2 TESALUNIKA 3 - Kenyah New Testament

Tiga hem lemameʹ mameʹ

¹ Iaʹ kebayaʹ dau heʹ cenganak cenganak, tiga hem lemameʹ mameʹ apan puyan denga Tuhan le senteng tai libut ngan sangkit, ngan apan ne luhaʹ serema peniga ha, koʹ baʹan iaʹ lepa nuyan neng ahang ikem cen naʹaʹ are.

² Ngan laʹa, tiga hem lemameʹ mameʹ apan Allah ke sau ameʹ cen mung kelunan diaʹ buseʹ, ngan diaʹ jaʹat, moʹ abeʹ e mung kelunan diaʹ ngelan katuk telit ini.

³ Un sepuʹo Tuhan le ina semamet. Ia ke ngepali ikem, ngan ke sau ikem cen laki iaʹ ngkang pungu pengejaʹat ina.

⁴ Tuhan iaʹ nyalet kimet meʹ dalau meʹ pekimet ikem. Tebelum meʹ ikem ke uyan inu iaʹ ameʹ lepa badaʹ mikem, ngan ikem ke penco uyan ne.

⁵ Awaʹ pe Tuhan ke mampin penawai hem apan ncem tisen ke malaʹ Allah, ngan apan ncem tisen ke kanan tengayet iaʹ Keristus naʹ milu.

Tekep le pegayeng

⁶ Ahaʹ cenganak cenganak, ameʹ cuk ikem man ngadan Tuhan le Yesus Keristus, ngerada ne usa hem neng singket cenganak cenganak diaʹ mudip ngan leko, ngan diaʹ abeʹ un bayaʹ katuk iaʹ ameʹ lepa badaʹ mida.

⁷ Ikem tengen tisen moʹ tekep kem ke uyan bayaʹ ban pemuyan meʹ are. Dalau meʹ un pemung ngan ncem are, abeʹ meʹ leko.

⁸ Abeʹ meʹ nyat dulu nai mepo ameʹ, mele aheʹ aheʹ pe, buk meʹ are un naʹ bang nte. Di lareʹ ameʹ pegayeng ngan nyara, pekina pe naʹ tau ngan ngahu, apan meʹ abeʹ un ke pejanga ca usa neng ahang ikem.

⁹ Naʹ pe ameʹ uyan diaʹ pekina, abeʹ e ban meʹ abeʹ senteng ke nyat lesau neng ikem, di lareʹ ameʹ uyan diaʹ pekina apan meʹ nuyan ca kata palaʹ ikem.

¹⁰ Dalau meʹ un ngan ncem are, ameʹ lepa badaʹ kuma ha: “Buk ca usa abeʹ un ubaʹ ke pegayeng, ayen ne uman.”

¹¹ Ameʹ badaʹ puyan ini moʹ meʹ kenahan denga puyan kudaʹ usa neng ahang ikem diaʹ mudip ngan leko. Abeʹ un tuman nte tai pegayeng, di lareʹ bang pejaʹat puyan dulu diaʹ ca.

¹² Man ngadan Tuhan le Yesus Keristus ameʹ cuk kelunan ini, ngan pekatuk dau mida, ban ne tekep de mejo pengudip de iaʹ temek, mentung nte semamet ke mita penguman usa re tengen.

¹³ Ngan laʹa cenganak cenganak, ayen ncem tai lelat uyan inu inu iaʹ tiga.

¹⁴ Masaʹ un pe kelunan iaʹ abeʹ un ubaʹ ke bayaʹ inu iaʹ ameʹ lepa badaʹ dalem surat meʹ ne. Buk ke pekina, tiga hem petawai kelunan ina, ngan ayen ncem tai pemung ngan ne, idi ie saʹe ʹo.

¹⁵ Un sepuʹo ayen ncem naʹ ia koʹ baʹan ca bunoʹ kem are, di lareʹ tiga hem pejagaʹ ia koʹ baʹan ncem pejagaʹ dau neng cenganak kem are.

Kebayaʹ dau isiu

¹⁶ Awaʹ pe Tuhan, iaʹ puʹun udip iaʹ tadan ina, lemuto ke naʹ udip iaʹ tadan mikem neng mung naʹan pemuyan. Tuhan lete iaʹ ke un serengan ikem mung.

¹⁷ Man ujoʹ keʹ tengen akeʹ nyurat ini: Tiga saheʹ cen Paulus. Pekini ne puyan nceʹ nedanaʹ ngadan nceʹ neng singket surat katu heʹ. Pekini pe puyan nceʹ ngalung nge.

¹⁸ Awaʹ pe pengelesau Tuhan le Yesus Keristus ke un ngan ncem mung.