2 KURINTUS 4 - Kenyah New Testament

Peniga udip berua un dalem luhan tanaʹ

¹ Abeʹ meʹ tai iʹut tawai, moʹ Allah tengen iaʹ lepa naʹ tulat gayeng ini mameʹ, ban kuʹun pengelesau ue.

² Ameʹ nyekang mung naʹan puyan diaʹ selem ngan puyan diaʹ pesaʹe. Abeʹ meʹ mejo puyan panyi-anyi. Pekina pe ameʹ abeʹ un tai lemalo-alo badaʹ tiraʹ Allah. Ameʹ mudip kata Allah kentaʹ katuk telit, seleket kentaʹ tau iaʹ katan. Ngan pekina puyan meʹ nengayet ke mayo mung kelunan diaʹ un tiga kimet dalem penawai re.

³ Buk Denga Injil iaʹ ameʹ pedenga ini ketai linget, seʹ e linget palaʹ kelunan diaʹ tai lingu le ina.

⁴ Abeʹ de ngelan Denga Injil ina, moʹ bali jaʹat iaʹ nyeleket Allah mida kusun tanaʹ ini lepa mapo kimet de dalau ntem. Bali jaʹat ina ban mempeng kimet de apan nte abeʹ un sukat taʹan dema iaʹ ke nai ngedema ida. Moʹ dema iaʹ nai cen Denga Injil ina iaʹ ngedema puyan serema peniga Keristus iaʹ atek kuaʹ layen Allah ne lete.

⁵ Moʹ abeʹ e denga puyan meʹ tengen iaʹ ameʹ pedenga, di lareʹ denga puyan Yesus Keristus, kumpin puyan ne atek Tuʹa Bioʹ, mentung meʹ badaʹ puyan ameʹ diaʹ ulaʹ kem tuman Yesus ina.

⁶ Allah iaʹ pisiu cen naʹaʹ kuma ha: “Cen dalau ntem kenai dema nyerema.” Atek Allah ina lete iaʹ uyan dema ha nai nyerema kaʹ dalem kimet le are, idi kenai palaʹ ilu dema penisen neng puyan peniga Allah, kumpin seʹ e luhaʹ serema ha neng silung Keristus.

⁷ Un sepuʹo ameʹ diaʹ mampin peniga udip berua ini mampin ne dalem usa iaʹ lemaʹ, seleket kuden tanaʹ, apan ne luhaʹ ban Allah iaʹ un pengebioʹ penyukat, abeʹ e ameʹ iaʹ un ne pe.

⁸ Ameʹ diaʹ lemuto sihoʹ taru, un sepuʹo abeʹ meʹ jutaʹ. Tahaʹ palai un babak tekaʹ meʹ, un sepuʹo abeʹ meʹ tai melak.

⁹ Kadoʹ diaʹ bunoʹ meʹ, un sepuʹo lemuto un tuyang meʹ. Tahaʹ palai ameʹ sihoʹ tuyen, un sepuʹo abeʹ meʹ tai tasaʹ.

¹⁰ Puyan patai Yesus iaʹ luhaʹ neng usa meʹ lemuto-uto, apan puyan udip pe un luhaʹ dalem usa meʹ lete.

¹¹ Ngajan meʹ mudip ini, lemuto un puyan patai ngenyeng ameʹ tuman Yesus, apan kenai luhaʹ puyan udip Yesus neng usa meʹ iaʹ jaʹat ini.

¹² Sen dau ina, un ca puyan patai iaʹ pegayeng dalem ameʹ, un sepuʹo ca puyan udip iaʹ pegayeng dalem ikem.

¹³ Un dau Kitap kuma ha: “Lepa heʹ ngelan, ina ukoʹ keʹ pisiu.” Ngan pekina puyan pengelan meʹ. Ameʹ tempa pisiu moʹ meʹ ngelan.

¹⁴ Allah iaʹ lepa meteʹ Tuhan Yesus cen patai. Ameʹ tisen ban Allah ina lete iaʹ ke meteʹ ameʹ ketai pemung ngan Yesus, sulo ngkin ameʹ pemung ngan ncem ngejuma ladung nge.

¹⁵ Mung puyan ini are iaʹ nuyan tuman ikem. Kuaʹ baʹan puyan pengelesau Allah ketai tabin sihoʹ kadoʹ kelunan, pekina lete kadoʹ kuʹo ke kelunan diaʹ ke lemameʹ ngan nyuaʹ tiga saheʹ palaʹ Allah apan nyerema peniga ha.

Mudip singket tau man pengelan

¹⁶ Tuman ina ne abeʹ meʹ tai iʹut tawai. Naʹ pe seluhan usa meʹ keno ketai tasaʹ, kimet berua meʹ un puyan iaʹ uyan ne mading singket tau.

¹⁷ Ngan penaru iʹut ini, iaʹ petuyen ameʹ nuat le, ke ngkin mameʹ ca serema peniga iaʹ bioʹ ngan iaʹ ke ngeriman ʹo. Nco bioʹ ne peniga ina ʹo neng ʹo penaru are.

¹⁸ Moʹ ameʹ nyalet penaʹat meʹ neng inu iaʹ dulu abeʹ un taʹan, abeʹ e neng inu iaʹ dulu taʹan. Inu iaʹ dulu taʹan, laho ho ketai salai ne, di lareʹ inu iaʹ dulu abeʹ senteng taʹan, ina iaʹ ke un pa pa majan ʹo.