IBERANI 3 - Kenyah New Testament

Yesus iaʹ bioʹ neng ʹo Musa

¹ Ahaʹ cenganak keʹ diaʹ buheʹ dalem Tuhan, ikem diaʹ kahum dalem pengin Allah iaʹ mengin ilu kaʹ udip surga. Pekimet Yesus ading. Ia iaʹ Allah ban cuk nai pelawa palaʹ ilu, uyan ia iaʹ detaʹu bioʹ neng pengelan le iaʹ ilu kuaʹ ngahaʹ ini.

² Moʹ Yesus iaʹ semamet neng Allah iaʹ lemileʹ ia ke ngkang gayeng ini, kuaʹ baʹan Musa iaʹ semamet neng gayeng nge dalem toʹ amin Allah are.

³ Koʹ baʹan puyan le nyelama kelunan iaʹ uyan amin, bioʹ selama ha neng ʹo puyan le nyelama amin ina, pekina lete tekep le nyelama peniga Yesus bioʹ neng ʹo peniga Musa.

⁴ Tisen te ilu ban singket amin tai pedeng kuʹun ca kelunan, un sepuʹo Allah iaʹ lepa medeng mung inu.

⁵ Musa iaʹ semamet ngkang mung amin Allah koʹ baʹan panyen amin. Ngan ia iaʹ menco isiu neng puyan iaʹ. Allah ubaʹ peluhaʹ bayaʹ ʹo.

⁶ Un sepuʹo Keristus iaʹ semamet ngkang amin Allah koʹ baʹan Anak iaʹ pengebioʹ amin ina. Ilu kelunan diaʹ pengamin ne, sukun ilu lemuto tangen ngan lemuto nina iaʹ ilu nebelum ke nuyan ʹo.

Kelineʹ me kelunan diaʹ anun Allah

⁷ Tuman ina, sihoʹ dau Berua Buheʹ iaʹ kuma ha: “Buk tegoʹ tau ini ikem kenahan dau Allah,

⁸ ayen ncem mahing kimet koʹ baʹan puyan ncem dalau hem nyakat Allah cen naʹaʹ are, koʹ baʹan puyan ncem kaʹ tanaʹ lenga tegoʹ tau iaʹ ikem ten ia are.

⁹ Un dau Allah: Kina diaʹ tepun ncem ten akeʹ ngan nesek akeʹ, naʹ pe ida lepa taʹan pemuyan nceʹ ngajan pat puloʹ uman are.

¹⁰ Ina ukoʹ keʹ miʹa neng kelunan dina, penco dau heʹ: ‘Pekutat ne ida pekimet salaʹ neng kimet de, ngan leko re ke bayaʹ janan kimet ceʹ.’

¹¹ Miʹa tekaʹ keʹ, penco heʹ mudoʹ dau kuma: ‘Peletoʹ de abeʹ senteng nai kedalem iaʹ kukoʹ kelineʹ pemung ngan nceʹ.’ ”

¹² Ahaʹ cenganak cenganak keʹ, nawai tiga tiga malap ca usa neng ahang ikem ke alaʹ kimet jaʹat iaʹ leko ngelan, pa ha duncau cen Allah iaʹ mudip.

¹³ Un sepuʹo tekep ikem pepo pekatuk ikem selepeʹ singket singket tau ne, mele kudaʹ majan isiu Kitap iaʹ pisiu “tau ini” ke sihoʹ ilu, malap puyan penyalaʹ ke panyi ikem ngan pemahing kimet cem.

¹⁴ Moʹ ilu mung iaʹ pebulung ngan Keristus, sukun ilu ngkang pali neng tebelum le cen tading nge pa ketai kuʹo ho.

¹⁵ Ini ne dau Kitap: “Buk tau ini ikem kenahan dau Allah, ayen ncem mahing kimet koʹ baʹan puyan ncem dalau hem nyakat Allah cen naʹaʹ are.”

¹⁶ Aheʹ diaʹ kenahan dau Allah ngan nyakat ia cen naʹaʹ tupe? Mung kelunan diaʹ Musa ngkin buau cen tanaʹ Masir are lete.

¹⁷ Ngan aheʹ iaʹ Allah miʹa pa pat puloʹ uman majan ne tupe? Ia miʹa neng kelunan diaʹ uyan penyalaʹ, diaʹ tai pengkup matai kaʹ tanaʹ lenga lete.

¹⁸ Tegoʹ Allah nyantet dau tuket te kuma ha: “Peletoʹ de abeʹ senteng nai kedalem iaʹ kukoʹ kelineʹ pemung ngan nceʹ,” neng aheʹ e pekina dau tupe? Neng kelunan diaʹ nyakat ia lete.

¹⁹ Tuman ina ilu tisen, abeʹ de senteng tai kaʹ dalem, uban nte abeʹ un ubaʹ ngelan.