1 TIMUTIUS 4 - Kenyah New Testament

Guru iaʹ ngaloʹ

¹ Berua Tuhan iaʹ peluhaʹ milu: un tegoʹ ketai kuʹo udip uʹo, ke un palai diaʹ ke lepo pengelan nte, moʹ de tai tunuk bali diaʹ pelingu kelunan, ngan bayaʹ dau katuk bali dina.

² Kenai katuk dina cen kelunan diaʹ panyi pelingu, diaʹ mencam lemalo, moʹ tekaʹ kimet dalem penawai re koʹ baʹan tenetaʹ malat pana.

³ Ida pekatuk mulen kelunan pepeto, ngan lemalan neng kudaʹ naʹan penguman. Di lareʹ iaʹ lan ne, Allah ban uyan penguman ina apan ilu diaʹ ngelan Tuhan, ngan tisen neng katuk telit, ke nyuaʹ tiga saheʹ ngan uman ne.

⁴ Moʹ mung inu iaʹ Allah lepa uyan, mung nte iaʹ tiga. Ca le pe abeʹ le tekep pet te buk le alaʹ a ngan nyuaʹ tiga saheʹ.

⁵ Moʹ mung inu dina lepa buheʹ ne kata Allah kuʹun tiraʹ Allah ngan kuʹun dau temameʹ le.

Timutius petubo gayeng Keristus

⁶ Buk koʹ petawai mung cenganak le dalem Tuhan neng katuk ina, atek ikoʹ lete iaʹ nuyan ulaʹ iaʹ tiga neng Keristus Yesus, moʹ luhaʹ seʹ koʹ lemakan berua hoʹ man katuk pengelan, ngan tiraʹ iaʹ tiga, iaʹ ikoʹ tudep bayaʹ cen penading nge.

⁷ Ikoʹ ngerada usa hoʹ neng mung tekenaʹ diaʹ salaʹ dau, diaʹ abeʹ un tuman tuman. Di lareʹ sanget le ikoʹ pekalai neng udip temek bayaʹ Allah.

⁸ Moʹ un puyan iaʹ pekalai ngala usa, kediʹut le bang nge. Un sepuʹo pekalai neng udip temek bayaʹ Allah, bioʹ bang nge neng singket naʹan inu ne. Moʹ neng idi un tuket udip iaʹ naʹkini ngan iaʹ kenai bayaʹ ʹo.

⁹ Ina ca puʹun katuk iaʹ salet, iaʹ tekep ilu mung semamet kanan.

¹⁰ Moʹ ina ukoʹ le nyara ngan nengayet tekaʹ pegayeng, moʹ le lepa pesente tebelum le neng Allah iaʹ mudip, iaʹ Keniga Udip kelunan mung, menco ho pelaʹa neng diaʹ un pengelan neng ia.

¹¹ Ikoʹ badaʹ mung katuk ina, ngan cuk dulu bayaʹ a.

¹² Naʹ pe iʹut udip koʹ, ayen buhaʹ mele aheʹ pe ke pengut ikoʹ, di lareʹ tiga hoʹ nuyan ca kata me mung diaʹ ngelan Tuhan, tiga ha dalem isiu hoʹ, ngan dalem pemuyan saheʹ koʹ, ngan dalem pengemalaʹ koʹ, ngan dalem pengelan ncoʹ, ngan dalem pengebuheʹ koʹ.

¹³ Tudep le ikoʹ baca Kitap Tuhan me dulu, ngan penco tiraʹ Tuhan mida. Pekatuk ida pa kenai heʹ ʹo.

¹⁴ Ayen ncoʹ peterai neng pengencai Berua Tuhan iaʹ un dalem ikoʹ, iaʹ ban Allah naʹ mikoʹ tegoʹ diaʹ pegawa Tuhan pisiu, ngan tegoʹ diaʹ tuʹa Mpun napoʹ ujoʹ de neng ikoʹ are.

¹⁵ Tiga hoʹ tangen ngan jaya neng mung puyan ina, apan ne luhaʹ seʹ ban telicuk udip koʹ palaʹ dulu mung.

¹⁶ Nawai le ikoʹ tiga tiga tuk usa hoʹ ngan neng katuk koʹ. Tudep le ikoʹ dalem gayeng Tuhan, moʹ dalem gayeng ini hoʹ ke pudip usa hoʹ tengen, ngan pekina pe diaʹ ngeringa dau hoʹ.