2 PETERUS 2 - Kenyah New Testament

Guru palo

¹ Cen naʹaʹ un lete pegawa palo nai luhaʹ neng ahang dulu. Pekina lete ke kenai guru palo luhaʹ neng ahang ikem ʹo. Ida iaʹ nyelem ngkin katuk iaʹ pelingu ngan ngejaʹat dulu, ngan ngebawaʹ dau neng Tuhan iaʹ ban matai tuman ida. Pekina seʹ de metau ukum kenai laho nasaʹ ida tengen.

² Naʹ pe pekina, kadoʹ dulu ke bayaʹ diseʹ puyan nte selabu ngan pemung nyelem. Kuʹun puyan nte dulu ke pejaʹat dau neng Janan Udip iaʹ lan.

³ Cen kimet tutun, guru palo dina penco katuk nyelibo, man nte mita bang cen ikem. Allah iaʹ ngkang ukum neng usun ida dina iaʹ lepa tenup cen kena, ngan iaʹ ke nasaʹ ida, abeʹ e luntoʹ.

⁴ Un ban melikat diaʹ uyan penyalaʹ cen naʹaʹ, abeʹ Allah pelelum ida, bang pet ida kedalem lubang ukum luten, ngan nyepin ida dalem lubang asep iaʹ mentem, pa ke kenai Tau Ukum Bioʹ ke sihoʹ ida ʹo.

⁵ Ngan pekina pe abeʹ Allah pelelum dulu diaʹ ban kusun tanaʹ cen naʹaʹ. Ina ukoʹ Allah cuk sungai nai pelempam dulu diaʹ muau neng ia. Bang Nuh peging ngan tujoʹ usa ia pudip, iaʹ penco katuk neng puyan iaʹ teneng.

⁶ Ngan pekina pe Allah ngukum lepoʹ Sudum ngan lepoʹ Gumura, nyalai ida man luten, moʹ uyan ida ca kata palaʹ dulu diaʹ muau neng ia, idi re tai tisen neng inu iaʹ ke nai sihoʹ ida ʹo.

⁷ Kun Allah pudip Lut, laki iaʹ teneng ina. Moʹ keta tekaʹ Lut kuʹun puyan laki ngan leto diaʹ peselabu ngan diaʹ muau dina.

⁸ Moʹ dalau laki iaʹ teneng ina mudip neng ahang ida, singket tau ne ia kenahan ngan taʹan puyan jaʹat iaʹ nyakit penawai ie iaʹ teneng ina.

⁹ Cen diaʹ pekina, luhaʹ ban Tuhan senteng ke pawang kelunan diaʹ temek bayaʹ ia kelap cen pengeten ne, ngan ke nebaya ukum neng kelunan jaʹat, pa kenai Tau Penelit Ukum ʹo.

¹⁰ Lapa neng ina pelaʹa ida diaʹ bayaʹ asam pengubaʹ usa re dalem pengejameng nte ngan muau penyukat Allah, atek tebaya neng ukum. Guru palo dina makang, ngan balang tawai, abeʹ de takut pejaʹat diaʹ mpau aren.

¹¹ Di pia melikat pe, naʹ pe bioʹ pengali ngan penyukat de neng ʹo diaʹ guru palo dina, abeʹ de tulaʹ dau ke pesalaʹ diaʹ mpau aren dina kata Tuhan.

¹² Un sepuʹo kelunan dina abeʹ de un kimet. Seʹ de mudip koʹ baʹan saheʹ pun diaʹ lajam, diaʹ dulu pabat ngan lematai. Ngan tulaʹ dau re neng inu iaʹ ida petem abeʹ un tisen. Ke tasaʹ de ʹo kuʹun pemuyan nte iaʹ koʹ baʹan penyaheʹ pun are.

¹³ Ida tengen ke sihoʹ tuyen suaʹ pemuyan iaʹ ida lepa uyan. Moʹ baloʹ de ubaʹ penta uyan jaʹat bayaʹ pengubaʹ usa re naʹ tau. Pekina seʹ pengebangen baʹan nte. Ida dina diaʹ ke ngeratang ngan ngejameng ikem tegoʹ de pemung uman ngan ncem. Mentung saheʹ tekaʹ de moʹ de ban pelingu ikem.

¹⁴ Abeʹ de ubaʹ naʹat kempi kempi pit tahaʹ leto diaʹ seʹ ke pemung nyelem. Abeʹ de un tisen tai jeteng neng penyalaʹ. Mencam nte ngepan dulu diaʹ mengut pengelan. Penawai re ngalai tutun. Ida ne diaʹ kahum neng kenca Allah.

¹⁵ Lepa ne ida mecin cen janan iaʹ telit, penco re daru. Ke tai re bayaʹ janan Bilam anak Biur iaʹ malaʹ neng ligit iaʹ ban beli puyan penyalaʹ a,

¹⁶ sulo ho sihoʹ keretaʹ kuʹun penyalaʹ a. Moʹ un ca pun keledai iaʹ pisiu man isiu kelunan, iaʹ mempeng kimet buling laki pegawa ina.

¹⁷ Koʹ baʹan lubang tebut iaʹ lepa muhang megang are, ida dina. Koʹ baʹan abun iaʹ palit kuʹun bahiu kasa are ida. Allah lepa petenup ukoʹ de neng iaʹ mentem malep.

¹⁸ Mpau dau re pisiu, ngan abeʹ un semantet dau tiraʹ de. Ida kanan puyan asam pengubaʹ usa man nte ngepan dulu diaʹ laho laho ban kelap cen dulu diaʹ mudip dalem iaʹ salaʹ.

¹⁹ Kun nte petuket ke naʹ udip pejo mida, petem pe ida tengen iaʹ ulaʹ neng puyan baloʹ iaʹ jaʹat, iaʹ nasaʹ udip de. Moʹ inu inu iaʹ pesupeʹ ilu, seʹ le ulaʹ a.

²⁰ Moʹ buk aheʹ iaʹ lepa pesau cen puyan usun tanaʹ iaʹ jameng ini, moʹ de tai tisen ban Tuhan iaʹ Keniga Udip le, Yesus Keristus ina, buk de dina numpak tai pasek kidi laʹa, ngan supeʹ kuʹun ne, ida diaʹ pekina tai jaʹat kuʹo ke ida neng ke bayaʹ a cen ʹo iaʹ ading are.

²¹ Masaʹ lapa tiga re dina buk nyahut de abeʹ un tisen neng janan iaʹ teneng cen kena are, cen ʹo re ban tisen kidi, sulo tai re pupa mecin katuk iaʹ buheʹ, iaʹ Allah ban naʹ mida.

²² Sihoʹ neng ida lan ne dau ca keluin iaʹ kuma ha: “Asu nai ngeliwet uman tutaʹ a loʹ,” ngan: “Buʹin lepa ha ntoʹ, numpak tai ie nekinaʹ pelaʹa.”