KULUSE 2 - Kenyah New Testament

¹ Talan ne akeʹ badaʹ mikem kumpin ban nceʹ lepa muhat pegayeng mikem are, ngan me kelunan diaʹ kaʹ lepoʹ Ludikia, ngan pekina pe me mung nte diaʹ abeʹ un taʹan akeʹ lepe.

² Un pe akeʹ ti pekina apan kimet de tai sangan kuʹun tempa, ngan apan nte senteng tai pebulung neng ca le pengemalaʹ de, mentung nte ngelan ngan tekaʹ keluʹung kimet de iaʹ pesente palaʹ tentan katuk telit ina. Cen diaʹ pekina ne ida ketai tisen katuk Allah iaʹ linget ina, iaʹ ina Keristus tengen.

³ Keristus ne alet pamen iaʹ ke mesik mung penudi ngan penisen Allah iaʹ suhuk, koʹ baʹan ca galen are.

⁴ Tuman ina akeʹ badaʹ mikem, ayen ncem pedayo aheʹ aheʹ pe iaʹ ke pelingu ikem man tiraʹ iaʹ abeʹ un semantet, naʹ pe tiraʹ ina tiga ngan lanya dau.

⁵ Ban ne naʹ pe usa heʹ coʹ neng ikem, un sepuʹo berua heʹ un ngan ncem. Bangen tekaʹ keʹ taʹan ban kuaʹ salet tekejeng ngkem dalem pengelan ncem palaʹ Keristus.

Pengudip kelunan Keristin iaʹ dema

⁶ Uban ncem lepa alaʹ Keristus Yesus, Tuʹa hem, ina ukoʹ mudip ne pebeka kimet ngan ne.

⁷ Ngepakat ne dalem Keristus, ngan medeng ne pengudip kem pebesun neng Keristus apan pengelan ncem tai un pit ngan pali, koʹ baʹan katuk iaʹ ikem lepa tisen are. Tiga hem lemuto nyuaʹ tiga saheʹ neng singket naʹan pemuyan Tuhan.

⁸ Tuman ina, tiga hem jagaʹ tiga le, apan mele aheʹ aheʹ pe abeʹ un sukat ke ngebabak ikem man penudi tiraʹ kelunan iaʹ palo, ngan iaʹ abeʹ un semantet. Ngan tiraʹ ina abeʹ e nai cen Keristus, di lareʹ tiraʹ ina nai cen katuk adet kelunan, peging ngan bali jaʹat diaʹ ngaren beluaʹ awang.

⁹ Toʹ layen udip Allah lepa daʹam dalem udip usa Keristus.

¹⁰ Ngan moʹ kem pebeka ngan Keristus, palaʹ ikem lete Allah lepa naʹ pengudip iaʹ sangan kuʹun peniga ina. Ban ne Keristus ina ne iaʹ atek bioʹ neng usun toʹ diaʹ ngaren dulu, ngan diaʹ ngkang penyukat.

¹¹ Ikem lepa sihoʹ adet sunat iaʹ ca naʹan puyan, abeʹ un sunat ina iaʹ nuyan kuʹun ujoʹ kelunan, di lareʹ sunat ina iaʹ nuyan kuʹun Keristus tengen, iaʹ ina puyan iaʹ nakau ikem cen penyukat usa hem iaʹ un penyalaʹ ini.

¹² Ban ne midan ncem lepa sihoʹ batis, dalau ina lete ikem tai tanem pemung ngan Keristus. Ngan kaʹ dalem batis ina pe ikem nai beteʹ pemung ngan Keristus, ban tuman pengelan ncem iaʹ pedapit ikem palaʹ penyukat Allah iaʹ pebeteʹ Keristus cen patai ie.

¹³ Cen naʹaʹ ikem lepa matai neng puyan udip berua hem ban kuʹun penyalaʹ kem, ngan pekina pe moʹ kem diaʹ tahaʹ awang lepoʹ Yahudi diaʹ abeʹ un tisen Katuk Adet. Un sepuʹo naʹkini Allah lepa pudip berua hem pemung ngan Keristus. Allah lepa sau mung penyalaʹ le.

¹⁴ Ngan ia lepa lemataʹ surat utang le iaʹ pesupeʹ ilu, peging ngan adet te iaʹ lemenaʹ ilu. Lepa ne ia sau dina mung, moʹ o napek ke neng usun kayu tecek.

¹⁵ Neng usun kayu tecek are, Keristus lepa pawang usa ha kelap cen mung bali diaʹ ngaren kelunan, ngan diaʹ ngkang penyukat. Ngan kun ne uyan ida sen penaʹat kelunan kadoʹ, dalau ue ngkin ida neng julut diaʹ salut, iaʹ kebadaʹ ia un usun neng toʹ penyukat bali dina.

¹⁶ Tuman ina, ayen ncem pedayo ca kelunan mele aheʹ aheʹ pe iaʹ ke uyan palan neng penguman ncem, ngan neng inu iaʹ ikem nisep, ngan pekina pe neng tau bioʹ, ngan puyan adet neng bulan mading, ngan pekina pe neng Tau Kelineʹ.

¹⁷ Mung adet diaʹ pekina bang ca lingai neng puyan iaʹ ke nai ʹo. Un sepuʹo iaʹ lan ne, iaʹ ina Keristus.

¹⁸ Buk ca kelunan mele aheʹ aheʹ pe iaʹ ke pesalaʹ ikem, ayen ncem alaʹ dau ue buk ke badaʹ ngadan ne tengen bioʹ neng ʹo ikem ban kuʹun puyan nyingan penaʹat te. Ina ne ia lemejen dulu ngaloʹ ngelibaʹ tawai, mentung nge nyelama palaʹ melikat. Penawai kelunan iaʹ pekina atek jum, ngan abeʹ un inu ukoʹ ketai sen isiu ue, moʹ kimet te, kimet kelunan tuaʹ le.

¹⁹ Abeʹ e petuk ngan Keristus iaʹ ulu neng usa ina laʹa. Keristus ne iaʹ pungu mung usa ina, ngan ia ne iaʹ lemakan ne. Ngan ia pe iaʹ petuk usa ina man buku ngan uhat te, idi ie nai mudip bayaʹ layen udip iaʹ nai cen Allah.

Matai ngan mudip pemung ngan Keristus

²⁰ Lepa ne ikem matai pemung ngan Keristus, ngan lepa ne ikem takau cen penyukat bali diaʹ ngaren usun tanaʹ ini. Buk ke pekina, moʹ inu hem mudip koʹ baʹan seʹ usun tanaʹ ne iaʹ ngkang ikem? Ngan adeʹ kem bayaʹ dau katuk ukum iaʹ kuma ha:

²¹ “Malan ncem man ini,” ngan: “Malan ncem ten ke uman ina,” ngan: “Malan ncem ngkang ina”?

²² Mung diaʹ pekina abeʹ un bang nge buk kem lepa ban kanan ne. Ban ne ukum ngan katuk adet dina tai nuyan kuʹun kelunan tuaʹ le.

²³ Lan te un seʹ penudi neng katuk ina, iaʹ ina puyan lemejen kelunan nyelama palaʹ melikat, ngan ngaloʹ ngelibaʹ tawai, ngan puyan peketa usa man kudaʹ naʹan palan, un sepuʹo mung diaʹ pekina, abeʹ un bang nge neng puyan iaʹ ke pesupeʹ asam penyaheʹ usa le.