IBERANI 2 - Kenyah New Testament

Puyan bioʹ iaʹ pudip ilu dalem Tuhan

¹ Tuman ina, tekep le pali kuʹo ke ngkang katuk telit iaʹ ilu lepa kenahan are, malap ilu tai duncau.

² Singket liwai diaʹ melikat pelawa tiraʹ cen naʹaʹ are, luhaʹ ban atek lan isiu re. Kelunan diaʹ nyakat ngan muau dau re are, sihoʹ ukum marung neng salaʹ de.

³ Ban ne pekina, kumpin ne ilu ketai kelap ukum buk le abeʹ un nyingo puyan bioʹ iaʹ pudip ilu dalem Tuhan tupe? Tuhan tengen iaʹ ading pungkaʹ puyan iaʹ ke pudip kelunan dalem Tuhan, ngan kelunan diaʹ lepa kenahan dau isiu ue ina nugen badaʹ a mameʹ pa meʹ tisen ne lan.

⁴ Serengan ina lete Allah naʹ puyan tugen ne kidi, ngepit puyan tugen kelunan idai are, moʹ Allah iaʹ uyan tedanaʹ nyingan, ngan puyan bulen, ngan kadoʹ naʹan puyan nyingan diaʹ ca lete. Ngan laʹa, Allah lete iaʹ pesingket pencai Berua Buheʹ ina milu bayaʹ ban pengubaʹ kimet te.

Laki iaʹ ngkin kelunan palaʹ udip

⁵ Ilu pisiu neng udip mading. Dalau tading Allah pekimet uyan puyan udip ini, abeʹ e naʹ diaʹ melikat ke ngkang pengaren kidi.

⁶ Un sepuʹo koʹ baʹan dau ca jo isiu dalem Kitap iaʹ kuma ha: “Ahaʹ Tuhan Allah, puyan inu ne kelunan iaʹ ukoʹ koʹ ke nawai ia? Uyan inu ne kelunan iaʹ pukoʹ koʹ ke nyingo ia tupe?

⁷ Abeʹ un kumpin majan ikoʹ iaʹ naʹ ia libaʹ neng ʹo melikat dina. Ikoʹ iaʹ naʹ pengaren mia pemung serema peniga ngan selama,

⁸ ngan ikoʹ uyan ia iaʹ paren neng usun mung inu ne.” Dau ina badaʹ ban Allah lepa uyan ia “iaʹ paren neng usun mung inu.” Luhaʹ ne ban mung inu iaʹ kahum kidi. Un sepuʹo naʹkini, abeʹ le taʹan kelunan ngaren mung inu.

⁹ Bang Yesus ilu taʹan un pengaren. Abeʹ un kumpin majan ia iaʹ nuyan libaʹ neng ʹo diaʹ melikat, apan ne senteng matai tuman mung kelunan. Puyan ina nuyan kuʹun pengelesau Allah. Naʹkini ilu taʹan Yesus. Luhaʹ ban pengaren ne, ngan serema peniga ha, ngan selama ha kuʹun puyan patai ie.

¹⁰ Allah iaʹ lepa nyelung uyan mung inu, ngan ia iaʹ ngkang mung inu. Tekep lete ia pedaʹam Yesus kuʹun puyan tuyen, apan ne senteng ngkin kadoʹ diaʹ anak ke ke kahum pemung ngan Yesus dalem serema peniga ha. Moʹ Yesus tengen iaʹ ngkin ida palaʹ udip iaʹ pudip ida dalem Tuhan.

¹¹ Yesus iaʹ muheʹ kelunan cen penyalaʹ de. Ngan ia, pemung ngan kelunan diaʹ tai buheʹ dina, mung nte un ca le Amai re. Ina ukoʹ Yesus abeʹ un saʹe ke ngahaʹ ida diaʹ cenganak ke.

¹² Koʹ baʹan dau ue: “Ahaʹ Allah, akeʹ ke badaʹ puyan ncoʹ neng diaʹ cenganak keʹ. Akeʹ ke ngentau pempau ikoʹ neng juma mung Mpun.”

¹³ Un dau ue laʹa kuma ha: “Akeʹ ke napi tawai heʹ palaʹ Allah.” Ngan laʹa: “Kini heʹ pemung ngan anak diaʹ Allah naʹ makeʹ.”

¹⁴ Kelunan iaʹ ia pisiu anak are, ida lete kelunan kuaʹ sin ngan dahaʹ. Tuman ina Yesus tengen nai nuyan kelunan kuaʹ layen ida lete. Un ban puyan ne pekina apan ne senteng nasaʹ Bali Jaʹat man puyan patai ie, moʹ Bali Jaʹat ina iaʹ ngkang penyukat neng patai.

¹⁵ Ngan pekina puyan Yesus senteng nakau kelunan cen puyan ulaʹ de, moʹ de nuyan ulaʹ utung udip de kuʹun puyan nte takut matai.

¹⁶ Luhaʹ ban abeʹ Yesus nai mepo melikat, un sepuʹo koʹ baʹan dau Kitap kuma ha: “Ia nai mepo mela Ibrahim.”

¹⁷ Sen dau ini, abeʹ e senteng are nuyan kuaʹ layen diaʹ cenganak ke neng singket naʹan puyan nte, apan ne senteng tai nuyan laki detaʹu bioʹ iaʹ ke ngkang gayeng juma Allah ngan puyan semamet mentung sangan lesau, idi penyalaʹ kelunan ke pesau.

¹⁸ Naʹkini senteng ne Yesus mepo kelunan diaʹ sihoʹ pengeten, moʹ ia tengen pe lepa sihoʹ tuyen ngan pengeten.