1 TIMUTIUS 3 - Kenyah New Testament

Gayeng diaʹ tuʹa Mpun diaʹ ngelan Tuhan

¹ Ini ne tiraʹ iaʹ ilu senteng ke napi: Buk ca usa un kimet te ubaʹ ke tuʹa dalem Mpun diaʹ ngelan Tuhan, seʹ e ke un pengubaʹ neng gayeng iaʹ atek tiga.

² Tekep pe aheʹ iaʹ ngkang gayeng tuʹa Mpun diaʹ ngelan dina abeʹ un salaʹ kimet te, ngan bang ca le leto ho, sebelang kimet te, senteng mapo usa ha, daʹam puyan ne, ubaʹ alaʹ sakai nyabeʹ amin ne, ngan mencam pekatuk dulu.

³ Abeʹ e mabuk, abeʹ pe ia pekenca, di lareʹ lemaʹ saheʹ e, abeʹ e ubaʹ pesakat, ngan abeʹ e malaʹ ligit.

⁴ Di lareʹ ca usa iaʹ senteng peteneng pengamin ne ngan daʹam, ngan pekatuk diaʹ anak ke tudep bayaʹ ia neng puyan iaʹ tunuk.

⁵ Buk ca usa are senteng pekatuk diaʹ amin ne tengen, kumpin ne sukat ke petubo Mpun diaʹ ngelan Allah ʹo?

⁶ Ayen buhaʹ ia ca usa iaʹ mading nai ngelan, malap ia tai mpau penawai ie, penco sihoʹ ukum koʹ baʹan Bali Jaʹat siho ukum cen naʹaʹ.

⁷ Ngan tekep iaʹ tuʹa ina un ngadan tiga neng ahang dulu lepoʹ diaʹ tahaʹ awang Mpun diaʹ ngelan Tuhan, idi dulu abeʹ un pejaʹat ia, ngan ia abeʹ un tai sihoʹ kelabak Bali Jaʹat.

Diaʹ mepo Mpun diaʹ ngelan Tuhan

⁸ Pekina lete neng mung diaʹ mepo Mpun diaʹ ngelan, tekep tiga buat de, ngan abeʹ pesanget jelaʹ de, abeʹ de malaʹ neng jakan, ngan ayen nte tutun.

⁹ Tekep de ngkang katuk iaʹ lan, iaʹ Allah ban peluhaʹ milu neng puyan le ngelan Keristus, ngan dema tekaʹ kimet dalem penawai re.

¹⁰ Tekep kem ten ida ading. Uʹo ina, buk abeʹ un seʹ ca abi re, ina le ida menco gayeng mepo dalem Mpun diaʹ ngelan Tuhan ʹo.

¹¹ Pekina lete neng mung leto re, tekep tiga buat de, abeʹ de patu tiraʹ bareng me dulu, sebelang kimet de, ngan semamet neng mung naʹan gayeng nte.

¹² Aheʹ iaʹ mepo Mpun diaʹ ngelan, bang ca le leto ho, ngan mencam me peteneng pengamin ne tengen.

¹³ Moʹ ida diaʹ sanget ngkang gayeng mepo Mpun diaʹ ngelan Tuhan dina, seʹ de alaʹ ca ngadan iaʹ tiga neng usa re tengen, ngan tempa seʹ de lemejo gayeng pengelan le iaʹ ilu un dalem Keristus Yesus.

Bioʹ laleʹ ban sen udip Keristin

¹⁴ Dalau heʹ nyurat mikoʹ naʹkini, un tebelum tekaʹ keʹ ke nai palaʹ ikoʹ laho ʹo.

¹⁵ Un sepuʹo buk keʹ duʹai ʹo, tisen te ikoʹ kuʹun surat ceʹ ini neng puyan adet iaʹ tekep milu diaʹ mudip dalem pengamin Allah, iaʹ ina Mpun diaʹ ngelan Allah iaʹ mudip, Mpun iaʹ atek sukaʹ ngan tentan katuk telit.

¹⁶ Abeʹ un aheʹ iaʹ senteng nyepati ban bioʹ laleʹ sen udip Keristin. Ia ne: Yesus iaʹ lepa nai luhaʹ dalem layen usa kelunan. Berua Tuhan iaʹ peluhaʹ ia atek teneng. Ngan melikat pe taʹan ia. Denga ha tai libut me mung lepoʹ. Libut usun tanaʹ ini kelunan ngelan ia. Dalem serema peniga, tai ie pejung kaʹ surga.