1 TIMUTIUS 6 - Kenyah New Testament

¹ Un pe kudaʹ kadoʹ ulaʹ diaʹ ngelan Tuhan, tiga re ngelayen tuʹa re iaʹ tekep ida tunuk neng toʹ keluʹung kimet de, apan dulu abeʹ un senteng ke pejaʹat ngadan Allah ngan katuk ke.

² Ulaʹ diaʹ un tuʹa diaʹ ngelan Tuhan, ayen nte muau dau tuʹa re moʹ de pecenganak dalem Tuhan, di lareʹ tangen kuʹo ke ida neng dau tuʹa re, moʹ de mepo ca kelunan iaʹ un pengelan, iaʹ ida malaʹ ina. Tiga hoʹ pekatuk ngan penco tiraʹ diaʹ pekina me dulu.

Puyan katuk iaʹ pelingu ngan puyan kayaʹ iaʹ lan

³ Buk aheʹ iaʹ penco katuk iaʹ ca naʹan, ngan abeʹ e payo dau tiraʹ Tuhan le Yesus Keristus iaʹ tai palaʹ katuk udip temek bayaʹ Allah,

⁴ seʹ de dina mpau penawai re, ngan abeʹ de un ca penisen. Tai pasak laleʹ ubaʹ de pesakat ngan punan tiraʹ. Puyan ina ngkin dulu petiʹet, ngan paseʹ, ngan pejaʹat dau, ngan ngata ngihoʹ neng iaʹ jaʹat.

⁵ Kelunan dina pekutat pesakat, moʹ abeʹ un semantet kimet de ne, moʹ abeʹ de un katuk iaʹ telit laʹa. Seʹ de kuma ha adet sebayang ne ca janan man mita ligit.

⁶ Iaʹ lan ne, un pe adet temek bayaʹ Tuhan, bioʹ laleʹ le bang nge, buk un teto tekaʹ tawai le neng inu iaʹ un neng ilu.

⁷ Abeʹ un ca inu iaʹ ilu ban ngkin kaʹ usun tanaʹ ini tegoʹ le nai pempet are. Pekina lete laʹa, pabeʹ ca inu pe ilu abeʹ un senteng ke ngkin mecin usun tanaʹ ini.

⁸ Ahaʹ un penguman ngan gelam neng ilu, pa ina ne teto ne tawai le ngan dina.

⁹ Un sepuʹo diaʹ ubaʹ ketai kayaʹ, ida iaʹ ke laboʹ neng pengeten, ngan sihoʹ kelabak kuʹun kadoʹ naʹan pengeloʹ iaʹ untau ngan iaʹ uyan jaʹat, iaʹ ke pelenca kelunan kedalem pengejaʹat ngan ukum patai.

¹⁰ Moʹ malaʹ ligit ina ca pakat ncem neng mung naʹan puyan jaʹat. Ngan un palai diaʹ nengayet mita ha, pa re lingu neng pengelan nte, ngan ngejutaʹ penawai re man kadoʹ naʹan penusa.

Katuk me Timutius

¹¹ Un sepe ikoʹ Timutius, ikoʹ ca usa iaʹ anun Allah. Ngecoʹ ne usa hoʹ cen mung puyan pekina. Nengayet ne ikoʹ mudip neng puyan iaʹ teneng, ngan neng udip iaʹ temek bayaʹ Allah, ngan neng pengelan, ngan neng pengemalaʹ, ngan neng pengemihen, ngan neng lemaʹ saheʹ.

¹² Nengayet ne ikoʹ pasa dalem pengelan, pa ha nalan udip saheʹ kelineʹ iaʹ ngeriman. Moʹ palaʹ udip ina Allah ban mengin ikoʹ, dalau hoʹ tiga ngan teto dau ngahaʹ pengelan ncoʹ kata kadoʹ dulu diaʹ badaʹ tugen neng ikoʹ are.

¹³ Akeʹ pisiu ikoʹ neng juma Allah iaʹ pudip mung inu ne, ngan neng juma Keristus Yesus iaʹ tiga ngan teto dau pisiu Puntius Pilatus.

¹⁴ Akeʹ cuk koʹ kanan katuk iaʹ Tuhan badaʹ ina, ngan petubo ho buheʹ le, apan ne abeʹ un ca penginteʹ e pa tegoʹ Tau Tuhan le Yesus Keristus nai luhaʹ ʹo.

¹⁵ Allah ke cuk Yesus nai luhaʹ neng ketai sihoʹ tuket te ʹo, moʹ Allah iaʹ atek puʹun peniga, bang ia le Paren Bioʹ, Laja neng ʹo mung laja, ngan iaʹ Tuʹa neng ʹo mung diaʹ tuʹa lepoʹ ne.

¹⁶ Bang Allah tengen le iaʹ abeʹ un senteng matai. Ia mudip dalem dema iaʹ kelunan are senteng ke ngenyeng. Abeʹ kelunan taʹan Allah lepe. Pabeʹ bayaʹ pe, abeʹ un aheʹ iaʹ senteng taʹan ia. Palaʹ ia ne ketai mung selama ngan penyukat iaʹ ngeriman. Amin.

¹⁷ Badaʹ me dulu diaʹ un pengekayaʹ usun tanaʹ ini, ayen nte mpau penawai re ngan pesente tebelum nte neng pengekayaʹ de, iaʹ kena kena le ina, di lareʹ bang nebelum ne neng Allah iaʹ lebang naʹ milu mung inu inu ne, iaʹ ilu ke kanan ngan bangen tawai le.

¹⁸ Pekini dau hoʹ neng ida, cuk ida uyan puyan iaʹ tiga, pa re tai kayaʹ neng gayeng iaʹ tiga, ngan lebang puyan nte, ngan tenup tekaʹ tawai re ke petulat inu re ngan kelunan.

¹⁹ Neng pekina puyan, seʹ de pedemun ca bang me usa re tengen, iaʹ ke penyalet udip de pabeʹ bayaʹ. Ina le ke nalan udip iaʹ atek udip lan.

²⁰ Ahaʹ Timutius, petubo ne inu iaʹ Allah ban mahung mikoʹ. Ngerada usa hoʹ neng mung tiraʹ diaʹ abeʹ un semantet, ngan diaʹ muau neng Allah, ngan diaʹ paseʹ penisen, iaʹ lan ne abeʹ e penisen.

²¹ Un pe kudaʹ usa diaʹ lepa ngahaʹ penisen ina, penco re daru neng pengelan nte. Awaʹ pe pengelesau Allah un ngan ncem mung. 12