1 TIMUTIUS 1 - Kenyah New Testament

¹ Cen Paulus, lawa Keristus Yesus, bayaʹ dau pengecuk Allah: Allah iaʹ Keniga Udip le, ngan Keristus Yesus iaʹ tebelum le.

² Palaʹ Timutius, iaʹ atek anak keʹ dalem pengelan. Awaʹ pe Allah iaʹ Amai Bioʹ, ngan Keristus Yesus iaʹ Tuʹa le, ke naʹ pengelesau iaʹ ia lebang naʹ milu, ngan puyan lesau, ngan udip iaʹ tadan mikoʹ.

Jagaʹ neng katuk iaʹ palo

³ Dalau tai heʹ masat tai kaʹ Makedunia are, un dau heʹ cuk ikoʹ ngelineʹ kaʹ Ipesus. Naʹkini ayen ncoʹ tai puke, moʹ un palai dulu diaʹ penco katuk palo mida kina. Tiga hoʹ mulen ida,

⁴ ngan cuk ida lepo tekenaʹ iaʹ palo, ngan petepun iaʹ abeʹ un ketai kuʹo, iaʹ tai ngkin dulu muʹo ketai paseʹ. Moʹ neng puyan iaʹ pekina, abeʹ un telicuk ke neng gayeng Allah ngan pengelan le.

⁵ Tuman nceʹ mulen pekina, moʹ keʹ ubaʹ ilu ke un pengemalaʹ iaʹ nai luhaʹ cen penawai iaʹ buheʹ, ngan tekaʹ kimet penawai iaʹ tiga, ngan pengelan iaʹ abeʹ un ngelibo.

⁶ Moʹ un palai dulu iaʹ tai dancun neng puyan ini. Penco re tai lingu neng janan katuk iaʹ abeʹ un semantet.

⁷ Ubaʹ de ke tai guru neng katuk adet Allah, un sepuʹo abeʹ de tisen neng luʹung isiu re, ngan neng sen katuk iaʹ ida badaʹ ngan tempa re.

⁸ Ilu tisen Katuk Adet Allah iaʹ nai kuʹun Musa ne atek tiga, buk le kanan ne ngan teneng.

⁹ Ngan petawai le ilu neng puyan katuk adet, abeʹ e nuyan me kelunan diaʹ teneng, un sepuʹo nuyan me diaʹ ngesa adet, ngan diaʹ muau, ngan diaʹ petabo mudip, ngan diaʹ pepuk kuʹun penyalaʹ, ngan diaʹ un adet mano, ngan diaʹ abeʹ un petubo berua re, ngan diaʹ lematai amai ngan ueʹ de, ngan me mung diaʹ lematai kelunan.

¹⁰ Pekina pe me diaʹ pemung nyelem, ngan me laki diaʹ uyan deram ngan laki, ngan me diaʹ magang kelunan, ngan diaʹ palo, ngan diaʹ pekasing tiraʹ, ngan mung naʹan puyan diaʹ ca, diaʹ abeʹ un mayo katuk iaʹ teneng lan,

¹¹ ini ne katuk Denga Injil, iaʹ Allah cuk akeʹ pedenga, iaʹ nai cen Allah iaʹ un serema peniga, iaʹ ilu tekep ke pempau.

Paulus nyuaʹ tiga saheʹ moʹ kuʹun pengelesau Allah

¹² Akeʹ nyuaʹ tiga saheʹ palaʹ Keristus Yesus, Tuhan le iaʹ ban naʹ pengali makeʹ dalem gayeng ngkeʹ. Akeʹ nyuaʹ tiga saheʹ neng ia pelaʹa, moʹ o naʹ penekep makeʹ, sulo ho nyalet akeʹ neng gayeng ini.

¹³ Iaʹ lan ne, naʹ pe cen naʹaʹ are akeʹ iaʹ ban pejaʹat ngadan ne, ngan nyakit ia, ngan miʹi neng ia, un sepuʹo lesau ban Allah neng akeʹ, naʹ pe akeʹ ban uyan pekina, moʹ dalau heʹ turan are, abeʹ keʹ un pengelan lepe.

¹⁴ Sulo kun Tuhan le naʹ pengelesau ue iaʹ pasak bioʹina makeʹ, peging pengelan ngan pengemalaʹ iaʹ ilu pemung un dalem Keristus Yesus.

¹⁵ Ini ca puʹun katuk iaʹ salet, iaʹ tekep dulu mung ke kanan: Tuman Keristus Yesus lepa nai kaʹ usun tanaʹ ini, moʹ o ke pudip kelunan penyalaʹ. Neng ahang ida, akeʹ iaʹ atek bioʹ penyalaʹ.

¹⁶ Tuman ina ukoʹ Allah ban lesau akeʹ, apan Keristus Yesus senteng ke peluhaʹ seʹ pengedadoʹ tawai ie neng akeʹ iaʹ atek jaʹat neng ahang kelunan penyalaʹ. Ngan akeʹ iaʹ nuyan ca kata me mung dulu diaʹ ke ngelan ia, diaʹ ke alaʹ udip saheʹ kelineʹ iaʹ ngeriman.

¹⁷ Mung selama ngan serema peniga me Allah pabeʹ bayaʹ. Ia ne Paren Bioʹ iaʹ mudip ngeriman, iaʹ abeʹ un tisen ketai salai, ngan iaʹ abeʹ un luhaʹ neng penaʹat kelunan, ia ne Tuhan Allah iaʹ bang ca le ina. Amin.

¹⁸ Ahaʹ anak keʹ Timutius, ini ne dau pengecuk iaʹ akeʹ ke pesuʹun mikoʹ, bayaʹ dau pegawa Tuhan diaʹ badaʹ seluhan kimet Allah neng puyan ncoʹ cen kena are. Kanan ne tiraʹ ina seleket gelam pepatai, man ncoʹ lan lan pepatai dalem kayau iaʹ tiga.

¹⁹ Salet le ikoʹ dalem pengelan ncoʹ, peging ngan tekaʹ kimet dalem penawai hoʹ iaʹ dema. Moʹ un palai dulu diaʹ nyekang tekaʹ kimet dalem penawai re iaʹ dema, ina ukoʹ de kaham neng pengelan nte.

²⁰ Pekina Himinius ngan Alik-sandar iaʹ akeʹ lepa naʹ me Sitan, apan nte tai tisen katuk iaʹ mulen ida ke pejaʹat ngadan Tuhan.