1 YAYA 4 - Kenyah New Testament

Puyan dua naʹan berua

¹ Ahaʹ cenganak cenganak keʹ diaʹ akeʹ malaʹ, ayen ngelan mung dulu diaʹ kuma ida un Berua Allah, un sepuʹo ten ida, idi hem ngetisen buk ban berua iaʹ ida un ina nai cen Allah. Uban kadoʹ pegawa palo lepa libut kusun tanaʹ ini.

² Pekini hem senteng ngetisen buk lan ban nte un Berua Allah: aheʹ kelunan diaʹ tuman dau ngahaʹ ban Yesus Keristus iaʹ lepa nai ngaliu layen kelunan, ida iaʹ un Berua iaʹ nai cen Allah.

³ Ngan aheʹ kelunan diaʹ abeʹ un tuman dau ngahaʹ ban Yesus lepa nai neng puyan usa kelunan, abeʹ kelunan ina un Berua iaʹ nai cen Allah, di lareʹ berua ina nai cen Bali iaʹ Bunoʹ Keristus, iaʹ lepa ikem tisen denga ke nai. Naʹkini lepa ne ia un neng usun tanaʹ ini.

⁴ Un sepuʹo ikem diaʹ anak keʹ, ikem diaʹ anun Allah, lepa un usun ne ikem neng diaʹ pegawa palo dina, uban bioʹ laleʹ penyukat Allah iaʹ petuk berua hem neng ʹo penyukat bali iaʹ un neng dulu diaʹ anun usun tanaʹ ini.

⁵ Puʹun pegawa palo un neng usun tanaʹ ini, ina ukoʹ de pisiu neng puyan usun tanaʹ ini lete, ngan dulu diaʹ kusun tanaʹ ini ubaʹ ngeringa dau re.

⁶ Un sepuʹo puʹun le dini un neng Allah. Ngan kelunan aheʹ diaʹ ngalai tisen neng Allah ubaʹ ke ngeringa dau le. Kelunan diaʹ abeʹ un puʹun nte neng Allah, abeʹ de ubaʹ ngeringa dau le. Man puyan iaʹ pekini ilu ke ngetisen tekajaʹ a Berua iaʹ ngkin katuk telit, ngan tekajaʹ a ngan bali iaʹ ngkin katuk iaʹ salaʹ.

Sematu Allah pengemalaʹ lete

⁷ Ahaʹ cenganak keʹ diaʹ akeʹ malaʹ, tiga ne ilu malaʹ ilu semaheʹ, uban puʹun puyan malaʹ un neng Allah. Aheʹ iaʹ malaʹ, ia iaʹ anak Allah, ngan ia te iaʹ tisen Allah.

⁸ Aheʹ diaʹ abeʹ un malaʹ, abeʹ de tisen Allah, uban sematu Allah pengemalaʹ lete.

⁹ Pekini ban puyan ne peluhaʹ seʹ e malaʹ neng ilu: ia cuk Anak ke, iaʹ ca ina le, nai kaʹ usun tanaʹ ini, apan le senteng alaʹ udip cen ia.

¹⁰ Ini ne puyan pengemalaʹ: abeʹ e ilu ban malaʹ Allah, un sepuʹo Allah iaʹ ban ading malaʹ ilu are, ngan cuk Anak ke nai nuyan ncai petutung tuman penyalaʹ le tai pesau.

¹¹ Ahaʹ cenganak keʹ diaʹ akeʹ malaʹ, buk pekina ban Allah malaʹ ilu, tekep le malaʹ neng ilu semaheʹ.

¹² Abeʹ un aheʹ iaʹ lepa taʹan Allah. Buk le malaʹ neng ilu semaheʹ, ina le Allah mudip dalem ilu, ngan pengemalaʹ a iaʹ tai sukung daʹam kedalem ilu.

¹³ Man puyan iaʹ pekini ilu tisen lan ban le mudip dalem Allah, ngan ia pe un mudip dalem ilu, uban Allah lepa naʹ Berua ha milu.

¹⁴ Ngan ilu pe badaʹ me dulu uban le lepa taʹan seʹ Amai Bioʹ cuk Anak ke nai nuyan ia Laki iaʹ Keniga Udip Kelunan kusun tanaʹ ini.

¹⁵ Aheʹ kelunan iaʹ tuman dau ngahaʹ ban Yesus ina iaʹ anak Allah, Allah iaʹ mudip dalem ia, ngan ia pe mudip dalem Allah.

¹⁶ Laʹa tisen te ilu ngan ngelan neng puyan pengemalaʹ iaʹ man Allah malaʹ ilu. Sematu Allah pengemalaʹ lete, ngan aheʹ kelunan iaʹ mudip dalem pengemalaʹ, atek de mudip dalem Allah, ngan Allah pe mudip dalem ida.

¹⁷ Iaʹ tengangan ban pengemalaʹ ketai sukung daʹam kedalem ilu, apan tempa tekaʹ le tegoʹ Tau Pebetep Ukum ʹo. Ilu ke un tempa tekaʹ uban pengudip le kusun tanaʹ ini un kuaʹ layen pengudip Keristus.

¹⁸ Nyahut abeʹ un puyan takut dalem pengemalaʹ. Pengemalaʹ iaʹ ban sukung daʹam iaʹ ke pekarap mung puyan takut. Uban ne pekina, kelunan iaʹ caʹ takut, abeʹ un pengemalaʹ tai sukung daʹam dalem ia lepe, uban petem pe ia takut Allah ke ngukum ia.

¹⁹ Allah iaʹ ading malaʹ neng ilu, ina ukoʹ le malaʹ.

²⁰ Buk ca kelunan kuma ha: “Akeʹ malaʹ Allah,” petem pe ia miʹi neng diaʹ cenganak ke, ia ne ca kelunan iaʹ palo. Buk ke abeʹ un malaʹ neng cenganak ke iaʹ ia taʹan ina, abeʹ e senteng malaʹ Allah iaʹ ia abeʹ un taʹan.

²¹ Pekini ne dau katuk ukum iaʹ Keristus pekatuk ilu: kelunan iaʹ malaʹ neng Allah, abeʹ e are senteng malaʹ neng diaʹ cenganak ke lete.