LUKAS 21 - Kenyah New Testament

Pengencai ca leto balu

¹ Kun Yesus mile ngan taʹan seʹ diaʹ kayaʹ naʹ pengencai kedalem bahan ncai ina.

² Uʹo ina kun ne taʹan pelaʹa kenai ca leto balu iaʹ kasip laleʹ, naʹ pengencai ie kidi. Un ncai ie bang dua liʹap sin bala.

³ Sulo dau Yesus: “Lan dau heʹ mikem, un leto balu iaʹ kasip ini, lapa bioʹ anun ne neng ʹo ketoʹ de diaʹ naʹ pengencai re are.

⁴ Moʹ mung nte diaʹ ca dina naʹ pengencai re cen suheʹ pengekayaʹ de. Un sepe leto ini, cen penepa ha ia naʹ mung inu iaʹ un neng ia, iaʹ ina mung pengudip pe.”

Dau Yesus badaʹ ketai tasaʹ Umaʹ Palan

⁵ Un palai diaʹ kina pisiu neng puyan Umaʹ Palan Allah ina, moʹ selawan diseʹ e kuʹun batu iaʹ tiga ngan gelam pengencai dulu kidi. Un dau Yesus:

⁶ “Mung iaʹ ikem taʹan ini ketai kasing ʹo. Abeʹ un ca batu iaʹ petekuduk kidi iaʹ are ke tai pasi ʹo.”

Penaru ngan penuyen

⁷ Kun nte lemutu Yesus: “Ahaʹ Guru, midan puyan ina kenai ʹo? Inu iaʹ ke tedanaʹ a kena ha ke nuyan ʹo?”

⁸ Un dau Yesus: “Jagaʹ tiga tiga. Ayen ncem buhaʹ kelunan pedaru ikem, moʹ kadoʹ kelunan kenai kanan ngadan nceʹ. Un dau re ʹo: ‘Akeʹ lete ia.’ Kun nte pelaʹa: ‘Kenai jakaʹ a ne ini.’ Ayen ncem peletoʹ bayaʹ dau kelunan dina.

⁹ Ayen kecet buk kem kenahan dau denga puyan pepatai ngan pekamuk, moʹ un puyan dina abeʹ e senteng aer ke nuyan kena. Abeʹ ina iaʹ badaʹ kenai pengelepa udip.”

¹⁰ Sulo dau Yesus laʹa: “Kenai ca lepoʹ beteʹ ti ngan ca lepoʹ, ngan pekina pe pengaren ke ti neng ida selepeʹ.

¹¹ Ngan kenai liung tanaʹ iaʹ pali ʹo. Ngan ke un lien taru, ngan layu ngalang kempi kempi. Un te puyan iaʹ pebisau kelunan, ngan tedanaʹ iaʹ bioʹ ngan kenyarem diseʹ kenai luhaʹ cen langit ʹo.

¹² “Kenaʹ ke kenai luhaʹ puyan ina, dulu ke dakep ngan peketa ikem. Dulu ke mekem salaʹ mikem kaʹ amin sebayang Yahudi, ngan ke nyepin ikem ʹo. Dulu ke ngkin ncem kata diaʹ paren ngan perinta moʹ suaʹ ngadan nceʹ.

¹³ Dalau ina ke un pengebiʹen ncem ke badaʹ tugen dau tuman akeʹ.

¹⁴ Moʹ ina, denaʹ ne tawai hem, ayen janga ke petenup neng inu iaʹ ikem ke mipa.

¹⁵ Akeʹ iaʹ kenaʹ isiu neng paʹ kem, ngan naʹ penudi mikem iaʹ bunoʹ kem are senteng ke nyekang ngan ke mipa.

¹⁶ Tuʹa hem, ngan cenganak usa hem, ngan pemanak kem, ngan diaʹ malai penyeng ngan ncem ke naʹ ikem palaʹ diaʹ jaʹat. Ngan ida ke lematai palai mikem.

¹⁷ Mung dulu ke miʹi neng ikem uban tuman akeʹ.

¹⁸ Naʹ pia pekina, pabeʹ ca uhat puk kem pe are ketai salai.

¹⁹ Neng pengemihen ncem, ina le ikem ke tisen puyan iaʹ pudip penawai hem ʹo.”

Dau Yesus badaʹ lepoʹ Yerusalim ketai tasaʹ

²⁰ Sulo dau Yesus laʹa: “Midan midan ncem taʹan kenai bawa teliling Yerusalim, ina le ikem ke tisen ban nyeng le laʹa ketai tasaʹ a.

²¹ Tegoʹ ina, tiga dulu diaʹ kaʹ tanaʹ Yudia kelap kaʹ mudung, ngan aheʹ iaʹ kedalem lepoʹ Yerusalim, tiga re tai kelap kawang, ngan aheʹ iaʹ tahaʹ awang lepoʹ ina, ayen tai kedalem me.

²² Moʹ tegoʹ ina kenai ‘Ukum cen Allah,’ apan mung iaʹ ban un dalem Kitap ketai palup.

²³ Siʹau pe mung leto diaʹ lemaleʹ, ngan diaʹ iteʹ anak de tegoʹ ina ʹo. Moʹ tegoʹ ina ke nai luhaʹ ca taru bioʹ kusun tanaʹ ini, ngan kenca Allah iaʹ ke nantaʹ lepoʹ ini.

²⁴ Un diaʹ ke matai kuʹun bahing. Un diaʹ dulu ke nyalut singket lepoʹ. Ngan lepoʹ diaʹ ca ke menyek lepoʹ Yerusalim pa ketai sukung tuket de.”

Puyan seʹ kenai Anak Sio ʹo

²⁵ Un dau Yesus: “Ke un kudaʹ tedanaʹ neng mata tau, pekina pe neng bulan ngan betuʹen ʹo. Ngan kelunan kusun tanaʹ ini ke miat kuʹun taru, ngan ke bisau dau kuʹun liʹu luyak banget, ngan dau so sungai.

²⁶ Un diaʹ ke tai pengkup, ngan metan, moʹ de takut ke mengaʹ puyan iaʹ kenai pa tipo usun tanaʹ ini. Moʹ Allah ke ngasing buleʹ mung pengali penyukat langit.

²⁷ Tegoʹ ina sulo kelunan ke taʹan Anak Sio kenai luhaʹ dalau abun, peging ngan penyukat iaʹ bioʹ ngan serema peniga ha.

²⁸ Buk tading ke nai puyan ini ke luhaʹ ʹo, nekejeng ne ikem, nekadaʹ ngan mengaʹ, moʹ siʹeng ne tuket cem ke takau cen mung iaʹ jaʹat.”

Kata katuk neng ca buaʹ abung

²⁹ Kun Yesus ti mida ca kata katuk iaʹ pekini dau: “Naʹat inan buaʹ abung, ngan inan kayu diaʹ ca pe.

³⁰ Midan ncem taʹan seʹ kenai tekucuk beluluk ke, tisen ne ikem nyeng le laʹa kenai tagaʹ.

³¹ Pekina lete ikem dini, buk ikem taʹan ne diseʹ puyan dina ke nuyan, tisen ne ikem atek nyeng le laʹa kenai puyan pengaren Allah.

³² “Lan dau heʹ mikem, toʹ kelunan neng udip ini abeʹ de ketai salai kena, buk mung puyan dina are ke nuyan ading.

³³ Ke salai pe langit ngan tanaʹ ʹo, un sepe tiraʹ keʹ, nyahut te ketai salai ne.”

Ukoʹ le tekep ke jagaʹ

³⁴ “Jagaʹ ne singket usa hem. Ayen pedayo kimet cem tai padut kuʹun mesep uman, ngan nisep jakan, ngan puyan mawaʹ neng pengudip ini, malap kenai Tau Bioʹ ina nantaʹ ikem tecu laleʹ ʹo.

³⁵ Atek kenai Tau ina koʹ baʹan ca tepap, kenai sihoʹ ketoʹ kelunan diaʹ mudip kusun tanaʹ ini ʹo.

³⁶ Lemuto hem ke jagaʹ ngan lemameʹ, apan ncem un penyalet ceng dadoʹ jatan puyan taru dini, ngan ke jeng salet nyeripa Anak Sio ʹo.”

³⁷ Dalau ina Yesus pekatuk dalem Umaʹ Palan Allah bang naʹ tau le. Ngan tai tahup tai ie kawang lepoʹ, tudo kusun Mudung Ampang.

³⁸ Singket mpam ne, laho tai dulu pempun kedalem Umaʹ Palan ina, moʹ de ubaʹ ngeringa dau ue.