Biblia Todo Logo
Bìoball air-loidhne

- Sanasan -

IPESUS 2 - Kenyah New Testament


Cen patai tai palaʹ udip

1 Cen kena, lepa ne berua hem matai neng ikem are, moʹ kuʹun ban puyan kesa hem ngan kuʹun penyalaʹ kem.

2 Dalau ina are, ikem bayaʹ diseʹ puyan jaʹat kusun tanaʹ ini. Ikem bayaʹ dau bali diaʹ ngkang penyukat kaʹ beluaʹ awang. Bali dina diaʹ man dulu diaʹ muau neng Allah naʹkini.

3 Iaʹ lan ne, mung le pekuaʹ ngan nte cen kena are. Dalau ina, seʹ le mudip bayaʹ penyaheʹ usa le, moʹ le pele pengubaʹ kimet ngan penawai usa le tengen. Ngan lepa ne ilu koʹ baʹan mung dulu diaʹ ca are, diaʹ tekep ke sihoʹ kenca Allah ʹo.

4 Un sepuʹo bioʹ laleʹ pengelesau Allah, ngan bioʹ laleʹ pengemalaʹ a neng ilu,

5 pa ha pudip ilu pemung ngan Keristus. Naʹ pe berua le matai dalem usa le tuman ban puyan kesa le, un sepuʹo Allah pudip ilu moʹ kuʹun pengelesau ue.

6 Un pelaʹa, cen puyan le pebeka tawai dalem Keristus, ia lepa pudip ilu pemung ngan ne, ngan padung ilu pemung pengaren ngan ne kaʹ surga.

7 Pekina Allah uyan ne, apan ceng toʹ dadoʹ udip bayaʹ ʹo, ia ke peluhaʹ toʹ bioʹ seʹ ban pengelesau ue kuʹun pengemalaʹ a neng ilu dalem Keristus Yesus.

8 Moʹ tuman pengelesau ue, Allah pudip ikem kuʹun pengelan ncem neng Keristus. Abeʹ e kuʹun pemuyan ncem tengen, bang ca pengencai cen Allah tuaʹ le.

9 Abeʹ un kelunan iaʹ senteng ke jum neng ini, moʹ abeʹ e tai nuyan kuʹun gayeng kelunan.

10 Moʹ Allah iaʹ uyan ilu. Ia pemading ilu neng puyan ne pebeka tawai le dalem Keristus, apan le lemuto ke pegayeng iaʹ tiga utung udip le, neng gayeng gayeng iaʹ Allah ban petenup milu cen kena.


Ca le penawai le dalem Keristus

11 Tiga hem petawai, ikem dini, abeʹ kem lepoʹ Yahudi cen naʹaʹ, ina ukoʹ lepoʹ Yahudi kuma ikem kelunan diaʹ abeʹ un sunat. Bang ida tengen le iaʹ ida kuma un adet sunat. Isiu ini bang neng luhan tuaʹ le.

12 Moʹ un ncem dalau ina tahaʹ awang neng Keristus. Abeʹ kem kahum neng dulu diaʹ Allah ban lemileʹ dina, moʹ kem kelunan bulen. Ngan abeʹ pe ikem sihoʹ neng tiraʹ iaʹ pebeka ngan Allah, iaʹ Allah petuket me diaʹ anun ne. Dalau hem mudip kusun tanaʹ ini cen naʹaʹ are, abeʹ un tebelum ngkem, abeʹ pe ikem tisen Allah.

13 Un ne naʹkini ʹo, pebeka ne tawai hem dalem Keristus Yesus. Ikem diaʹ ban kerada cen kena, lepa ne ia pekenyeng ikem kuʹun musa dahaʹ Keristus.

14 Moʹ Keristus tengen iaʹ ngkin udip iaʹ tadan neng ahang ilu selepeʹ, moʹ o uyan lepoʹ Yahudi ngan lepoʹ diaʹ ca tai pebulung neng ca le. Man usa ha tengen ia ngasing nting ahang nte, iaʹ ban ukoʹ de pebunoʹ are.

15 Moʹ lepa ne Keristus sau adet Yahudi are, peging ngan katuk ukum ngan mung palan ne, apan dua naʹan lepoʹ ina ketai nuyan ca lepoʹ mading, iaʹ un pebeka tawai dalem usa ha tengen. Pekina ne ketai ie nuyan udip iaʹ tadan.

16 Moʹ kuʹun patai ie neng kayu tecek, Keristus lepa pesalai puyan kimet iaʹ jaʹat. Man tecek ke ina are, Keristus pebulung dua naʹan lepoʹ dina ngan ngkin ida uleʹ ca le usa palaʹ Allah.

17 Pekina pe Keristus nai pedenga Denga Injil neng puyan udip iaʹ tadan milu mung, tiga pe diaʹ tahaʹ awang lepoʹ Yahudi diaʹ ban coʹ neng Allah, pekina pe lepoʹ Yahudi iaʹ ban nyeng neng Allah.

18 Moʹ kuʹun Keristus, mung le sukat tai dalem ca le Berua nyeripa Amai Bioʹ, inu pia Yahudi, pekina pe lepoʹ diaʹ ca.

19 Cen diaʹ pekina, ikem lepoʹ diaʹ tahaʹ awang Yahudi, abeʹ kem kelunan bulen buk are tutang laʹa. Bang ca le ne lepoʹ kem ngan diaʹ anun Allah, ngan ca umaʹ le ngan diaʹ pemanak Allah.

20 Buk alaʹ kata cen amin, seʹ e medeng ikem neng usun ca data tanaʹ iaʹ nuyan kuʹun lawa Injil ngan pegawa Tuhan. Keristus Yesus tengen iaʹ sukaʹ tekedeng nge.

21 Ngan Keristus lete iaʹ pedalit ngan pedengkep mung umaʹ ina, sulo ho un pit un pit kuʹun ne, nuyan ca umaʹ palan iaʹ buheʹ kedalem Tuhan.

22 Ikem lete iaʹ un pebeka tawai dalem Keristus, mentung ngkem pebulung ngan mung le diaʹ ca, ke nuyan uma iaʹ ukoʹ Allah mudip kuʹun Berua ha.

Kenyah New Testament © Bible Society of Malaysia, 1984. 

Bible Society of Malaysia
Lean sinn:



Sanasan