LUKAS 20 - Kenyah New Testament

Dau putu neng penyukat Yesus

¹ Un tegoʹ ca tau ue, dalau Yesus pekatuk lepoʹ ina kedalem Umaʹ Palan Allah, mentung nge badaʹ Denga Injil, dalau ina kenai diaʹ detaʹu lataʹ ngan guru Adet Yahudi, peging ngan diaʹ pengencam lepoʹ.

² Un dau re neng ia: “Tiga hoʹbadaʹ mameʹ ading, man penyukat inu hoʹ uyan mung puyan ini tupe? Ban aheʹ iaʹ naʹ penyukat ini mikoʹ?”

³ Un dau ue mipa ida: “Ubaʹ pe akeʹ ke lemutu ikem man ca putu ading.

⁴ Tiga hem badaʹ makeʹ: Chen mpi kenai penyukat man Yaya ngebatis kelunan are? Cen Allah taʹin, buk are cen kelunan?”

⁵ Penco re peseket neng ahang ida selepeʹ, un dau re: “Kumpin ne dau le ke mipa ia tupe? Buk le ke kuma ha cen Allah, tuman ne pekini dau neng ilu ʹo: ‘Buk pekina, uban inu hem abeʹ un ngelan neng ia?’

⁶ Buk le kuma ha cen kelunan, atek mung dulu ke lemulo ilu man batu, moʹ mung nte ngelan neng Yaya ca pegawa Tuhan.”

⁷ Ina ukoʹ de mipa Yesus ngan pekini dau: “Abeʹ meʹ tisen cen mpi nai penyukat Yaya idai are.”

⁸ Un dau Yesus neng ida: “Pekina pe abeʹ pe akeʹ ubaʹ ke badaʹ mikem man penyukat inu heʹ uyan ketoʹ puyan ini.”

Kata katuk cen diaʹ petubo banit buaʹ anggur

⁹ Dalau ina te Yesus badaʹ me dulu diaʹ kadoʹ dina ca kata katuk iaʹ pekini dau: “Un ca laki iaʹ uyan ca banit buaʹ anggur. Uʹo ina kun ne cuk kudaʹ usa petubo banit ina kena. Tai kun laki bioʹ ina mecin lepoʹ o, majan dau ketai ie.

¹⁰ Tegoʹ buaʹ anggur ngebuʹan, kun ne cuk ca usa ulaʹ a tai palaʹ diaʹ petubo banit ina, moʹ o ke alaʹ tulat te cen buʹan ne. Un sepuʹo belekaʹ diaʹ petubo dina metung ulaʹ ina, pekarap ia, cuk ia uleʹ kelangan.

¹¹ Uʹo ina kun laki bioʹ ina cuk ca usa ulaʹ a tai laʹa. Kun diaʹ petubo banit dina metung ia pelaʹa, ngan pesaʹe ia, penco re pekarap ia, cuk ia uleʹ kelangan.

¹² Uʹo ina kun ne cuk ulaʹ a iaʹ ketelu. Ida nyakit nyuhat pe ia laʹa, penco re pet ia tahaʹ awang.

¹³ “Dalau ina nuʹo, laki bioʹ iaʹ un banit buaʹ anggur ina pekimet, un kaʹ a: ‘Kumpin puyan nceʹ laʹa taʹin? Tiga heʹ cuk anak penyelum ngkeʹ ini tai, masaʹ de ke nyelama ia ʹo.’

¹⁴ Un sepuʹo, dalau diaʹ petubo banit ina taʹan seʹ kenai anak ina, kun nte pisiu neng ida selepeʹ, un dau re: ‘Ini ne iaʹ ke un ne. Baka, ilu lematai ia, idi banit ini ilu un ne ʹo.’

¹⁵ Penco re pet ia tahaʹ awang banit buaʹ anggur ina, ngan lematai ia.” Kun Yesus lemutu: “Buk pekina, inu iaʹlaki bioʹ iaʹ un banit buaʹ anggur ina ke uyan neng ida diaʹ petubo banit ina ʹo?

¹⁶ Atek ke kenai lematai ida mung lete, penco ho kenaʹ banit buaʹ anggur ina me dulu diaʹ ca diaʹ ke petubo ho.” Lepa diaʹ kadoʹ dina kenahan pekina dau tiraʹ a, un dau re: “Ayen naʹ a pekina.”

¹⁷ Kun Yesus nugen naʹat ida, penco ho lemutu: “Inu sen tiraʹ neng Kitap iaʹ pekini dau: ‘Un sukaʹ iaʹ tukeng amin ban lepa pekaheʹ, ia iaʹ ban tai nuyan sukaʹ tekedeng penyalet amin.’

¹⁸ Aheʹ iaʹ laboʹ neng usun sukaʹ ina, tulang nge ke muʹo perep pegep. Ngan aheʹ iaʹ pencit kuʹun sukaʹ ina, ia ke muʹo jutaʹ panyaʹ koʹ baʹan abu are.”

Putu neng puyan nyuaʹ pupu

¹⁹ Un dalau ina lete diaʹ guru Adet Yahudi ngan diaʹ detaʹu lataʹ kina ten ke dakep Yesus, moʹ de tisen ban man kata katuk ina Yesus alaʹ kata neng ida. Un sepuʹo takut de dulu kina.

²⁰ Uʹo ina kun nte pekelung ia, ngan naʹ ligit me dulu diaʹ mencam ngaloʹ koʹ seʹ diaʹ sebelang. Ida ke pungkeʹ isiu ngan Yesus man kadoʹ naʹan dau re ke lemutu ia, moʹ de ubaʹ ke mekem penyalaʹ mia, apan nte senteng ke dakep ia ngan naʹ ia palaʹ perinta ngan gebenur.

²¹ Un dau diaʹ tai nesek dina kuma me Yesus: “Ahaʹ Guru, ameʹ tisen ban dau tiraʹ koʹ ngan dau katuk koʹ atek teneng. Ameʹ tisen abeʹ koʹ nyelepeʹ kelunan, bang ikoʹ iaʹ menco katuk iaʹ telit iaʹ sihoʹ neng pengubaʹ Allah me kelunan.

²² Ikoʹ badaʹ mameʹ ading. Kumpin tekaʹ baʹan ncoʹ. Tekep taʹin buk ke are salaʹ, un meʹ ke ngesa Katuk Adet Musa buk meʹ nyuaʹ pupu me Kaisar Rum mo?”

²³ Tisen ne Yesus seʹ aken nte, ina ukoʹ penco dau ue neng ida:

²⁴ “Ikem peluhaʹ makeʹ ca liʹap ligit ading. Selu silung ngan ngadan aheʹ kidi?” Un dau re mipa: “Anun Laja Kaisar.”

²⁵ Un dau Yesus mida: “Buk ke pekina, naʹ ne me Kaisar inu iaʹ anun Kaisar, ngan naʹ me Allah inu iaʹ anun Allah.”

²⁶ Abeʹ de mencam ke pungkeʹ tiraʹ ngan ne kata dulu kina. Ina ukoʹ abeʹ de pisiu, bang meba tekaʹ de neng dau ue mipa.

Ca putu neng puyan beteʹ cen patai

²⁷ Nai kun palai diaʹ Seduki palaʹ Yesus. Moʹ ida diaʹ badaʹ abeʹ un diaʹ matai ke nai mudip laʹa.

²⁸ Kun Seduki dina lemutu Yesus, un dau re: “Ahaʹ Guru, Musa lepa nyurat ca katuk milu, pekini dau ue: ‘Buk ca laki matai, balu ne leto ho, ngan abeʹ de dua un anak, tekep te cenganak usa neng iaʹ matai ina alaʹ balu ina leto ho, apan ne un anak me cenganak ke iaʹ lepa matai ina.’

²⁹ Ca liwai ie un tujoʹ usa laki neng pemadeʹ de. Kun iaʹ ading ina alaʹ leto, penco ho matai, abeʹ de un anak.

³⁰ Un iaʹ kedua ha alaʹ balu ina leto ho pelaʹa. Matai pe ia laʹa.

³¹ Ngan pekina pe iaʹ ketelu ue alaʹ balu ina pelaʹa. Matai pe ina laʹa. Pekina te mung tujoʹ neng pemadeʹ de dina tai matai, ketoʹ de abeʹ un mela.

³² Uʹo ina matai ne leto ina nuʹo.

³³ Kumpin ne tegoʹ tau diaʹ matai ke ngeliwet ke mudip ʹo, aheʹ iaʹ atek ke un leto ina neng ahang ida mung ʹo? Moʹ toʹ de tujoʹ usa ina lepa laki ie mung.”

³⁴ Un dau Yesus mipa ida: “Laki ngan leto iaʹ mudip dalem udip ini, baloʹ puyan nte pekiban ngan ngiban.

³⁵ Un sepe kelunan iaʹ Tuhan Allah ke kuma ha tekep kenai ngeliwet mudip cen patai re ngan tai mudip kedalem udip iaʹ kenai ʹo, abeʹ de pepeto.

³⁶ Moʹ un seʹ de koʹ baʹan melikat, abeʹ un patai neng ida laʹa. Ida ne diaʹ atek anak Allah, moʹ Allah iaʹ pudip ida cen patai re.

³⁷ Musa iaʹ ban badaʹ un kelunan matai ke nai numpak mudip pelaʹa. Atek luhaʹ te tiraʹ ina dalem jo tiraʹ Musa neng kayu jue iaʹ tutung are, moʹ o naʹ Tuhan atek Allah iaʹ anun Ibrahim, ngan Allah anun Isak, ngan Allah anun Yakup.

³⁸ Un sen dau ina badaʹ ban ia atek Allah neng kelunan iaʹ mudip. Abeʹ e Allah neng kelunan iaʹ matai, moʹ ketoʹ de telu mudip me Allah.”

³⁹ Un dau palai guru Adet Yahudi neng Yesus: “Ahaʹ Guru, teneng te dau hoʹ ne.”

⁴⁰ Abeʹ ne ida makang lemutu ca inu neng ia ne laʹa.

Putu neng Keristus iaʹ man pungu udip

⁴¹ Un dau Yesus palaʹ ida: “Kumpin dulu kuma Keristus, laki iaʹ man pungu udip, ban mela Daut tupe?

⁴² Moʹ Daut tengen kuma dalem Kitap Kentau Masmur: ‘Tuhan Allah iaʹ ban cuk Tuhan nceʹ: Madung ne ikoʹ kini tahaʹ taʹu akeʹ,

⁴³ pa heʹ ke cuk ketoʹ bunoʹ koʹ ke tunuk palaʹ ikoʹ, ke nuyan koʹ baʹan nten me taket coʹ.’

⁴⁴ Buk ke pekina dau Daut naʹ ia Tuhan, kumpin ketai dulu naʹ ia anak Daut?”

Dau Yesus pejagaʹ dulu neng guru Adet Yahudi

⁴⁵ Tegoʹ mpun dulu diaʹ kadoʹ kina ngeringa dau Yesus, kun ne pisiu ida diaʹ bayaʹ katuk ke, un dau ue:

⁴⁶ “Jagaʹ le ikem neng guru Adet Yahudi. Ida diaʹ ubaʹ masat un gelam sapai dadoʹ lampeʹ. Ida diaʹ malaʹ dulu ke nyelama ida ngalang pasen. Ida lemileʹ adan kaʹ juma mpun kaʹ amin sebayang Yahudi, pekina pe kukoʹ diaʹ tiga tegoʹ dulu pemung uman.

⁴⁷ Ida diaʹ ngeratang amin leto balu pa muʹo inu re. Uʹo ina re ngelaham ngan ngedadoʹ dau re lemameʹ neng Allah. Ida iaʹ ke sihoʹ ukum iaʹ lapa bahat ʹo.”