2 TIMUTIUS 1 - Kenyah New Testament

¹ Cen Paulus, lawa Keristus Yesus kuʹun pengubaʹ Allah ke pedenga pengudip iaʹ ilu un pemung dalem Keristus Yesus: pengudip ina iaʹ Allah ban petuket milu are:

² Palaʹ Timutius, anak iaʹ pengemalaʹ keʹ. Awaʹ pe Allah iaʹ Amai Bioʹ, ngan Keristus Yesus iaʹ Tuʹa le, ke naʹ pengelesau iaʹ ia lebang naʹ milu, ngan puyan lesau, ngan udip iaʹ tadan mikoʹ.

Nyuaʹ tiga saheʹ ngan puyan petangen

³ Akeʹ nyuaʹ tiga saheʹ palaʹ Allah. Palaʹ ia heʹ un temek ngan tudep ngan dema tekaʹ kimet dalem penawai heʹ, koʹ baʹan puyan tepun nceʹ cen naʹaʹ. Nyahut ceʹ tai beto petawai ikoʹ dalem temameʹ keʹ tegoʹ ngahu ngan naʹ tau.

⁴ Moʹ keʹ petawai luloʹ koʹ, tai bampa ne tekaʹ keʹ ubaʹ ke taʹan ikoʹ, apan bioʹ tekaʹ saheʹ keʹ ʹo.

⁵ Mentung ngkeʹ pekimet diseʹ lan pengelan ncoʹ, iaʹ ading ading ban lepa un neng pui hoʹ leto, Luis, ngan neng ueʹ koʹ Unike ina. Akeʹ ngelan te ikoʹ koʹ baʹan ida are.

⁶ Ini iaʹ ukoʹ keʹ petawai ikoʹ, apan ncoʹ ke pekatan pengencai Allah iaʹ ia naʹ mikoʹ dalau heʹ napoʹ ujoʹ keʹ neng ikoʹ are.

⁷ Moʹ Berua Buheʹ iaʹ Allah ban naʹ milu, abeʹ e Berua ia ke pementam ilu, un sepuʹo Berua iaʹ ke nyangan penyukat ngan pengemalaʹ ngan puyan iaʹ mencam mapo penyaheʹ usa le.

⁸ Moʹ ina, ayen saʹe ke badaʹ tugen neng puyan Tuhan iaʹ ban Tuʹa le. Pekina pe ayen saʹe suaʹ akeʹ moʹ keʹ sepin ban kuʹun Tuhan, di lareʹ tiga hoʹ ngihen penuyen kuʹun Denga Injil, bayaʹ ban penyukat iaʹ Allah ke naʹ mikoʹ utung nge.

⁹ Ia lepa pudip ilu ngan mengin ilu tai nuyan kelunan diaʹ anun ne. Abeʹ e pudip ilu moʹ kuʹun pemuyan le, di lareʹ bayaʹ tengangan kimet te tengen, ngan kuʹun ban pengelesau ue. Ia naʹ pengelesau ue milu dalem Keristus Yesus iaʹ ading neng tading udip.

¹⁰ Un sepuʹo naʹkini, lepa tugen ne pengelesau ina kuʹun kenai Keristus Yesus iaʹ Keniga Udip le. Moʹ lepa ne Keristus pesalai mung penyukat patai, ngan peluhaʹ udip iaʹ abeʹ un tisen ketai salai, man katuk Denga Injil ini.

¹¹ Ngan lepa ne Allah nyalet akeʹ ke pendenga katuk Injil, ngan nuyan akeʹ lawa Injil, ngan guru kidi.

¹² Moʹ ina ukoʹ keʹ sihoʹ tuyen neng puyan ini. Un sepuʹo abeʹ keʹ saʹe, moʹ keʹ tisen palaʹ aheʹ keʹ pesente pengelan nceʹ. Akeʹ ngelan ia sukat petubo mung uban sana heʹ, iaʹ Allah ban mahung makeʹ, pa ha tai abeʹ Tau Bioʹ.

¹³ Kanan ne tiraʹ iaʹ atek lan, iaʹ akeʹ ban pekatuk mikoʹ are, nuyan ca senawan mikoʹ. Ngan nemek ne ikoʹ dalem pengelan, ngan dalem pengemalaʹ iaʹ ilu pemung un dalem Keristus Yesus.

¹⁴ Petubo ne puyan peniga iaʹ Allah ban mahung mikoʹ, man penyukat Berua Buheʹ iaʹ un dalem ilu.

¹⁵ Tisen ne pe ikoʹ neng puyan mung nte dalem tanaʹ Asia, lepa ne tai re kelap akeʹ. Neng ahang ida diaʹ tai kelap dina Pigelus ngan Hemuginis.

¹⁶ Awaʹ pe Tuhan ke naʹ pengelesau ue neng pengamin Unisipurus, moʹ kudaʹ liwai ne ia pebioʹ saheʹ keʹ. Ngan abeʹ pe ia saʹe kuʹun beka ampit malat ceʹ.

¹⁷ Un sepuʹo nai Unisipurus abeʹ kaʹ lepoʹ Rum, akeʹ ne ia pesaba nai pita, pa ha petegoʹ ngan nceʹ.

¹⁸ Bang Tuhan le akeʹ nebelum ke naʹ mia pengelesau ue tegoʹ Tau Bioʹ Keristus ʹo. Ikoʹ tengen pe tisen puyan ne kaʹ lepoʹ Ipesus are, neng kudaʹ naʹan puyan tiga ia ban petubo akeʹ.