IBERANI 6 - Kenyah New Testament

¹ Moʹ ina, tai teto tuaʹ ne ilu palaʹ katuk iaʹ ke pesukung ilu. Mahung ne puʹun katuk iaʹ ikem lepa malai cen kena are. Ayen nesep nyalet puʹun katuk, koʹ baʹan katuk nyepuleʹ kimet cen pemuyan iaʹ abeʹ un tuman, pekina pe katuk ngelan palaʹ Allah,

² ngan naʹan naʹan batis, ngan puyan napoʹ ujoʹ, ngan puyan diaʹ lepa matai nai beteʹ, ngan puyan ukum iaʹ pa majan ʹo.

³ Tiga ne ilu teto tai penco. Ngan ini ne ilu ke ti buk ke pengubaʹ Allah ʹo.

⁴ Kelunan diaʹ lepa nyelikut Tuhan, kumpin le senteng ngkin ida ngeliwet, apan nte ke nyepuleʹ kimet laʹa? Ida lepa ca liwai kahum neng serema Allah. Ida lepa tisen tekaʹ pengencai surga, ngan alaʹ tulat neng Berua Buheʹ.

⁵ Ida lepa tisen tekaʹ uban tiraʹ Allah un tiga, ngan ida tisen penyukat udip surga iaʹ kenai ini.

⁶ Lepa re tisen ina, belekaʹ de nyelikut Tuhan laʹa, abeʹ nyatan le ngkin ida ngeliwet apan nte nyepuleʹ kimet de laʹa, uban ida numpak napek Anak Allah neng usun kayu tcek laʹa, ngan pesaʹe ia kata kelunan kadoʹ.

⁷ Ilu alaʹ kata cen tanaʹ. Allah iaʹ naʹ peniga ha kuʹun ujan iaʹ puto lemasaʹ ngan pudip pula, apan kelunan diaʹ pubo ho ke un bang kidi.

⁸ Un sepuʹo buk udu suhaʹ ngan udu aheʹ iaʹ mudip kidi, abeʹ un bang nge. Masaʹ a ke sihoʹ pudoʹ Allah ngan tai salai kuʹun luten.

⁹ Ahaʹ cenganak cenganak diaʹ ameʹ malaʹ, naʹ pe ameʹ pekini dau, abeʹ meʹ un kawaʹ kuʹun ncem. Ameʹ tisen ikem un peniga iaʹ pelapa tiga, iaʹ nai luhaʹ uban ncem un puyan iaʹ pudip ikem dalem Tuhan.

¹⁰ Abeʹ Allah un selepeʹ. Abeʹ e ke lingu pemuyan ia ikem lepati, pekina pe puyan pengemalaʹ kem neng ia, iaʹ luhaʹ tegoʹ kem mepo diaʹ cenganak kem dalem Tuhan are. Petem pekina lete puyan ncem naʹkini.

¹¹ Bioʹ tekaʹ pengubaʹ meʹ ubaʹ singket usa hem lemuto sanget pa ketai kuʹo udip ini, apan puyan iaʹ ikem nebelum atek ke nuyan mikem ʹo.

¹² Abeʹ meʹ baʹ ikem tai leko, un sepuʹo ameʹ ubaʹ ikem koʹ baʹan kelunan diaʹ ngelan ngan dadoʹ kimet, ngan pekina puyan nte alaʹ inu iaʹ Tuhan Allah lepa petuket ke naʹ mida.

Dau tuket Allah iaʹ salet lan

¹³ Tegoʹ Allah petuket ngan Ibrahim cen naʹaʹ are, ia nyantet dau ke uyan bayaʹ dau tuket te. Abeʹ un aheʹ iaʹ lapa bioʹ neng ia, ina ukoʹ o nyantet dau kanan ngadan ne tengen.

¹⁴ Un dau ue: “Akeʹ ke naʹ peniga mikoʹ, ngan kadoʹ sukoʹ akeʹ ke naʹ mikoʹ ʹo.”

¹⁵ Ibrahim un dadoʹ kimet, ina ukoʹ o alaʹ inu iaʹ Tuhan Allah lepa petuket ke naʹ mia.

¹⁶ Tegoʹ kelunan ke nyantet, ia ke kanan ngadan ca usa iaʹ pelapa bioʹ cen ia, moʹ dau santet iaʹ ke pebetep isiu buk un paseʹ neng ahang kelunan.

¹⁷ Allah ubaʹ ke badaʹ kimet te ngan luhaʹ lan palaʹ kelunan diaʹ ke alaʹ tuket te. Kimet te nyahut abeʹ un ke pekaliu tuman sedep pe. Ina ukoʹ o ngepit dau santet neng tuket te.

¹⁸ Uban ne pekina, un dua naʹan ini diaʹ abeʹ senteng pekaliu, ngan Allah abeʹ senteng ke palo kidi. Ina ukoʹ tangen laleʹ le, diaʹ lepa alaʹ lidung neng ia, ke ngkang salet neng tebelum iaʹ ia naʹ milu.

¹⁹ Tebelum iaʹ ilu un ini nuyan seleket ca bung me penawai le. Ilu senteng nina ia salet, ngan telu ue pelesan nting umaʹ palan surga pabeʹ amin iaʹ atek buheʹ kaʹ dalem te.

²⁰ Yesus lepa nekena tai kina tuman ilu. Ia lepa nuyan Laki Pengebioʹ Detaʹu pa majan ʹo, bayaʹ tuk puyan detaʹu Makisidik.