2 KURINTUS 6 - Kenyah New Testament

¹ Ina ukoʹ ameʹ diaʹ pemung pegayeng ngan Allah taten dau nyat ikem: alaʹ ne pengelesau Tuhan Allah, iaʹ ia lebang naʹ ina, ngan ayen peterai ie pelo-lo.

² Ngeringa dau Allah cen Kitap iaʹ kuma ha: “Jakaʹ un tekaʹ pengelesau heʹ, akeʹ kenahan dau hem. Tegoʹ tau iaʹ akeʹ pudip kelunan, akeʹ lesau ikem.” Ngeringa tiga, moʹ tegoʹ naʹkini un iaʹ marung ke alaʹ pengelesau Tuhan Allah. Tau ini iaʹ tau marung ke alaʹ udip dalem Tuhan.

³ Ameʹ malap dulu ke pesalaʹ gayeng Tuhan iaʹ ameʹ mejo ini, ina ukoʹ meʹ abeʹ un ubaʹ mempeng janan neng aheʹ aheʹ pe iaʹ kenai palaʹ Tuhan.

⁴ Un sepuʹo neng singket singket naʹan pemuyan meʹ, ameʹ badaʹ ban meʹ pegayeng me Allah, iaʹ ina dalem puyan tengayet, ngan denaʹ tawai meʹ dalau taru, ngan dalau keta, ngan dalau tuyen.

⁵ Dulu lepa lemeta ameʹ, ngan nyepin ameʹ, ngan pampo ameʹ. Ameʹ lepa nyara pegayeng, tepet luntoʹ, ngan laʹu pe.

⁶ Luhaʹ ban meʹ pegayeng me Allah moʹ kuʹun puyan buheʹ meʹ, ngan puyan penisen meʹ, ngan puyan denaʹ tawai, ngan pemuyan lesau. Laʹa luhaʹ ne kuʹun Berua Buheʹ ngan puyan pengemalaʹ iaʹ abeʹ un lemalo.

⁷ Pekina pe luhaʹ ne kuʹun tiraʹ telit iaʹ ameʹ badaʹ, ngan penyukat iaʹ nai cen Allah. Puyan peneneng iaʹ seleket senganan meʹ, man meʹ ti ngan dulu, laʹa man meʹ nyakat dulu diaʹ ti ngan meʹ pe.

⁸ Un pe diaʹ nyelumuk ameʹ, un pe diaʹ muau ameʹ, un pe diaʹ pejaʹat ameʹ, un pe diaʹ pincung ameʹ. Palai dulu kuma ameʹ lemalo tuaʹ le, di lareʹ isiu telit tuaʹ le ameʹ pisiu.

⁹ Ameʹ iaʹ koʹ baʹan kelunan iaʹ dulu abeʹ un tisen, un sepuʹo kelunan mung tisen ameʹ. Ameʹ iaʹ koʹ baʹan kelunan iaʹ lepa matai, un sepuʹo ikem iaʹ tisen mudip ne ameʹ. Naʹ pe dulu lepa mukum ameʹ, abeʹ de lematai ameʹ.

¹⁰ Naʹ pe dulu pebampa ameʹ, lemuto meʹ un bangen. Un seʹ meʹ kasip, di lareʹ kadoʹ kelunan tai kayaʹ kuʹun meʹ. Un seʹ meʹ abeʹ un mampin ca inu pe, di lareʹ ameʹ diaʹ mampin mung inu ne.

¹¹ Ahaʹ cenganak cenganak meʹ kaʹ lepoʹ Kurintus, ameʹ lepa pisiu mikem ngan sebelang-belang dau, moʹ bioʹ lan lan tekaʹ kimet meʹ neng ikem.

¹² Abeʹ un kimet meʹ ke ngerada ikem, di lareʹ un seʹ ikem iaʹ alaʹ kimet iaʹ ke ngerada cen ameʹ.

¹³ Dau heʹ naʹkini koʹ baʹan dau heʹ pisiu diaʹ anak keʹ. Tiga hem nyuaʹ tekaʹ saheʹ meʹ. Alaʹ kimet iaʹ bioʹ neng ameʹ.

Jagaʹ puyan tai peseluk neng adet diaʹ ca

¹⁴ Ayen mita gayeng iaʹ ke pebeka ikem ngan kelunan diaʹ abeʹ un ngelan Tuhan. Puyan iaʹ tekajaʹ pekina abeʹ un senteng ke pemung. Kumpin puyan iaʹ teneng senteng ke pemung ngan puyan iaʹ salaʹ tupe? Kumpin iaʹ dema ke pebulung mudip ngan iaʹ mentem tupe?

¹⁵ Kumpin seʹ Keristus ngan bali Sitan ke kuaʹ kimet tupe? Inu kelunan iaʹ ngelan Tuhan ke ngalai un ngan kelunan iaʹ abeʹ un ngelan tupe?

¹⁶ Kumpin tuk umaʹ palan Allah ngan uyat ke pekuaʹ tupe? Moʹ ilu dini ne iaʹ umaʹ palan Allah iaʹ mudip. Kuaʹ bʹan dau Allah tengen iaʹ kuma ha: “Akeʹ ke uyan amin nceʹ ngan kelunan diaʹ anun nceʹ. Akeʹ ke mudip neng ahang ida. Akeʹ nuyan iaʹ Allah re, ngan ida iaʹ nuyan kelunan diaʹ anun nceʹ.”

¹⁷ Ban ne pekina Tuhan pisiu laʹa kuma ha: “Ayen ngelineʹ neng beluaʹ ida dina. Petengen udip kem cen ida. Ayen ngkang inu iaʹ abeʹ un buheʹ, ngan akeʹ ke nyelama alaʹ ikem.

¹⁸ Akeʹ ke nuyan iaʹ Amai hem, ngan ikem ke nuyan iaʹ anak laki heʹ, ngan iaʹ anak leto heʹ. Pekina dau Tuhan iaʹ Nyingan Bioʹ.”