2 PETERUS 3 - Kenyah New Testament

Kenai Tuhan bayaʹ dau tuket

¹ Ahaʹ cenganak diaʹ akeʹ malaʹ, surat ini iaʹ kedua ha akeʹ nyurat palaʹ ikem mung. Dalem surat ceʹ kedua-dua dini, seʹ keʹ ke pebeteʹ kimet buheʹ neng ikem, man janan ke petawai ikem neng mung tiraʹ ini,

² apan ncem ngetawai dau tiraʹ pegawa diaʹ buheʹ cen naʹaʹ, pekina pe neng katuk ukum Tuhan iaʹ Keniga Udip le, iaʹ nai palaʹ ikem kuʹun diaʹ lawa Injil hem.

³ Iaʹ ading ikem ke petawai moʹ dalau ketai kebayaʹ udip ini ʹo, kenai luhaʹ kudaʹ usa diaʹ panyi-anyi, diaʹ bayaʹ asam pengubaʹ usa re tengen. Ida ke ngelunyeʹ kem ʹo.

⁴ Un dau re ʹo: “Mpi kenai ie, iaʹ ban petuket idai, luhaʹ taʹin? Moʹ cen dalau udip tepun le diaʹ lepa matai are, mpi un ca inu iaʹ tai pekaliu cen penading usun tanaʹ ini ban nuyan pe tupe?”

⁵ Moʹ nengangan seʹ de lemalo uran abeʹ un tisen ban cen naʹaʹ Allah uyan langit ngan tanaʹ kuʹun tiraʹ a. Iaʹ ban cen sungai Allah uyan tanaʹ ini, ngan peluhaʹ a man sungai lete.

⁶ Kanan sungai lete Allah pelempam nasaʹ usun tanaʹ ini cen naʹaʹ.

⁷ Un sepuʹo langit ngan tanaʹ iaʹ un naʹkini, Allah petenup ke nasaʹ a man luten bayaʹ ʹo, kuʹun dau tiraʹ a lete. Seʹ tanaʹ ini lelum kena, pa kenai tau iaʹ ke pebetep ukum ngan ke nasaʹ mung kelunan diaʹ muau Allah.

⁸ Ahaʹ cenganak diaʹ akeʹ malaʹ, neng puyan ini ayen ncem tai lingu kidi. Neng penaʹat Tuhan abeʹ un tekajaʹ a; ca tau kuaʹ koʹ baʹan ca ibu uman, ngan ca ibu uman kuaʹ koʹ baʹan ca tau are.

⁹ Abeʹ Tuhan un malun neng inu iaʹ lepa ia petuket, koʹ baʹan dau palai are kuma ia malun. Un sepuʹo dadoʹ tawai ie neng ikem, moʹ abeʹ e ubaʹ pabeʹ ca usa pe ke tai tasaʹ, di lareʹ un pengubaʹ a kelunan mung ke nesen ngan nyepuleʹ kimet cen penyalaʹ de.

¹⁰ Un sepuʹo Tau Tuhan ke nai ʹo koʹ baʹan kenai ca diaʹ bekelau are. Tegoʹ Tau ina, langit ke mapeʹ ngan tuyau bioʹ iaʹ layam dau. Mung inu kaʹ langit ketai tutung pa menyo. Tanaʹ ini ke tutung peging mung inu iaʹ un dalem me pa salai.

¹¹ Moʹ buk pekina ketai mung inu ke tasaʹ ʹo, kumpin seʹ puyan ncem iaʹ ke tekep ne tupe? Iaʹ tekep pe, mung puyan pengudip kem buheʹ ngan tunuk palaʹ Allah,

¹² ngajan ncem mengaʹ ngan mentung ngkem ke nengayet ke pesangkit kenai Tau Allah ina ʹo. Moʹ tegoʹ Tau ina ʹo, mung langit ke tasaʹ tutung, ngan ketoʹ inu kidi ke tai menyo ludau kuʹun pana luten.

¹³ Un sepuʹo Allah lepa petuket ke naʹ langit mading ngan tanaʹ mading, iaʹ pelaya teneng, ngan idi iaʹ ilu nebelum.

¹⁴ Moʹ ina cenganak diaʹ akeʹ malaʹ, ngajan ncem ke pekena puyan Tau ina, nengayet ne ikem mudip neng puyan udip iaʹ buheʹ ngan iaʹ abeʹ un penginteʹ neng penaʹat Allah, ngan pekina pe uyan tekaʹ pengetadan udip ngan ne.

¹⁵ Tiga hem ngetisen pengedadoʹ tawai Tuhan, ca pengebiʹen ncem ke pigai katuk udip dalem Tuhan. Pekina lete dau cenganak le Paulus iaʹ ilu malaʹ, dalem surat katu ue mikem, bayaʹ ban penisen iaʹ Allah naʹ mia.

¹⁶ Pekina lete dau ue puʹo dalem mung surat te, iaʹ ia badaʹ neng puyan ina. Un pe palai tiraʹ a dalem surat katu ue iaʹ mahan tekaʹ ke ngetisen ne. Moʹ ina dulu diaʹ tepa penisen ngan abeʹ un salet, ida diaʹ nyaliu nyaliu tiraʹ Paulus, koʹ baʹan puyan nte neng tiraʹ diaʹ ca dalem Kitap Tuhan. Ngan pekina seʹ de nasaʹ ida tengen.

¹⁷ Ahaʹ cenganak diaʹ akeʹ malaʹ, naʹ pe ikem lepa tisen kidi, tiga hem jagaʹ lan lan, malap ikem ketai dancun bayaʹ katuk salaʹ diaʹ jaʹat dina, penco hem laboʹ cen ukoʹ kem iaʹ salet ina.

¹⁸ Di lareʹ tiga hem tudep le, ngan nai un pit un pit dalem pengelesau ngan penisen neng Tuhan le, Laki iaʹ Keniga Udip le, Yesus Keristus. Palaʹ ia ne ketai mung serema peniga cen naʹkini pa pa majan. Amin. 8