⁴ Nai kun leto ina tahaʹ likut Yesus, sulo ho ngkang sada sapai dadoʹ o. Dalau ina lete nteng ne dahaʹ a.

⁴⁵ Kun dau Yesus: “Aheʹ iaʹ ngkang akeʹ tupe?” Mung dulu iaʹ ngawai. Un dau Peterus: “Guru, moʹ kadoʹ dulu nai ngeseʹ ngan ngesen ikoʹ pekele.”

⁴⁶ Un dau Yesus: “Un tekaʹ ca usa iaʹ ngkang akeʹ uʹo re. Tisen te akeʹ, moʹ un tekaʹ nyingan tai pesau cen akeʹ.”

⁴⁷ Tisen ne leto ina, ia are senteng ke nyuhuk ke. Kenai ie ngan ngeregen, muʹup palaʹ taket Yesus. Kina ha badaʹ puyan ne me Yesus kata dulu mung. Kun ne badaʹ a me Yesus ban tuman ne ngkang ia are, pekina pe ia badaʹ ban ne maget dalau ina lete.

⁴⁸ Kun dau Yesus neng ia: “Ahaʹ anak keʹ, pengelan ncoʹ lepa paget ikoʹ. Tai ne ikoʹ ngan tadan pengudip koʹ.”

⁴⁹ Dalau Yesus pisiu pekina, nai kun ca usa lawa ngkin tiraʹ cen amin laki bioʹ idai are. Kun dau ue me Yairus: “Matai ne anak koʹ. Ayen ncoʹ pebubo guru nai laʹa.”

⁵⁰ Yesus kenahan dau isiu ina. Kun ne pisiu Yairus: “Ayen takut, bang ngelan ne, maget te ia ʹo.”

⁵¹ Dalau ketai Yesus abeʹ kaʹ amin nte, abeʹ e dayo dulu diaʹ ca tai tugung ia kedalem, bang Peterus, Yaya, Yakup, amai anak ina, ngan ueʹ e le.

⁵² Toʹ de diaʹ kina nange ngan ngidau ia. Dau Yesus mida: “Ayen nange, abeʹ anak ini matai, bang seʹ e luntoʹ le.”

⁵³ Kun dulu kina petawa ia, moʹ de tisen anak ina lepa matai.

⁵⁴ Kun Yesus ngkang ujoʹ anak ina, penco ngelengap, kun dau ue: “Anak, beteʹ ne.”

⁵⁵ Sulo kenai berua ha ngeliwet, penco ho beteʹ. Kun Yesus cuk ida, lemakan anak ina.

⁵⁶ Meba diseʹ tawai diaʹ tuʹa ha. Un dau Yesus mida. “Ayen peletoʹ badaʹ puyan ini me dulu ʹo.”