1 TESALUNIKA 3 - Kenyah New Testament

¹ Tai kuʹo ho abeʹ ne un nyatan tekaʹ meʹ ne laʹa, ina ukoʹ meʹ kuma tiga ameʹ ke ngelineʹ tengen le kaʹ Atina,

² ngan cuk cenganak meʹ Timutius tai palaʹ ikem. Timutius iaʹ pemung ngan meʹ pegayeng me Allah ke badaʹ Denga Injil Keristus ina. Ameʹ cuk Timutius nai petangen ikem, ngan nyalet pengelan ncem,

³ malap ca usa mele aheʹ pe neng ahang ikem ke tai pubut kimet te tuman penaru iaʹ nantaʹ ikem naʹkini. Ikem tengen tisen ban ne un tulat penaru dalem pengubaʹ kimet Allah me ilu.

⁴ Dalau meʹ caʹ un ngan ncem are, ameʹ badaʹ a mikem cen kena, atek ilu ke sihoʹ taru. Ngan naʹkini ikem tisen kumpin puyan ne nuyan lan.

⁵ Ina tuman nceʹ cuk Timutius tai naʹat ikem, moʹ abeʹ ne un nyatan tekaʹ keʹ laʹa. Pekina puyan nceʹ cuk ia, apan ne kenai ngetisen puyan pengelan ncem. Un tekaʹ keʹ malap Bali Jaʹat ke ten ikem, ngan abeʹ ne un tubo mung gayeng meʹ are.

⁶ Naʹkini lepa ne Timutius nai ngeliwet cen ikem, nai ie palaʹ ameʹ. Ia ngkin denga iaʹ tiga dau, iaʹ badaʹ puyan pengelan ngan puyan pengemalaʹ kem. Un pe ia badaʹ mameʹ ban lemuto hem petawai ameʹ, ngan ubaʹ ke petegoʹ ngan meʹ, koʹ baʹan tekaʹ meʹ ubaʹ ke petegoʹ ngan ncem lete.

⁷ Ahaʹ cenganak cenganak, denga ina iaʹ petangen kimet meʹ ke pekimet ikem dalem mung puyan keta ngan penaru meʹ. Pengelan ncem iaʹ petangen ameʹ.

⁸ Naʹkini atek mudip lan ne ameʹ, ahaʹ ikem jeng salet dalem Tuhan.

⁹ Naʹkini senteng meʹ nyuaʹ tiga saheʹ palaʹ Allah tuman ikem. Ameʹ nyuaʹ tiga saheʹ palaʹ Allah moʹ kuʹun tekaʹ bangen meʹ ngejuma Tuhan Allah le tuman ikem.

¹⁰ Naʹ tau ngan ngahu pe ameʹ nyat palaʹ ia, man tekaʹ luʹung kimet meʹ, apan ne ke pawang ameʹ tengen kenai naʹat ikem, sulo ngepit inu iaʹ tepa neng pengelan ncem.

¹¹ Ameʹ nebelum Allah tengen, iaʹ Amai Bioʹ le, ngan Tuhan le Yesus, iaʹ ke peteneng janan man meʹ kenai palaʹ ikem.

¹² Awaʹ pe Tuhan ke uyan pengemalaʹ kem neng ahang ikem peselepeʹ, pekina pe neng kelunan mung, kenai un pit un pit pa ha ke nuyan koʹ bioʹ pengemalaʹ meʹ neng ikem are.

¹³ Ngan janan ini Tuhan ke nyalet penawai hem, ngan ikem ke nuyan iaʹ daʹam dalem udip buheʹ neng juma Allah iaʹ Amai Bioʹ le, tegoʹ Tuhan le Yesus ke kenai luhaʹ ngan mung kelunan diaʹ ban anun ne.