1 YAYA 5 - Kenyah New Testament

Puyan le un usun neng penyaheʹ usun tanaʹ ini

¹ Aheʹ kelunan iaʹ ngelan uban Yesus iaʹ atek Keristus iaʹ man pungu keniga udip, kelunan ina ne iaʹ anak Allah. Ngan aheʹ iaʹ malaʹ neng iaʹ amai, ia ke malaʹ neng iaʹ anak ke lete.

² Man puyan iaʹ pekini dau le ke ngetisen ban le malaʹ diaʹ anak Allah: man puyan malaʹ neng Allah, ngan tudep bayaʹ dau katuk ukum me.

³ Pekini iaʹ atek sen le malaʹ Allah: iaʹ ina tudep le kanan katuk ukum me. Abeʹ katuk ukum Allah iaʹ ke ngebitung ilu.

⁴ Uban mung diaʹ anak Allah senteng pesupeʹ puyan usun tanaʹ ini. Ini iaʹ ukoʹ le un usun neng puyan penyaheʹ usun tanaʹ ini, kuʹun ban pengelan le.

⁵ Aheʹ iaʹ senteng pesupeʹ puyan penyaheʹ usun tanaʹ ini tupe? Bang kelunan iaʹ ngelan ban Yesus iaʹ atek Anak Allah.

Dau iaʹ nugen neng puyan Yesus Keristus

⁶ Ilu tisen Yesus Keristus ina iaʹ lepa ban nai. Dalau ue sihoʹ batis kaʹ sungai ilu tisen ia te. Laʹa dalau musa dahaʹ a tegoʹ o matai ilu tisen ia lete. Abeʹ e bang nai man sungai tuaʹ le, un sepuʹo man puyan ne kaʹ sungai, ngan puyan ne musa dahaʹ a pelaʹa. Un pe atek Berua Tuhan iaʹ badaʹ tugen dau neng idi uban Berua Tuhan ina iaʹ puʹun penelit isiu.

⁷ Telu re diaʹ badaʹ tugen neng Yesus iaʹ Keristus,

⁸ iaʹ ina Berua Tuhan, ngan puyan kaʹ sungai idai, pekina pe puyan ne musa dahaʹ. Mung nte telu ne payo neng ca le kimet.

⁹ Pengalai le ilu ngelan dau tugen iaʹ kelunan ke badaʹ, un sepuʹo pelapa bioʹ penyukat dau tugen iaʹ Allah naʹ milu, uban man puyan tugen dina Allah lepa naʹ tugen neng Anak ke.

¹⁰ Tuman ina, aheʹ kelunan iaʹ ngelan neng Anak Allah un puyan tugen ina dalem penawai ie tengen. Un sepuʹo kelunan aheʹ iaʹ abeʹ un ngelan neng Allah, seʹ e lepa naʹ Allah palo, uban abeʹ e ngelan dau iaʹ Allah lepa badaʹ tugen neng Anak ke.

¹¹ Ina ukoʹ ini ne puyan tugen ina: Allah lepa naʹ milu udip iaʹ saheʹ kelineʹ iaʹ ngeriman, ngan udip ini ilu mudip kedalem Anak ke.

¹² Kelunan aheʹ diaʹ un Anak ini, ida te diaʹ un udip ini. Kelunan aheʹ diaʹ abeʹ un Anak Allah, abeʹ de un udip.

Udip iaʹ saheʹ kelineʹ iaʹ ngeriman

¹³ Akeʹ nyurat ini mikem diaʹ ban ngelan neng ngadan Anak Allah apan ncem ke ngetisen uban ncem un udip iaʹ saheʹ kelineʹ iaʹ ngeriman.

¹⁴ Tempa tekaʹ penawai le kata Allah uban ilu tisen lan ia ke ngeringa dau le buk le ke lemameʹ nyat inu bayaʹ pengubaʹ kimet te.

¹⁵ Ia ke ngeringa dau le, mele midan midan ilu lemameʹ nyat neng ia. Uban ilu tisen lan ban pekina, tisen lete ilu, ia ke naʹ milu inu iaʹ ilu nyat neng ia.

¹⁶ Buk ca usa taʹan cenganak ke ti ca penyalaʹ iaʹ abeʹ un ngkin ia matai, tekep pe lemameʹ palaʹ Allah, ngan Allah ke naʹ udip mia. Tiraʹ ini iaʹ sihoʹ neng kelunan diaʹ un penyalaʹ iaʹ abeʹ un ngkin ida matai. Un sepuʹo un lete puyan penyalaʹ iaʹ ngkin kelunan matai, abeʹ e neng puyan ina iaʹ akeʹ pisiu, iaʹ tekep ikem ke lemameʹ palaʹ Allah.

¹⁷ Atek penyalaʹ lete mung puyan iaʹ abeʹ un teneng. Un pe penyalaʹ iaʹ abeʹ un ngkin ilu matai.

¹⁸ Tisen te ilu are, ban abeʹ diaʹ anak Allah pekutat ke ti penyalaʹ, uban Keristus iaʹ Anak Allah mencam pubo ia. Bali Jaʹat abeʹ senteng ngejaʹat ia.

¹⁹ Tisen te ilu are, ban ilu diaʹ anun Allah, naʹ pe mung diaʹ kusun tanaʹ ini un kentaʹ pengaren Bali Jaʹat.

²⁰ Tisen te ilu are, ban Anak Allah lepa nai ngan naʹ penisen man le ke ngetisen Allah iaʹ ban atek Allah lan. Udip le dini un dalem Allah iaʹ lan, iaʹ ina dalem Anak ke Yesus Keristus. Ini ie iaʹ atek Allah lan, ngan ini iaʹ atek udip saheʹ kelineʹ iaʹ ngeriman.

²¹ Ahaʹ anak keʹ, ngerada usa hem neng mung naʹan diaʹ saliu Allah iaʹ lan are.