IBERANI 7 - Kenyah New Testament

Laki detaʹu Makisidik

¹ Makisidik iaʹ paren bioʹ lepoʹ Salim, ngan ca detaʹu Allah iaʹ Atek Mpau. Cen naʹaʹ Ibrahim ngayau ngan lematai kudaʹ kudaʹ paren dulu. Dalau kenai ie uleʹ, Makisidik petegoʹ ngan ne, sulo ia naʹ peniga mia.

² Penco Ibrahim naʹ ca tulat puloʹ cen mung inu iaʹ ban penalan ne. (Sen iaʹ ading neng ngadan Makisidik, ina ne “Paren Peneneng,” uban ia paren lepoʹ Salim, Un sen ngadan ne laʹa, “Paren Penadan.”)

³ Abeʹ un aheʹ iaʹ tisen amai ngan ueʹ Makisidik, pekina pe aheʹ diaʹ tepun ne. Abeʹ un aheʹ tisen midan ne pempet, ngan pekina pe patai ie. Koʹ baʹan Anak Allah pe ia. Ia petem ca detaʹu pa majan.

⁴ Uban pekina, luhaʹ palaʹ ikem kumpin ban pengebioʹ o. Tepun le Ibrahim naʹ mia ca tulat puloʹ cen mung inu iaʹ ban penalan ne cen kayau are.

⁵ Katuk Adet Musa iaʹ cuk detaʹu diaʹ uban mela Liwi ke papit ca tulat puloʹ cen mung lepoʹ Israil. Naʹ pe ida kuaʹ mela cen Ibrahim, ida papit lete cen ida panak loʹ.

⁶ Abeʹ Makisidik iaʹ mela cen Liwi, un sepuʹo ia papit ca tulat puloʹ cen Ibrahim. Kenuen pe Ibrahim iaʹ alaʹ tuket cen Tuhan Allah, Makisidik iaʹ naʹ peniga mia.

⁷ Tisen te ilu mung uban kelunan iaʹ naʹ peniga un pelapa bioʹ cen ʹo kelunan iaʹ alaʹ peniga.

⁸ Buk le pekimet puyan detaʹu, kelunan diaʹ ke matai iaʹ papit ca tulat puloʹ. Un sepuʹo buk le pekimet Makisidik, ca usa iaʹ mudip iaʹ papit ca tulat puloʹ, koʹ baʹan dau dalem Kitap.

⁹ Tegoʹ Ibrahim nyuaʹ ca tulat puloʹ, seleket Liwi iaʹ nyuaʹ a lete, (uban diaʹ mela Liwi diaʹ papit ca tulat puloʹ).

¹⁰ Naʹ pe Liwi abeʹ un nai pempet lepe, seleket te un dalem usa tepun ne Ibrahim tegoʹ o petegoʹ ngan Makisidik.

¹¹ Moʹ Allah iaʹ naʹ Katuk Adet te me lepoʹ Israil bayaʹ uban puyan detaʹu Liwi. Buk gayeng detaʹu Liwi lepa uban daʹam, abeʹ titin kenai luhaʹ ca naʹan detaʹu bayaʹ ban tuk detaʹu Makisidik, ca naʹan neng anun Harun.

¹² Tegoʹ mung detaʹu tai seliwa, abeʹ senteng are adet pe tai seliwa lete.

¹³ Mung isiu ini pesen neng ia iaʹ Tuhan le, ca naʹan mela ha. Nyahut abe un ca usa mela ha iaʹ ngkang gayeng detaʹu kata padung pengencai are.

¹⁴ Ilu mung tisen ia lepa nai pempet ca kelunan iaʹ uban mela cen Yahudi. Abeʹ Musa pisiu ngadan mela Yahudi tegoʹ o badaʹ puyan detaʹu.

Ca naʹan detaʹu kuaʹ baʹan Makisidik

¹⁵ Luhaʹ kuʹo ne puyan ini. Ca naʹan detaʹu lepa luhaʹ koʹ baʹan Makisidik ne ia.

¹⁶ Abeʹ e nuyan detaʹu kuʹun adet ngan palan kelunan. Un sepuʹo ia nuyan detaʹu kuʹun penyukat ca udip iaʹ abeʹ senteng ketai kuʹo.

¹⁷ Uban un dau Kitap iaʹ kuma: “Ikoʹ iaʹ nuyan ca detaʹu pa majan, bayaʹ tuk puyan detaʹu Makisidik.”

¹⁸ Moʹ ina, ukum katuk iaʹ puʹun lepa nahung uban ne lemaʹ, ngan abeʹ un uyan bang.

¹⁹ Uban Katuk Adet Musa abeʹ senteng pedaʹam ca inu pe. Un sepuʹo naʹkini un ca tebelum iaʹ pelapa tiga, iaʹ kenai dapit neng ilu. Kuʹun puyan ini ne ilu ke ngejuma Tuhan Allah.

²⁰ Pit ini pelaʹa un dau santet Allah. Tegoʹ diaʹ ca tai nuyan detaʹu are, abeʹ un dau santet iaʹ pekina.

²¹ Un sepuʹo Yesus lepa nuyan ca detaʹu kuʹun ca santet tegoʹ Allah kuma neng ia: “Tuhan lepa uyan ca santet, ngan abeʹ kimet te ke pekaliu: ‘Ikoʹ iaʹ nuyan detaʹu pa majan.’ ”

²² Ina ukoʹ tekajaʹ puyan tuket ini, moʹ o salet kuʹun santet are, nuyan ca tuket iaʹ pelapa tiga, iaʹ kedatung kuʹun Yesus.

²³ Ca ukoʹ o tekajaʹ laʹa: kadoʹ detaʹu diaʹ ca are, uban nte luhaʹ matai. Abeʹ de senteng metuk gayeng nte majan.

²⁴ Un sepuʹo Yesus iaʹ mudip pa majan, ngan gayeng detaʹu ue, abeʹ e tai paso neng kelunan diaʹ ca.

²⁵ Uban ne pekina, Yesus senteng pudip pa kumpin ne, kelunan diaʹ nai ngejuma Allah kuʹun ne, uban ne mudip pa majan ngan ke lemameʹ Allah tuman ida.

²⁶ Ina ukoʹ Yesus iaʹ Pengebioʹ Detaʹu le iaʹ marung neng inu iaʹ tepet neng ilu. Ia ne iaʹ atek buheʹ. Nyahut abeʹ un penginteʹ buk are penyalaʹ neng ia. Allah lepa nengen ia cen kelunan penyalaʹ, ngan mejung ia pelapa mpau kaʹ surga.

²⁷ Abeʹ e koʹ baʹan Pengebioʹ Detaʹu diaʹ ca are. Abeʹ titin ne ke mencai liwa singket tau tuman penyalaʹ a tengen iaʹ ading, uʹo ina tuman penyalaʹ kelunan kadoʹ laʹa. Tegoʹ o mencai usa ha tengen, ia mencai ca liwa bang ca liwai tuaʹ le.

²⁸ Katuk Adet Musa iaʹ nyalet kelunan Pengebioʹ Detaʹu diaʹ abeʹ un daʹam seʹ puyan. Un sepuʹo tuket Allah, iaʹ peging ngan santet te are, iaʹ lepa nai bayaʹ neng Katuk Adet, ia iaʹ nyalet Anak iaʹ nuyan daʹam pa majan.