IBERANI 1 - Kenyah New Testament

Tiraʹ Allah iaʹ nai luhaʹ kuʹun Anak ke

¹ Dalau udip cen naʹaʹ, un dau Allah pisiu tepun le man diaʹ pegawa ha. Un pe puto liwai, ngan un pe kadoʹ naʹan janan isiu ue lete.

² Un sepuʹo ngajan ini, dalau ketai kuʹo udip ini, Allah lepa pisiu me ilu man Anak ke. Ia lete iaʹ Allah lepa kanan man uyan mung langit ngan tanaʹ ini. Ia lete iaʹ Allah lemileʹ apan ne ke un mung inu tegoʹ ketai kuʹo udip ini ʹo.

³ Ia iaʹ nyerema serema peniga Allah lete. Ia iaʹ seleket uban peluhaʹ layen Allah lan, ngan ia lete iaʹ ngkang mung inu kusun langit ngan tanaʹ man isiu nyingan ne. Lepa ha uyan puheʹ man muheʹ penyalaʹ kelunan, sulo ho madung kaʹ surga tahaʹ taʹu Allah iaʹ atek Bioʹ Nyingan.

Bioʹ puyan Anak neng ʹo puyan diaʹ melikat

⁴ Anak ina iaʹ nuyan bioʹ neng ʹo diaʹ melikat, kuaʹ baʹan ngadan iaʹ Allah lepa naʹ mia un bioʹ neng ʹo ngadan nte.

⁵ Moʹ abeʹ lepe Allah pisiu neng ca melikat te kuma ha: “Ikoʹ iaʹ Anak keʹ. Tau ini senteng ngkoʹ ngamai akeʹ.” Pekina lete abeʹ lepe Allah pisiu ca melikat kuma ha: “Akeʹ iaʹ ketai Amai neng ia ʹo, ngan ia lete ketai nuyan Anak keʹ ʹo.”

⁶ Kena Allah cuk Anak ke iaʹ ading nge nai kaʹ usun tanaʹ ini are, un dau ue: “Mung melikat Allah tekep ke tunuk nyelama Anak ini.”

⁷ Pekini dau Allah neng puyan melikat te dina: “Allah iaʹ uyan melikat te kuaʹ baʹan kudaʹ naʹan bahiu, ngan diaʹ pegayeng mia kuaʹ baʹan kudaʹ lahang luten.”

⁸ Di lareʹ pekini dau Allah neng puyan Anak ke: “Ahaʹ Allah, padung pengaren ncoʹ lemuto un pa majan. Mung diaʹ dalem gaham pengaren ncoʹ, ikoʹ iaʹ ngaren ne man puyan iaʹ telit.

⁹ Ikoʹ iaʹ malaʹ puyan teneng, ngan miʹi puyan salaʹ, ini ukoʹ Allah, iaʹ atek Allah hoʹ, lepa lemile ikoʹ, sulo naʹ mikoʹ selama iaʹ pebangen ikoʹ, pelapa bioʹ neng ʹo puyan ne naʹ me diaʹ ngan ncoʹ dina.”

¹⁰ Un dau ue laʹa: “Ahaʹ Tuhan, cen naʹaʹ are, ikoʹ iaʹ nyelung uyan tanaʹ ini, ngan man ujoʹ koʹ tengen, ikoʹ lepa uyan langit lete.

¹¹ Mung puyan ina ketai salai ʹo, un sepuʹo ikoʹ iaʹ un pa majan. Mung dina ketai mupuk koʹ baʹan sapai are.

¹² Ikoʹ iaʹ ke lemelen dina koʹ baʹan ti sapai are, sulo alaʹ iaʹ seliwa ha, koʹ baʹan le nyeliwa gelam. Un sepuʹo abeʹ koʹ ketai pekaliu pa majan, ngan nyahut coʹ abeʹ un ketai mukun ne ʹo.”

¹³ Abeʹ lepe Allah pisiu me diaʹ melikat te, mele aheʹ pe, ngan kuma ha: “Nai ne, madung kini, tahaʹ taʹu akeʹ, pa heʹ naʹ bunoʹ koʹ kuaʹ nten kentaʹ taket coʹ.”

¹⁴ Buk pekina, kumpin puyan diaʹ melikat tupe? Mung nte nuyan berua iaʹ pegayeng me Allah. Ngan Allah iaʹ cuk ida tai mepo kelunan diaʹ ke alaʹ udip iaʹ ke pudip ida dalem Tuhan.