2 PETERUS 1 - Kenyah New Testament

¹ Cen Simun Peterus, ulaʹ ngan lawa Yesus Keristus: Palaʹ ikem diaʹ lepa un pengelan iaʹ kuaʹ tiga ngan pengelan meʹ, iaʹ kuʹun peneneng Allah le, ngan Laki iaʹ Keniga Udip le Yesus Keristus, iaʹ ban naʹ pengelan ina milu.

² Awaʹ pe pengelesau ngan udip iaʹ tadan kenai un pit un pit palaʹ ikem kuʹun ban penisen ncem neng Allah ngan Yesus, iaʹ Tuʹa le.

Puyan Allah mengin ngan lemileʹ kelunan

³ Penyukat Allah iaʹ naʹ milu mung naʹan iaʹ ilu kanan, man le mudip neng udip iaʹ temek bayaʹ ia. Ilu un puyan ina kuʹun ban penisen le neng ia iaʹ ban mengin ilu tai pemung un tulat dalem serema peniga ha, ngan dalem puyan peniga ha tengen.

⁴ Ban kuʹun puyan penyukat ina, Allah lepa naʹ tuket iaʹ pasak bioʹ ngan iaʹ atek tiga milu. Buk kem alaʹ iaʹ ia ban petuket ina, senteng ngkem kelap cen puyan asam pengubaʹ usun tanaʹ ini iaʹ ke nasaʹ kelunan, apan ncem tai pebulung dalem layen udip Allah.

⁵ Moʹ ina, tiga hem nengayet ngepit puyan peniga neng pengelan ncem, ngan ngepit penisen neng puyan peniga hem,

⁶ ngan ngepit puyan mapo usa hem neng penisen ncem, ngan ngepit puyan tengayet neng puyan mapo usa hem, ngan ngepit puyan temek bayaʹ Allah neng puyan tengayet cem,

⁷ ngan ngepit lesau palaʹ ikem pecenganak neng puyan temek kem bayaʹ Allah, ngan ngepit malaʹ neng puyan lesau palaʹ ikem pecenganak.

⁸ Buk mung puyan ini un neng ikem ngan nai un pit un pit, idi iaʹ ke mulen ikem ketai leko ngan mudip neng udip iaʹ abeʹ un tuman, pa ketai daʹam penisen ncem neng Tuhan le Yesus Keristus.

⁹ Moʹ aheʹ iaʹ abeʹ un mung puyan ina, seʹ mata kimet te mampo, abeʹ un tuman penaʹat te. Tai lingu ne ia neng iaʹ ban muheʹ penyalaʹ a cen kena are.

¹⁰ Ina ukoʹ o cenganak keʹ, tai sanget kuʹo ke tawai hem, apan teto tekaʹ kem neng puyan Allah iaʹ ban mengin ngan lemileʹ ikem. Buk pekina puyan ncem, nyahut cem ketai laboʹ ne.

¹¹ Moʹ neng janan iaʹ pekina, bioʹ ukoʹ kem ke tai kedalem puyan pengaren Tuhan iaʹ ke ngeriman ngaren ilu, iaʹ ina Tuhan le Yesus Keristus, Laki iaʹ Keniga Udip.

¹² Ina ukoʹ keʹ lemuto tekaʹ ke petawai ikem neng mung katuk ini, naʹ pe ikem tisen kidi, ngan lepa salet dalem katuk iaʹ telit, iaʹ lepa ikem alaʹ.

¹³ Neng tekep tekaʹ kimet ceʹ, dalau heʹ caʹ un dalem kelekep ini, ubaʹ kaʹ keʹ ke megoʹ kimet cem ke ngetawai ikem kidi.

¹⁴ Moʹ tisen ne akeʹ, abeʹ e ke majan laʹa akeʹ ke mahung usa kelekep ini, koʹ baʹan dau Tuhan le Yesus Keristus iaʹ ban badaʹ a makeʹ.

¹⁵ Moʹ ina, nengayet tekaʹ keʹ ke peteneng janan ncem ke petawai mung katuk ini pa pa majan, naʹ pe akeʹ lepa matai ʹo.

Tugen taʹan pengaren Keristus

¹⁶ Abeʹ meʹ kanan tekenaʹ palo cen penudi kelunan dalau meʹ badaʹ ban puyan penyukat ngan puyan ke kenai Tuhan le Yesus Keristus. Iaʹ lan ne, ameʹ tengen pe lepa taʹan pengaren ne.

¹⁷ Moʹ ameʹ iaʹ un dalau Allah iaʹ Amai Bioʹ nyelama ia, ngan naʹ serema peniga mia dalau kenai isiu cen Serema iaʹ Atek Bioʹ, iaʹ pekini dau ue: “Ini ne Anak pengemalaʹ keʹ, iaʹ sihoʹ neng pengubaʹ keʹ.”

¹⁸ Ameʹ tengen iaʹ lepa kenahan dau isiu ina nai cen langit dalau meʹ pemung ngan Yesus neng usun mudung iaʹ buheʹ idai are.

¹⁹ Tai pali kuʹo ke tekaʹ penina le neng dau tiraʹ diaʹ pegawa Tuhan ban badaʹ. Tai temek pemuyan ncem buk kem jikit alaʹ tiraʹ ina, moʹ o koʹ baʹan titiu iaʹ ngedema dalau ntem, pa kenai selat tau, koʹ baʹan dema betuʹen maya iaʹ ngedema kimet cem.

²⁰ Iaʹ ading nge, tiga hem petawai neng ini, moʹ abeʹ un ca kelunan senteng tengen ke peluhaʹ sen kimet Allah cen dalem Kitap ini.

²¹ Moʹ abeʹ un tiraʹ iaʹ badaʹ kimet Allah iaʹ nai cen pengubaʹ kimet kelunan tuaʹ le, di lareʹ nai ie kuʹun Berua Buheʹ iaʹ mesun neng kelunan jinan nte penco tiraʹ cen Allah.