1 TESALUNIKA 4 - Kenyah New Testament

Puyan pengudip iaʹ sihoʹ pengubaʹ Allah

¹ Dau heʹ laʹa cenganak, lepa ne ikem tisen cen ameʹ, kumpin layen iaʹ tekep kem ke mudip, apan ncem ke sihoʹ pengubaʹ kimet Allah. Pekina lan lete seʹ pengudip kem pabeʹ naʹkini pe. Naʹkini ameʹ nyat ikem, ngan taten taten tekaʹ meʹ nai palaʹ ikem, man ngadan Tuhan Yesus pe, ngepit puyan ina laʹa.

² Ikem tisen katuk neng pemuyan iaʹ ameʹ pelawa mikem cen Tuhan Yesus are.

³ Ini ne pengubaʹ kimet Allah mikem. Ia ubaʹ ikem ke mudip buheʹ, abeʹ un laki ngan leto pemung buk are pepeto lan ading.

⁴ Dau heʹ neng ikem diaʹ laki, tekep ne singket singket cem ke tisen kumpin puyan alaʹ leto ngan janan iaʹ buheʹ, ngan iaʹ selama.

⁵ Abeʹ e ngan kaseng kimet iaʹ ubaʹ neng jaʹat, koʹ baʹan kelunan diaʹ abeʹ un ngelan ngan abeʹ un tisen Allah lepe.

⁶ Dalem puyan ini, ayen ca usa ke uyan salaʹ neng cenganak ke, ngan pekina pe ke panyi ia. Lepa ne ameʹ badaʹ ini mikem cen kena are. Ameʹ ngelapen mulen ikem are. Un dau meʹ badaʹ ban ne atek Tuhan ke ngukum kelunan diaʹ pekina puyan salaʹ.

⁷ Abeʹ e Allah mengin ilu apan le mudip dalem puyan selabu, di lareʹ Allah ban mengin ilu apan le mudip dalem puyan iaʹ buheʹ.

⁸ Tuman ina, aheʹ iaʹ ke nyekang katuk ini, abeʹ e nyekang kelunan, un sepuʹo ia nyekang Allah iaʹ naʹ Berua ha mikem, iaʹ ina Berua Buheʹ.

⁹ Abeʹ titin meʹ nyurat mikem neng puyan malaʹ neng cenganak kem diaʹ kuaʹ ngelan ngan ncem, un sepuʹo ikem tengen lepa alaʹ katuk cen Allah, kumpin puyan ncem ke malaʹ neng ikem peselepeʹ.

¹⁰ Lan te puyan ncem pekina lepa luhaʹ palaʹ mung cenganak kem pa tipo tanaʹ Makedunia. Tuman ina, ameʹ ngelapen nyat ikem cenganak cenganak, ngepit puyan ina laʹa.

¹¹ Nengayet ne mita udip iaʹ denaʹ, mentung ngimet ke petubo inu hem man gayeng ngkem tengen ne. Ngan tangen ne pegayeng ke pita pengudip kem tengen, koʹ baʹan dau iaʹ ameʹ badaʹ mikem cen kena are.

¹² Ngan janan ini dulu diaʹ abeʹ un ngelan ke nyelama ikem ʹo. Abeʹ titin ncem ke napi kelunan ke naʹ tuaʹ inu iaʹ tekep ikem ke un.

Puyan kenai Tuhan Yesus

¹³ Ahaʹ cenganak cenganak, ameʹ ubaʹ ikem ke ngetisen iaʹ lan ne neng puyan ida diaʹ lepa matai, apan ncem abeʹ un jaʹat tawai koʹ baʹan puyan kelunan diaʹ abeʹ un tebelum are.

¹⁴ Ilu ngelan Yesus lepa matai ngan numpak mudip laʹa. Ngan pekina pe ilu ngelan Allah ke ngkin, pemung ngan Yeuss, ida diaʹ lepa matai dalau re ngelan ia are.

¹⁵ Atek katuk Tuhan iaʹ ameʹ badaʹ mikem ini, iaʹ ina, ilu diaʹ caʹ mudip tegoʹ tau kenai Tuhan ʹo, abeʹ le ketai nekena neng ida diaʹ lepa matai.

¹⁶ Un sepuʹo un dau lengap pengecuk Allah, ngan un dau isiu melikat iaʹ bioʹ, ngan un dau tuyau tekepip Allah; penco Tuhan tengen kenai kentaʹ cen surga. Kelunan diaʹ lepa matai ngelan Keristus, ida ke nai beteʹ ading.

¹⁷ Uʹo ina ilu diaʹ caʹ mudip dalau ina, ina le ia ke nyintek alaʹ ilu tai kempau, peging ngan diaʹ ca didai are neng usun abun te, ketai petegoʹ ngan Tuhan kaʹ beluaʹ awang te. Pekina ne puyan le ke tai un pemung ngan Tuhan pa pa majan.

¹⁸ Tuman ina, tiga ne petangen ikem selepeʹ man isiu ini are.