2 KURINTUS 8 - Kenyah New Testament

Puyan pencai

¹ Ahaʹ cenganak cenganak, ameʹ ubaʹ ikem tisen neng puyan iaʹ nuyan kuʹun pengelesau Allah iaʹ ia lebang naʹ milu dalem singket Mpun diaʹ ngelan Tuhan kaʹ tanaʹ Makedunia.

² Bioʹ laleʹ pengeten nte kuʹun penaru iaʹ nantaʹ ida. Un sepuʹo bioʹ bangen nte lemuto, ngan naʹ pe ida kasip laleʹ, bioʹ kimet de mencai inu re.

³ Lan dau heʹ mikem, ida naʹ inu re pa pa penyukat de. Un pe diaʹ lapa neng ina pelaʹa.

⁴ Atek kimet de tengen iaʹ ubaʹ ke pepo ngan kelunan diaʹ anun Allah kaʹ tanaʹ Yudia. Ina ukoʹ taten dau re nyat ameʹ apan ida senteng kahum dalem puyan pepo ina.

⁵ Puyan ina iaʹ tai lapa neng tebelum meʹ are. Ading ading nge un puyan nte mencai usa re tengen palaʹ Tuhan mentung palaʹ ameʹ lete, bayaʹ ban pengubaʹ kimet Allah mida.

⁶ Ina ukoʹ meʹ cuk Titus mejo gayeng ini moʹ ia iaʹ nading nge are. Ameʹ cuk Titus tai palaʹ ikem apan ne ke mepo ikem ke pelepa puyan pengemalaʹ iaʹ bioʹ ini.

⁷ Moʹ ikem diaʹ lento neng kadoʹ naʹan puyan, koʹ baʹan puyan pengelan ncem, puyan tiraʹ, puyan penisen, ngan puyan sanget ke mepo kelunan, ngan puyan ncem malaʹ ameʹ. Moʹ ban ne pekina, ameʹ ubaʹ ikem tai nuyan lento dalem gayeng pengemalaʹ ini lete.

⁸ Isiu heʹ ini, abeʹ e koʹ baʹan ca adet de. Un sepuʹo dau heʹ badaʹ kumpin puyan lepoʹ Makedunia un sanget ke mepo kelunan, seʹ keʹ ten kimet cem mele kumpin sin neng pengelesau hem.

⁹ Moʹ ikem tisen puyan pengelesau Tuhan le Yesus Keristus, naʹ pe leto pengudip pe, ia nengangan tai kasip tuman ikem, apan ikem ke tai nuyan kelunan iaʹ mudip lento kuʹun pengekasip pe.

¹⁰ Neng puyan ini akeʹ badaʹ kimet ceʹ, ikem iaʹ nading pemuyan ini uman ca are, tiga hem pelepa ha naʹkini. Lan te neng puyan ini, ikem iaʹ ading uyan ne. Ikem iaʹ ading un kimet iaʹ ke pekimet uyan ne pe.

¹¹ Tuman ina, tiga hem menco ho pa ha lepa. Tiga hem alaʹ penyanget iaʹ ke nguʹo ho kuaʹ baʹan penyanget cem iaʹ nyedep pe cen kena are, ngan kanan inu iaʹ un neng ata hem.

¹² Buk ke sanget tekaʹ tawai hem ubaʹ ke mencai inu hem, Allah iaʹ tisen inu iaʹ ikem sukat mencai. Tuman ina ia ubaʹ alaʹ pencai hem, abeʹ e tuman inu iaʹ abeʹ un neng ikem.

^13-14 Abeʹ keʹ ubaʹ ngenyiʹan mpin dulu man puyan ngebahat mpin ncem. Di lareʹ moʹ ikem diaʹ beso dalau ini, tekep lete ikem mepo ida diaʹ lien. Buk kem ketai lien uʹo, ngan ida iaʹ beso, ida iaʹ ke mepo ikem. Buk ke pekina, mung le ketai kuaʹ.

¹⁵ Koʹ baʹan dau Kitap iaʹ kuma ha: “Kelunan iaʹ un bioʹ ajau, abeʹ e un kadoʹ aleʹ. Ngan kelunan iaʹ un iʹut ajau, abeʹ e un tepet anun ne.”

Titus ngan diaʹ cenganak dalem gayeng

¹⁶ Ameʹ nyuaʹ tiga saheʹ palaʹ Allah moʹ o naʹ me Titus tawai iaʹ sanget ubaʹ ke mepo ikem kuaʹ baʹan ameʹ lete.

¹⁷ Abeʹ e bang selama dau mayo pengenyat meʹ le, atek sanget pe ia ke mepo ikem, ina ne ukoʹ o metek ke nai palaʹ ikem neng pengubaʹ a tengen.

¹⁸ Un ca usa laʹa iaʹ ameʹ cuk tai serengan Titus. Singket Mpun un bioʹ tekaʹ selama neng laki ini, tuman gayeng nge pedenga Denga Injil.

¹⁹ Pit pelaʹa diaʹ Mpun lemileʹ ia ngan cuk ia masat serengan ameʹ telu diaʹ mejo gayeng pengelesau ini tuman serema peniga Tuhan, mentung badaʹ seʹ meʹ ubaʹ pepo ngan ncem.

²⁰ Ameʹ pekimet tiga tiga neng puyan kumpin meʹ ke petubo pencai bioʹ ini, malap dulu mele aheʹ pe ke pesalaʹ ameʹ.

²¹ Ameʹ nengangan ban uyan iaʹ teneng neng juma Tuhan, mentung neng juma kelunan lete.

²² Pekina ban puyan meʹ cuk iaʹ cenganak meʹ idai tai serengan ida telu. Kudaʹ liwai pe ameʹ lepa ten puyan ne, ngan tisen ban lemuto ho sanget tekaʹ ubaʹ pepo ngan le. Naʹkini ban ne bioʹ kuʹo ne tapi ie neng ikem, seʹ e sanget kuʹo ke tekaʹ a ubaʹ pepo ngan le.

²³ Koʹ baʹan Titus ne, ia iaʹ pemung pegayeng ngan nceʹ tuman meʹ mepo ikem. Koʹ baʹan ida telu cenganak meʹ diaʹ ca tai serengan Titus ne, ida seleket saliu Mpun nte. Seʹ de nyerema peniga Keristus lete.

²⁴ Tuman ina, tiga hem peluhaʹ seʹ puyan pengemalaʹ kem palaʹ ida, apan singket Mpun ke tisen kidi lan, mentung nte ke tisen ban tekep puyan meʹ selum tekaʹ kuʹun ncem.