IPESUS 6 - Kenyah New Testament

Anak ngan tuʹa

¹ Mung ngkem anak anak, kanan le bayaʹ dau amai ngan ueʹ kem, moʹ ina iaʹ teneng dalem Tuhan.

² Un dau dalem Kitap: “Tunuk ne neng ueʹ ngan amai hem.”

³ Un dau ue laʹa: “Apan ncem tai tiga, ngan majan mudip neng usun tanaʹ ini.” Pekina dau katuk ukum Allah iaʹ ading dau ke petuket ke naʹ ca inu peging ngan katuk ke.

⁴ Mung ngkem diaʹ amai, ayen ncem ti tiraʹ iaʹ ke pebuseʹ anak kem. Di lareʹ petubo ne ida, ngan pekatuk ne ida neng iaʹ telit ngan daʹam dalem Tuhan.

Diaʹ ulaʹ ngan tuʹa

⁵ Mung ngkem diaʹ ulaʹ, tiga hem kanan bayaʹ dau iaʹ ke tuʹa hem kusun tanaʹ ini, ngan tangen, ngan jaya, ngan sebelang tawai hem, seleket koʹ baʹan neng Keristus are.

⁶ Ayen titin buk tuʹa hem ke un le ikem sanget diseʹ, moʹ kem ubaʹ ia ke pada ikem, di lareʹ koʹ baʹan ncem ulaʹ Keristus uyan ne pengubaʹ Allah ngan mung tekaʹ kimet cem.

⁷ Lemejo ne gayeng ngkem ngan bangen tawai hem me Tuhan, ayen koʹ baʹan neng kelunan are.

⁸ Tiga hem ngetisen, inu pia ulaʹ, inu piaʹ diaʹ abeʹ un ulaʹ, Tuhan lete iaʹ ke nyuaʹ neng singket usa re, bayaʹ ban pengetiga gayeng nte.

⁹ Mung ngkem diaʹ tuʹa gayeng, pekina te ikem uyan puʹo neng ulaʹ kem. Ayen ncem caʹ ngeretaʹ laʹa. Petawai, un iaʹ Tuʹa ulaʹ dina, ia lete Tuʹa hem kaʹ surga. Abeʹ e selepeʹ neng kelunan.

Toʹ gelam pepatai cen Allah

¹⁰ Kebayaʹ a, alaʹ ne pit pengali hem dalem puyan ncem pebeka tawai dalem Tuhan, moʹ Tuhan iaʹ ke naʹ pengali penyukat te mikem.

¹¹ Ikem kanan ne toʹ senganan pepatai iaʹ Allah naʹ mikem, apan ncem senteng nekedeng nyekang mung penudi aken Bali Jaʹat.

¹² Moʹ abeʹ le ke pekutung ngan kelunan. Ilu ke pekutung ngan mung penyukat bali iaʹ uban nai cen beluaʹ awang, iaʹ ina bali diaʹ ngkang usun tanaʹ, ngan diaʹ ngkang penyukat lepoʹ, ngan toʹ penyukat iaʹ ngaren dulu ngajan udip ntem ini.

¹³ Ina ukoʹ kanan ne mung senganan iaʹ Allah naʹ mikem naʹkini, apan ncem senteng nekedeng nyekang toʹ sudup bali neng ikem tegoʹ kenai tau iaʹ jaʹat ʹo, apan tai lepa hem ti ngan bunoʹ kem, ban un lete ikem jeng nekedeng neng ukoʹ kem.

¹⁴ Moʹ ina, petenup ne ngan salet tekejeng ngkem. Un ne sereteng tuʹing, ina penelit cem. Ngan un ne sapai malat, ina peneneng ngkem.

¹⁵ Ngan un ne sepatu, ina penyanget cem tai badaʹ Denga Injil neng udip iaʹ tadan.

¹⁶ Ngan lemuto hem kanan kelempit pengelan ncem, moʹ man ne ikem sukat ke lemataʹ toʹ langan luten iaʹ nai cen Bali Jaʹat.

¹⁷ Ngan un ne beluko malat, ina pengudip kem dalem Tuhan. Ngan kanan ne bahing Berua Tuhan, iaʹ ina tiraʹ Allah.

¹⁸ Uyan mung dina dalem temameʹ kem lemuto, mentung nyat Allah mepo ikem. Lemameʹ ne lemuto-uto bayaʹ ajak Berua Tuhan. Moʹ ina jagaʹ ne, ngan nengayet ne pa kumpin, ngan lemuto ne lemameʹ me mung diaʹ anun Allah.

¹⁹ Laʹa lemameʹ pe makeʹ, apan Allah ke naʹ tiraʹ katuk makeʹ buk keʹ ke petiraʹ, idi heʹ peluhaʹ sen iaʹ linget dalem Denga Injil ngan tempa tekaʹ.

²⁰ Moʹ kuʹun Denga Injil ini heʹ tai ca lawa Tuhan, naʹ pe naʹkini heʹ sihoʹ sepin. Ina ukoʹ lemameʹ kem makeʹ, apan nceʹ tempa ke badaʹ Denga Injil ngan isiu iaʹ tekep akeʹ ke pisiu.

Nyaheʹ ne

²¹ Kenai Tikikus, cenganak iaʹ ilu malaʹ, iaʹ semamet petubo gayeng Tuhan, nai palaʹ ikem. Ia ke badaʹ mung denga heʹ mikem, ina le ikem tai tisen diseʹ keʹ, ngan kumpin puyan nceʹ.

²² Inaʹ ukoʹ keʹ cuk ia nai palaʹ ikem, apan ncem tisen seʹ puyan meʹ mung, apan ne ke naʹ ca iaʹ ke petangen neng penawai hem.

²³ Awaʹ pe Allah iaʹ Amai Bioʹ, ngan Tuhan Yesus Keristus, ke naʹ udip iaʹ tadan ngan pengelesau peging penyalet pengelan me toʹ cenganak le.

²⁴ Awaʹ pe pengelesau Allah iaʹ ia lebang naʹ milu ke petugung ngan mung diaʹ malaʹ neng Tuhan le Yesus Keristus, man pengemalaʹ iaʹ abeʹ un tisen ketai muʹo.