KULUSE 1 - Kenyah New Testament

¹ Cen Paulus iaʹ bayaʹ pengubaʹ Allah tai nuyan lawa Keristus. Pemung ngan cenganak le Timutius,

² akeʹ pekatu surat ini palaʹ diaʹ anun Allah kaʹ lepoʹ Kuluse, ida diaʹ tai nuyan cenganak le diaʹ semamet dalem Keristus. Awaʹ pe Allah iaʹ anun le ke naʹ pengelesau ue ngan udip iaʹ tadan mikem.

Temameʹ iaʹ nyuaʹ tiga saheʹ

³ Tegoʹ meʹ lemameʹ mikem, lemuto meʹ nyuaʹ tiga saheʹ palaʹ Allah iaʹ Amai Tuhan le Yesus Keristus,

⁴ moʹ meʹ lepa kenahan denga puyan pengelan ncem palaʹ Keristus Yesus, ngan pekina pe neng puyan malaʹ kem palaʹ mung diaʹ anun Allah.

⁵ Dalau tading katuk telit, iaʹ ina Denga Injil, nai abeʹ palaʹ ikem are, ikem lepa kenahan neng puyan ca tebelum iaʹ Denga Injil ke mencai mikem. Ina tuman pengelan ncem ngan pengemalaʹ kem ke pebesun neng puyan inu iaʹ ikem ke nebelum ina, iaʹ Allah ngedemun tiga mikem kaʹ surga.

⁶ Denga Injil, iaʹ tai libut pa tipo usun tanaʹ ini, ngkin ca peniga palaʹ kelunan, koʹ baʹan puyan ne nai libut neng ahang ikem cen tau tading ngkem kenahan puyan pengelesau Allah iaʹ ia lebang naʹ ina, ngan mentung ngkem tisen lan neng peniga ina.

⁷ Ikem kenahan puyan ina cen Ipapras, ca ulaʹ iaʹ ameʹ malaʹ dalem Tuhan, ngan iaʹ kuaʹ pegayeng ngan meʹ. Sereket ia saliu ameʹ. Ipapras ne ca usa iaʹ tudep dalem gayeng Keristus.

⁸ Ia lepa badaʹ mameʹ neng puyan pengemalaʹ iaʹ Berua Tuhan lepa naʹ mikem.

⁹ Tuman ina, cen tading meʹ kenahan denga puyan ncem, lemuto meʹ lemameʹ mikem. Ameʹ lemameʹ mikem apan Tuhan Allah ke naʹ penyukat mikem, apan ncem tisen pengubaʹ a pa ha daʹam, ngan pekina pe penudi ngan penisen iaʹ Berua Tuhan ke naʹ mikem.

¹⁰ Lepa ina, ina le ikem sukat ke mudip bayaʹ pengubaʹ Tuhan, ngan lemuto uyan inu iaʹ sihoʹ neng pengubaʹ a. Ngan ikem ke un usun neng toʹ gayeng iaʹ tiga, mentung penisen ncem neng puyan Tuhan Allah kenai un pit.

¹¹ Awaʹ pe mung pengali iaʹ nai cen penyukat peniga Allah ina ke ngepali ikem, apan ncem senteng nengayet pedenaʹ tawai neng toʹ naʹan penaru.

¹² Bangen tekaʹ le nyuaʹ tiga saheʹ palaʹ Allah iaʹ lepa uyan ikem tekep ke alaʹ tulat cem neng puyan iaʹ Allah lepa petenup me diaʹ anun ne dalem pengaren Allah iaʹ sangan kuʹun serema ha.

¹³ Allah lepa sau ilu cen penyukat ntem, sulo ho ngkin ilu kaʹ dalem pengaren Anak ke iaʹ penyelum me.

¹⁴ Ngan kuʹun ne ia pawang ilu tai kelap cen iaʹ jaʹat, ngan mung penyalaʹ le tai pesau.

Layen Keristus ngan gayeng Keristus

¹⁵ Layen Allah iaʹ kelunan abeʹ un taʹan, lepa luhaʹ dalem layen Keristus. Ia ne Anak ading iaʹ paren bioʹ neng ʹo mung inu iaʹ Allah lepa uyan.

¹⁶ Allah kanan Keristus man ne uyan mung inu iaʹ un kaʹ surga ngan kusun tanaʹ. Mung inu iaʹ ilu taʹan, ngan inu iaʹ ilu abeʹ un taʹan, ngan pekina pe mung penyukat iaʹ mata kelunan abeʹ un taʹan, Allah uyan mung inu dina ban kuʹun Keristus, ngan tuman Keristus lete.

¹⁷ Kena inu inu un, Keristus lepa un. Ngan ban tuman gaham Keristus, mung inu un neng ukoʹ de.

¹⁸ Keristus ina atek ulu neng usa ha, iaʹ ina Mpun diaʹ ngelan ia. Ngan puʹun udip usa ina, iaʹ ina Keristus. Ia ne Anak ading iaʹ numpak mudip cen patai, apan ne ia tengen senteng ke alaʹ ukoʹ iaʹ ading ading neng toʹ naʹan inu.

¹⁹ Allah iaʹ metep kimet neng ata ha tengen, apan Anak ina ke un mung layen Allah iaʹ daʹam.

²⁰ Ban kuʹun Anak ina lete, Allah petuket ke uyan ca janan man mung inu ke nai ngeliwet palaʹ ia laʹa. Allah uyan udip iaʹ tadan milu ban tuman Anak ke iaʹ lepa matai neng usun kayu tecek. Ngan man janan ini ne Allah ke ngkin mung inu ke nai ngeliwet palaʹ ia, tiga diaʹ kusun tanaʹ, pekina pe diaʹ kaʹ surga.

²¹ Cen naʹaʹ ikem ne kelunan diaʹ coʹ neng Allah. Ikem ne diaʹ bunoʹ Allah ban tuman pemuyan ncem ngan kimet cem iaʹ jaʹat.

²² Un sepuʹo naʹkini, kuʹun Anak ke iaʹ matai neng usun kayu tecek, Allah lepa uyan ikem diaʹ cenganak ke, apan ne ke ngkin ikem nai ngejuma ia, koʹ baʹan kelunan diaʹ buheʹ, dema kimet, ngan abeʹ un ca penginteʹ.

²³ Tuman ina, tekep lete ikem penco tudep neng usun tentan iaʹ salet ina. Ngan ayen ncem pedayo dulu ke ngala ikem neng tebelum ngkem iaʹ ikem lepa alaʹ tegoʹ kem kenahan neng tebelum ngkem iaʹ ikem lepa alaʹ tegoʹ kem kenahan dau Denga Injil ina are. Akeʹ ne Paulus iaʹ lepa tai nuyan ulaʹ ban tuman Denga Injil ina, iaʹ ina Denga Injil iaʹ lepa ban pedenga palaʹ kelunan kusun tanaʹ ini.

Puyan Paulus pubo Mpun diaʹ ngelan Tuhan

²⁴ Naʹkini bangen tekaʹ kimet ceʹ kuʹun penuyen iaʹ un neng akeʹ ban tuman ikem. Ban ne man penuyen usa heʹ ini, akeʹ sukat ke mepo ngan pesukung penuyen Keristus iaʹ caʹ lelum ban tuman usa ha, iaʹ ina Mpun diaʹ ngelan ia.

²⁵ Allah lepa uyan akeʹ ca ulaʹ me Mpun diaʹ ngelan Tuhan, mentung nge naʹ tulat gayeng ini makeʹ, apan ne ke ngkin ca peniga mikem. Ngan tulat gayeng ini ke badaʹ mung sen katuk Allah,

²⁶ iaʹ ina katuk Allah iaʹ linget moʹ o mekep pe neng ata kelunan ngajan udip cen naʹaʹ. Un sepuʹo naʹkini, Allah lepa peluhaʹ a palaʹ diaʹ anun ne.

²⁷ Sedep Allah, iaʹ ina apan katuk ke iaʹ linget ina kenai luhaʹ palaʹ diaʹ anun ne. Allah lepa petenup katuk linget, iaʹ sangan kuʹun serema peniga ina, me mung lepoʹ kusun tanaʹ. Katuk linget ina, iaʹ ina Keristus mudip dalem ikem; iaʹ sen ne, ikem nebelum ke un tulat neng serema peniga Allah.

²⁸ Ina tuman meʹ pedenga Keristus palaʹ mung kelunan. Ameʹ pejagaʹ dau me kelunan, ngan pekatuk ida man pa tekaʹ penudi meʹ, apan meʹ sukat ke ngkin ida, singket usa re, ke ngejuma Allah koʹ baʹan kelunan iaʹ sukung bioʹ pengudip berua ha, tuman pebeka tawai ie ngan Keristus.

²⁹ Tuman ina, jengan ngan nengayet tekaʹ keʹ ke kanan penyukat pali, iaʹ Keristus naʹ makeʹ, iaʹ pegayeng dalem usa heʹ.