2 KURINTUS 7 - Kenyah New Testament

¹ Ahaʹ cenganak cenganak diaʹ akeʹ malaʹ, mung dau tuket Tuhan ini iaʹ nuyan utung ilu. Tuman ina tekep le ngebuheʹ cen singket naʹan puyan iaʹ ke ngejameng usa le, ngan puyan iaʹ ke ngejameng berua le. Tiga ne ilu daʹam neng pengebuheʹ seʹ udip le kuʹun puyan le mudip neng iaʹ selumuk seʹ palaʹ Tuhan Allah.

Bangen Paulus

² Alaʹ kimet iaʹ bioʹ neng ameʹ. Abeʹ meʹ uyan salaʹ neng ca kelunan pe. Abeʹ meʹ ngejaʹat ca kelunan pe, pekina pe abeʹ meʹ ngelunyeʹ ca kelunan mele aheʹ pe.

³ Dau heʹ ini, abeʹ e ukoʹ keʹ ke pesalaʹ dau neng ikem. Un sepuʹo kuaʹ baʹan dau heʹ ading are, moʹ ban bioʹ tekaʹ kimet meʹ malaʹ ikem, mudip, matai, pebeka tawai ne ilu.

⁴ Abeʹ keʹ un babak tekaʹ neng ikem. Atek selum tekaʹ keʹ kuʹun ncem. Naʹ pe kadoʹ naʹan penaru meʹ, ina lemuto tangen tekaʹ tawai heʹ lete, ngan atek lapa laleʹ ne tekaʹ pengebangen nceʹ ne.

⁵ Dalau meʹ telu lepa abeʹ kaʹ tanaʹ Makedunia are, abeʹ meʹ un biʹen ke penteng jengan. Kempi kempi pe ameʹ sihoʹ puyan taru, un pe puyan pesakat ngan kelunan, un pe tekaʹ bisau dalem kimet meʹ.

⁶ Un sepuʹo Allah iaʹ mencam petangen kelunan iaʹ bahat tawai. Seʹ e kanan Titus man ne ke petangen ameʹ.

⁷ Abeʹ e bang puyan kenai Titus le iaʹ petangen ameʹ, nco pe dau denga ha laʹa neng puyan ncem ban petangen ia. Moʹ o badaʹ mameʹ kumpin ban ncem bimpin akeʹ, ngan kumpin puyan ncem nesen kimet cem, ngan kumpin kimet cem ubaʹ ke mepo akeʹ. Ban ne pekina, bangen lan lan tekaʹ keʹ naʹkini.

⁸ Kenuen pe surat ceʹ lepa pebampa ikem are, abeʹ keʹ un nesen puyan nceʹ nyurat pekina dau ne. Naʹ pe un tekaʹ keʹ nesen dalau heʹ tisen ikem bampa nuat le kuʹun surat ina are,

⁹ un sepuʹo naʹkini bangen tekaʹ keʹ. Abeʹ keʹ bangen moʹ ban nceʹ lepa pebampa ikem, di lareʹ un tekaʹ keʹ bangen moʹ ban kimet cem lepa pekaliu kuʹun pengebampa hem are. Allah iaʹ kanan pengebampa hem ina, ngan pekina puyan meʹ uyan bang mikem.

¹⁰ Moʹ pengebampa iaʹ Allah kanan senteng uyan kimet le tai pekaliu, sulo ngkin ilu palaʹ udip dalem Tuhan. Abeʹ le nesen kuʹun puyan ina. Di lareʹ puyan pengebampa kusun tanaʹ ini iaʹ ngkin kelunan palaʹ patai.

¹¹ Pekimet ne, kudaʹ naʹan iaʹ Allah uyan kuʹun puyan bampa hem are, kumpin ncem tangen kuʹun ne, kumpin ncem tangen badaʹ pemuyan ncem un teneng, kumpin ncem miʹi neng puyan salaʹ, kumpin ncem takut, kumpin ncem bimpin, kumpin ncem tudep, kumpin ncem tenup tekaʹ ke mukum puyan salaʹ. Ikem lepa peluhaʹ ban pemuyan ncem un buheʹ neng puyan idai are.

¹² Ban pekina, naʹ pe akeʹ ti surat ina, abeʹ keʹ ti ie tuman kelunan iaʹ uyan salaʹ are, pekina pe abeʹ e tuman kelunan iaʹ sihoʹ salaʹ are, di lareʹ akeʹ nyurat te apan puyan ncem tudep kuʹun katuk meʹ un luhaʹ palaʹ ikem ngan juma Allah pe.

¹³ Ina tuman meʹ un tekaʹ tangen. Abeʹ e bang tangen tuaʹ le, un sepuʹo atek bangen tekaʹ meʹ. Moʹ Titus pebangen ameʹ. Seʹ e bangen moʹ ikem iaʹ pepo ke pebangen ia are.

¹⁴ Lan te akeʹ lepa badaʹ tekaʹ keʹ selum kuʹun ncem, ngan abeʹ keʹ ban pejahoʹ kuʹun ncem. Lemuto meʹ menco isiu telit palaʹ ikem are. Pekina lete dau meʹ badaʹ selum tekaʹ meʹ neng Titus are, luhaʹ ban ne isiu telit lete.

¹⁵ Ngan pekina ban puyan kimet Titus malaʹ neng ikem, puyan ne ketai un pit pali laʹa. Mentung nge petawai kumpin ban ncem un tenup tekaʹ ke bayaʹ dau ue, ngan kumpin ncem nyelama alaʹ ia ngan takut ngan ngeregen.

¹⁶ Akeʹ bangen moʹ keʹ senteng pesente tawai heʹ palaʹ ikem dalem singket naʹan puyan.